រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសជាអ្នកសិល្បករមួយរូបបានស្លា.ប់បាត់បង់ជីវិត ក្រោយពេលបញ្ជូនដល់មន្ទីរពេទ្យ ខណៈពេលជិះម៉ូតូមួយគ្រឿងក្នុងល្បឿនលឿនវ៉ាជែងពីមុខរថយន្ត បណ្តាលឲ្យរអិលចាប់ហ្វ្រាំងមិនទាន់ក៏ដួលចូលក្រោមកង់រថយន្តដឹកខ្សាច់កិនបែកសាច់ជើងទាំងសងខាងតែម្តង ហេតុការណ៍គ្រោះថ្នាក់ចរាចរណ៍នោះបានកើតឡើងកាលពីវេលាម៉ោង៧និង៣០នាទីយប់ ថ្ងៃទី៨ ខែឧសភា ឆ្នាំ២០២១ ស្ថិតនៅតាមបណ្ដោយផ្លូវជាតិលេខ៤ ចំណុចជិតនឹងស្តុបទំនប់កប់ស្រូវ ក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ ។
សេចក្តីរាយការណ៍បានបន្តថា ជនរងគ្រោះខាងលើមានឈ្មោះ គឹមសែ ភេទប្រុស អាយុ២៥ឆ្នាំ មុខរបជាសិល្បករផ្នែករាំ បច្ចុប្បន្នរស់នៅសង្កាត់បឹងកក់ទី១ ខណ្ឌទួលគោក ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុខាងលើ គេបានឃើញរថយន្តដឹកខ្សាច់មួយគ្រឿងម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ កណ្តាល 3A -2932 បើកបរដោយបុរសម្នាក់ធ្វើដំណើរតាមបណ្តោយផ្លួវជាតិលេខ៤ ទិសដៅពីកើតទៅលិច ក្នុងល្បឿនលឿន ខណៈពេលមកដល់ចំណុចកើតហេតុ ក៏ស្រាប់តែគេឃើញបុរសជនរងគ្រោះម្នាក់ជិះម៉ូតូម៉ាក ZOOMERX ពណ៌ខ្មៅលាយក្រហម ពាក់ស្លាកលេខ ភ្នំពេញ1GS- 7122 ធ្វើដំណើរស្របទិសដៅគ្នា ក្នុងល្បឿនយ៉ាងលឿនដូចគ្នា និងវ៉ាជែងទៀតផង ។
ប្រភពដដែលបន្តថា ខណៈពេលម៉ូតូជនរងគ្រោះមកដល់ចំណុចកើតហេតុខាងលើ ក៏ស្រាប់តែរអិលចាប់ហ្វ្រាំងមិនទាន់ រួចក៏ដួលចូលក្រោមកង់រថយន្តកិនពីលើធ្វើឱ្យបែកសាច់ជើងទាំងសងខាង បណ្តាលឲ្យជនរងគ្រោះស្លា.ប់ក្រោយពេលបញ្ជូនដល់មន្ទីពេទ្យ។ ចំណែកឯអ្នកបើកបររថយន្តក៏បានបើកទ្វាររត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុតែប៉ុណ្ណោះ។
ក្រោយពេលកើតហេតុខាងលើ សមត្ថកិច្ចមូលដ្ឋានសហការជាមួយនឹងខាងជំនាញចរាចរខណ្ឌពោធិ៍សែនជ័យ ចុះមកដល់ រួចក៏បានទំនាក់ទំនងទៅខាងជំនាញការិយាល័យចរាចរណ៍នៃស្នងការរាជធានីភ្នំពេញ ចុះមកវាស់វែង រួចយករថយន្ត និងម៉ូតូទៅរក្សាទុកនៅខាងការិយាល័យចរាចរណ៍ជំនាញផ្លូវគោក នៃស្នងការនគរបាលរាជធានីភ្នំពេញ ដើម្បីរង់ចាំដោះស្រាយនៅពេលក្រោយ។ រីឯស.ពជនរងគ្រោះត្រូវបានប្រគល់ឲ្យទៅក្រុមគ្រួសារ យកទៅធ្វើបុណ្យតាមប្រពៃណី៕
ចែករំលែកព័តមាននេះ