រាជធានីភ្នំពេញ ៖ អ្នកនំាពាក្យគណបក្សប្រជាជនកម្ពុជា លោកបណ្ឌិត ឈឹម ផលវរុណ បានមានប្រសាសន៍នៅប៉ុន្មាននាទីមុននេះបា្រប់គេហទំព័រកោះសន្តិភាពតាមទូរស័ព្ទថា លោក សម រង្ស៊ី កំពុងទាញយកព្រឹត្តិការណ៍បាតុកម្មនិងអំពើហិង្សានៅមុខរដ្ឋសភាកាលពីថ្ងៃទី២៦ តុលា ២០១៥ ដើម្បីកេងចំណេញផ្នែកនយោបាយ ។
ការលើកឡើងរបស់អ្នកនំាពាក្យគណបក្សប្រជាជនកម្ពុជានាព្រឹកថ្ងៃទី២៧តុលានេះ បានធ្វើឡើងបន្ទាប់ពីប្រធានក្រុមតំណាងរាស្រ្តភាគតិចក្នុងសភា លោក សម រង្ស៊ី បានសរសេរនៅលើបណ្តាញទំនាក់ទំនងសង្គម( Facebook ) ដោយចោទប្រកាន់គណបក្សប្រជាជនកម្ពុជានៅពីក្រោយបាតុកម្មដកលោក កឹម សុខា និង អំពើហិង្សាលើតំណាងរាស្រ្តគណបក្សសង្គ្រោះជាតិពីររូបកាលពីថ្ងៃម្សិលមិញនោះ និងបានហៅសម្តេចតេជោ ហ៊ុន សែន ថាកំពុងប្រើវិធីស្រដៀងទៅនឹងពួកហ្វាស៊ីស្តនៅក្នុងប្រទេសអ៊ីតាលីពីឆ្នាំ១៩២២-១៩៤៥នោះថែមទៀត ។
បើតាមលោកបណ្ឌិត ឈឹម ផលវរុណ ”ព្រឹត្តិការណ៍កាលពីថ្ងៃម្សិលមិញយើងត្រូវញែកជាពីរ ។ ទី១ នៅពេលព្រឹកជាបាតុកម្មដាក់ញ្ញត្តិទាមទារដកលោក កឹម សុខា ពីអនុប្រធានទី១រដ្ឋសភា ហើយថាតាមទិដ្ឋភាពជាក់ស្តែង ក្រុមបាតុករបានរំសាយនៅមុខរដ្ឋសភាហើយ ក្រោយគណៈកម្មការទី១នៃរដ្ឋសភាបានទទួលយកញ្ញត្តិនៅចន្លោះម៉ោងប្រមាណ១០និង២០នាទីទៅម៉ោង១១ថ្ងៃត្រង់ ។ រីឯទី២ នៅចន្លោះម៉ោង១១និង៣០នាទីដល់ម៉ោង១២ថ្ងៃត្រង់ មានក្រុមផ្សេងមួយទៀតមកបង្កើតរឿងហិង្សា “។
អ្នកនំាពាក្យគណបក្សប្រជាជនកម្ពុជាដដែលបានដាក់ជាចម្ងល់ចោទសួរថា “ បើតាមវីដេអូឃ្លីបយើងអត់ឃើញមនុស្សមកឡោមព័ទ្ឋរថយន្តអ្នកតំណាងរាស្រ្តដែលរងការប្រើអំពើហិង្សានោះទេ ចម្ងល់មួយទៀត ពេលដែលអ្នកបើកបររថយន្តលើកអ្នកតំណាងរាស្រ្តដាក់ចូលរថយន្ត ហេតុអ្វីបានជាអ្នកបើកបរនោះមិនចាក់សោរទ្វារ និងបើករថយន្តចេញ បែរជាចុះពីលើរថយន្តវិញ តែយ៉ាងណាក៍ដោយយើងទុកឲ្យសមត្ថកិច្ចបើកការស៊ើបអង្កេតករណីនេះ” ។
ជាមួយគ្នានេះដែរ លោកបណ្ឌិត ឈឹម ផលវរុណ ក៍ស្នើឲ្យសមត្ថកិច្ចបើកការស៊ើបអង្កេតលើពាក្យពេចន៍របស់លោក សម រង្ស៊ី ដែលចោទប្រកាន់ភ្លាមៗថា ក្រុមបាតុករប្រឆាំងលោក កឹម សុខា ជាក្រុមរបស់គណបក្សប្រជាជនកម្ពុជានោះថែមទៀត ៕
ចែករំលែកព័តមាននេះ