សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានធ្វើដំណើរតាមយន្តហោះរបស់ក្រុមហ៊ុនអាកាសចរណ៍សិង្ហបុរី ជើងហោះហើរលេខ SQ 336 អញ្ជើញទៅដល់អាកាសយានដ្ឋានអន្តរជាតិសាលដឺហ្គោល ទីក្រុងប៉ារីស សាធារណរដ្ឋបារាំង ប្រកបដោយសុវត្ថិភាព កាលពីវេលាម៉ោង៦និង៥០នាទីព្រឹក ថ្ងៃទី២៥ ខែតុលា ម៉ោងនៅទីក្រុងប៉ារីស ប្រទេសបារាំង ត្រូវនឹងម៉ោង១១និង៥០នាទីព្រឹក ម៉ោងនៅប្រទេសកម្ពុជា ដើម្បីបំពេញទស្សនកិច្ច៣ថ្ងៃនៅសាធារណរដ្ឋបារាំង ។
វត្តមាននៃការអញ្ជើញដល់របស់សម្តេចតេជោនាយករដ្ឋមន្ត្រី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រូវបានការធ្វើគារវកិច្ចស្វាគមន៍យ៉ាងកក់ក្តៅ និងស្និទ្ធស្នាលរាក់ទាក់ពីសំណាក់លោក Jean Claude PIMBOEUF ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋបារាំងប្រចាំព្រះរាជាណាចក្រកម្ពុជា លោក នុត ណារ៉ាង ឯកអគ្គរាជទូតវិសាមញ្ញនិងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋបារាំង និងលោកជំទាវ លោក Jerome Cauchard អនុប្រធានពិធីការនៃក្រសួងការបរទេសបារាំង ព្រមទាំងវត្តមាន លោកជំទាវ អស់លោក លោកស្រី ជាឥស្សរជនការទូតនៃប្រទេសទាំងពីរកម្ពុជា-បារាំងជាច្រើនរូបទៀត ។
តាមកម្មវិធីដែលបានគ្រោងទុក សម្តេចតេជោនាយករដ្ឋមន្ត្រី ត្រូវជួបពិភាក្សាទ្វេភាគីជាមួយលោក ហ្វ្រង់ស្វ័រ ហូឡង់ ប្រធានាធិបតីនៃសាធារណរដ្ឋបារាំងនៅវេលាថ្ងៃត្រង់ ថ្ងៃទី២៦តុលា រួមទាំងអញ្ជើញចូលរួមធ្វើជាសាក្សី ក្នុងពិធីចុះហត្ថលេខាលើឯកសារចំនួន៦ ដែលធ្វើឡើងនៅក្រសួងការបរទេសបារាំងក្នុងថ្ងៃដដែលនោះដែរ ។
ដោយឡែក នៅវេលាម៉ោង៤រសៀលថ្ងៃទី២៥ តុលា សម្តេចតេជោនាយករដ្ឋមន្ត្រីជួបសំណេះសំណាលជាមួយបងប្អូនប្រជាពលរដ្ឋខ្មែរ រួមទាំងនិស្សិតដែលកំពុងសិក្សានៅសាធារណរដ្ឋបារាំងចំនួន៧៧៥នាក់ ។
លោក សម រង្ស៊ី ប្រធានគណបក្សសង្គ្រោះជាតិ ដែលកំពុងមានវត្តមាននៅទីក្រុងលីយ៉ុង ប្រទេសបារាំង បានលើកឡើងតាមរយៈវិឌីអូឃ្លីប ប្រមាណជិត៥នាទីបង្ហោះតាមសង្គមហ្វេសប៊ុក កាលពីថ្ងៃទី២៤ តុលា ដោយបានរំឭកពីសិទ្ធិប្រជាពលរដ្ឋរស់នៅក្រៅប្រទេស ដែលមិនបានបោះឆ្នោត ។ លោកបញ្ជាក់ថា ប្រជាជនខ្មែរមានអ្វីគ្រប់អស់ហើយ ទាំងចំណេះដឹង និងធនធាន រង់ចាំតែឲ្យមានការបោះឆ្នោតត្រឹមត្រូវប៉ុណ្ណោះ ។ ប្រជារាស្ត្រជាអ្នកសម្រេចជោគវាសនាប្រទេសជាតិ ។ ឥឡូវនេះជំហរពលរដ្ឋនៅនាយសមុទ្រ ត្រូវបានគេចាត់ទុកថា មិនមែនជាប្រជារាស្ត្រខ្មែរ ព្រោះគេមិនឲ្យបងប្អូនមានសិទ្ធិបោះឆ្នោតឡើយ ។ លោកថា «ខ្ញុំសោយស្តាយណាស់ដែលគេមិនឲ្យបងប្អូនបោះឆ្នោត រដ្ឋធម្មនុញ្ញបានចែងថា ពលរដ្ឋខ្មែរទាំងអស់មានសិទ្ធិបោះឆ្នោតដូចគ្នា ផ្ទុយទៅវិញបែរជាគេមិនបានឱ្យសិទ្ធិបោះឆ្នោត» ។
លោក សម រង្ស៊ី បានលើកឡើងទៀតថា នៅប្រទេសគេ ទោះបីប្រជាពលរដ្ឋគេរស់នៅប្រទេសទី៣ក្តី ក៏គេមានសិទ្ធិបោះឆ្នោតជ្រើសរើសថ្នាក់ដឹកនាំរបស់គេនៅឯប្រទេសកំណើតដែរ ។ ដូច្នេះ ខ្ញុំសូមជំរុញឱ្យអ្នកគ្រប់គ្រងបងប្អូនខ្មែរនៅបារាំង ធ្វើយ៉ាងណាពិភាក្សាជាមួយថ្នាក់ដឹកនាំប្រទេស ដើម្បីឲ្យពួកគាត់បានបោះឆ្នោត ដូចប្រជាពលរដ្ឋខ្មែរនៅក្នុងស្រុកផង ។
ជាមួយគ្នានោះ លោក សម រង្ស៊ី ក៏បានលើកឡើងពីវត្តមានសម្តេចតេជោ ហ៊ុន សែន នាយករដ្ឋមន្ត្រី នៅទីក្រុងប៉ារីសផងដែរ ដោយលោក សម រង្ស៊ី បញ្ជាក់ថា «បន្តិចទៀត លោក ហ៊ុន សែន នឹងមកដល់ទីក្រុងប៉ារីស ឮថា មានបងប្អូនខ្មែរមួយចំនួនទៅទទួលគាត់។ ដូច្នេះខ្ញុំសូមឱ្យអ្នកនៅបារាំងដែលទៅជួបថ្នាក់ដឹកនាំប្រទេសកម្ពុជានៅ ពេលបានជួបគាត់ គឺសូមជំរុញ និងទាមទារឱ្យគាត់អនុញ្ញាតឱ្យខ្មែរនៅប្រទេសបារាំង និងនៅប្រទេសផ្សេងទៀត មានសិទ្ធិបោះឆ្នោតដូចខ្មែរនៅក្នុងស្រុកផង ។ លោកបានបន្ទោសថា មានអ្នកគាំទ្រខ្លះ នៅពេលថ្នាក់ដឹកនាំទៅដល់ មិនហ៊ានស្នើសុំទេ ដោយមិនដឹងថា ខ្លួននៅបរទេសជាតំណាងឲ្យខ្មែរនៅក្រៅប្រទេសនោះឡើយ ។
គួរបញ្ជាក់ដែរថា សម្តេចតេជោ ហ៊ុន សែន នាយករដ្ឋមន្ត្រី ទៅកាន់ទីក្រុងប៉ារីស ប្រទេសបារាំង ដើម្បីធ្វើទស្សនកិច្ចរយៈ៣ថ្ងៃគឺពីថ្ងៃទី២៥ដល់ថ្ងៃទី២៧ តុលា តាមការអញ្ជើញរបស់ប្រធានាធីបតីបារាំង លោក Francois Hollande ។ អំឡុងទស្សនកិច្ចនេះ សម្តេចមានគម្រោងជួបសំណេះសំណាលជាមួយពលរដ្ឋ និងនិស្សិតខ្មែរចំនួន៧០០នាក់ នៅសាលប្រជុំ Maison de la Chimie នាទីក្រុងប៉ារីស ។ ប៉ុន្តែមុននឹងចេញទៅបំពេញទស្សនកិច្ចនៅបារាំង សម្តេចតេជោ ហ៊ុន សែន បានមានប្រតិកម្មតបនឹងប្រព័ន្ធផ្សព្វផ្សាយមួយដែលផ្សាយថា សម្តេចឱ្យនិស្សិតអាហារូបករណ៍ទាំងអស់នៅប្រទេសបារាំង មកស្តាប់ការថ្លែងសុន្ទរកថា របស់សម្តេចផ្ទាល់ ពេលសម្តេចទៅដល់ក្រុងប៉ារីស ប្រសិនបើមិនមកទេនោះ នឹងផ្តាច់អាហារូបករណ៍ ។
សម្តេចបានស្តីបន្ទោសទៅមេបក្សប្រឆាំងថា «ឈប់ធ្វើទង្វើថោកទាប» ពាក់ព័ន្ធជាមួយនឹងការឃោសនារបស់បក្សប្រឆាំង ដែលថា ឱ្យនិស្សិតអាហារូបករណ៍ទាំងអស់នៅប្រទេសបារាំង មកស្តាប់ការថ្លែងសុន្ទរកថារបស់សម្តេចផ្ទាល់ពេលទៅដល់ទីក្រុងប៉ារីស ប្រសិនបើមិនមកនោះទេនឹងផ្តាច់អាហារូបករណ៍ សម្តេចបានហៅការឃោសនាបែបនេះថាជាទង្វើថោកទាបរបស់គណបក្សប្រឆាំង និងជាការហួសចិត្តរបស់សម្តេច ដែលចេះតែធ្វើទៅរួច របស់បក្សប្រឆាំង ។ ពាក់ព័ន្ធទៅនឹងការចូលរួមស្តាប់ ឬមិនចូលស្តាប់របស់និស្សិត និងបងប្អូនប្រជាពលរដ្ឋនៅប្រទេសបារាំងនោះ គឺស្រេចលើការស្ម័គ្រមិនអាចបង្ខំបានទេ ។
ទាក់ទិននឹងការផ្សាយនោះ ស្ថានទូតខ្មែរប្រចាំប្រទេសបារាំង បានចេញលិខិតមួយ ដោយបដិសេធចំពោះការផ្សាយរបស់វិទ្យុ CMN (Cambodia Media Network) ដែលបានផ្សាយព័ត៌មានមិនពិត ពាក់ព័ន្ធនឹងការដាក់កំហិតចំពោះនិស្សិតនៅបារាំង ឱ្យទៅជួបជាមួយសម្តេចតេជោ ហ៊ុន សែន នៅថ្ងៃទី២៥ តុលា នៅសាលប្រជុំ Maison de la Chimie នាទីក្រុងប៉ារីស។ ការផ្សព្វផ្សាយរបស់វិទ្យុ CMN នោះ បានបញ្ជាក់ថា បើសិនជានិស្សិតអាហារូបករណ៍ណា ដែលមិនបានទៅជួបស្តាប់សុន្ទរកថារបស់សម្តេចតេជោទេនោះ នឹងត្រូវកាត់ផ្តាច់អាហារូបករណ៍។ លិខិតស្ថានទូត បានឱ្យដឹងថា ការជួបសម្តេចតេជោ មិនមានការបង្ខិតបង្ខំនោះទេ គឺធ្វើឡើងដោយការស្ម័គ្រចិត្ត ។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានបដិសេធចំពោះការចោទប្រកាន់គណបក្សខ្លួនថាជាអ្នកញុះញង់ដល់និស្សិតអាហារូបករណ៍ខ្មែរ នៅប្រទេសបារាំងដោយឃោសនាថា រាជរដ្ឋាភិបាលនឹងកាត់ផ្តាច់អាហារូបករណ៍ នៅពេលដែលនិស្សិតណាម្នាក់ មិនចូលស្តាប់ការថ្លែងសុន្ទរកថារបស់សម្តេចនាយករដ្ឋមន្ត្រី ហ៊ុន សែន នៅទីក្រុងប៉ារីស នាថ្ងៃទី២៥ តុលា នោះ ។
វិទ្យុ CMN (Cambodia Media Network) និងបណ្តាញ Facebook មួយចំនួនបានផ្សាយថា រាជរដ្ឋាភិបាលបានដាក់កំហិតដល់ និស្សិតអាហារូបករណ៍ខ្មែរនៅក្រៅប្រទស ដោយតម្រូវឱ្យពួកគេត្រូវតែចូលជួបជាមួយសម្តេចតេជោ ហ៊ុន សែន នៅថ្ងៃទី២៥ តុលា នៅសាលប្រជុំ Maison de la Chimie ទីក្រុងប៉ារីស ។ ប្រភពទាំងនោះបានប្រកាសថា បើនិស្សិតណាម្នាក់មិនមកជួបសម្តេចទេនោះ នឹងត្រូវកាត់ផ្តាច់អាហារូបករណ៍ ។
ភ្លាមៗបន្ទាប់ពីមានការផ្សព្វផ្សាយបែបនេះ ស្ថានទូតខ្មែរប្រចាំនៅប្រទេសបារាំង បានចេញលិខិតបដិសេធថា នេះជាព័ត៌មានបំភ្លៃពីការពិត ហើយថា កម្មវិធីសម្តេចនាយករដ្ឋមន្ត្រី ហ៊ុន សែន ជួបសំណេះសំណាលជាមួយនិស្សិតខ្មែរនៅប្រទេសបារាំង គឺជាការស្ម័គ្រចិត្ត មិនមានការបង្ខិតបង្ខំ ឬត្រូវដកហូតអាហារូបករណ៍នោះឡើយ ។
តាមរយៈវីដេអូខ្លីមួយ ដែលផ្សព្វផ្សាយនៅលើ Facebook កាលពីថ្ងៃទី២៤ ខែតុលា សម្តេចនាយករដ្ឋមន្ត្រី បានហៅការឃោសនានេះថា ជាទង្វើរបស់មេដឹកនាំគណបក្សប្រឆាំង ដែលមានបំណងឃោសនា ដើម្បីបង្ខូចដល់កេរ្តិ៍ឈ្មោះរបស់សម្តេច ។ សម្តេចតេជោ បានចាត់ទុកថា នយោបាយបែបនេះ គឺជាទង្វើថោកទាបបំផុត ។
សម្តេចនាយករដ្ឋមន្ត្រី ហ៊ុន សែន បានលើកឡើងថា ការមកស្តាប់ ឬមិនមកស្តាប់ គឺជាសិទ្ធិរបស់ប្រជាពលរដ្ឋ និងនិស្សិត មិនមានការប៉ះពាល់អ្វីនោះទេ ហើយសម្តេចបានសោកស្តាយចំពោះការឃោសនាបំភ័យដល់និស្សិត និងប្រជាពលរដ្ឋបែបនេះ ។ សម្តេចថា «ជាទម្លាប់តាំងពីដើមរហូតដល់ចប់ ខ្ញុំព្រះករុណាខ្ញុំ មិនដែលបង្ខំនរណាម្នាក់ ឱ្យមកអង្គុយស្តាប់សម្តីខ្ញុំនោះទេ អ្វីដែលខ្ញុំព្រះករុណាសោកស្តាយ នោះនៅត្រង់ថា តើអ្នកនយោបាយកម្ពុជាដល់ពេលណាទៀតទើបបញ្ឈប់នូវទង្វើបោកប្រាស់បែបនេះ ។ ខ្ញុំសូមផ្តាំដល់ប្រជាពលរដ្ឋ និស្សិតនៅប្រទេសបារាំងថា ក្មួយៗចង់អញ្ជើញមកស្តាប់ ឬមិនមកស្តាប់គឺជាសិទ្ធិរបស់ក្មួយៗ គ្មានអ្វីដែលជាការប៉ះពាល់នោះទេ» ។
ឆ្លើយតបចំពោះការលើកឡើងនេះ លោក យ៉ែម បុញ្ញឫទ្ធិ ឱ្យដឹងថា គណបក្សសង្គ្រោះជាតិមិនបានប្រព្រឹត្តដូចការចោទប្រកាន់នោះទេ ។ លោកថា លោកមិនស្គាល់វិទ្យុ CMN ហើយថា ការផ្សព្វផ្សាយលើបណ្តាញសង្គម Facebook ចំពោះរឿងនេះ មិនអាចយកជាការបានទេ ។
លោក យ៉ែម បុញ្ញាប្ញទ្ធិ បានបញ្ជាក់ថា «ទី១-ខ្ញុំអត់ទាន់ទទួលបានព័ត៌មាននេះទេ ទី២-គណបក្សសង្គ្រោះជាតិ អត់ធ្វើទង្វើបែបនេះទេ។ អ្វីដែលប្រមុខរាជរដ្ឋាភិបាល ទៅទស្សនកិច្ចនៅក្រៅប្រទេសជាផ្លូវការ គឺជារឿងមួយដែលល្អ ព្រោះជាទំនាក់ទំនងនយោបាយអន្តរជាតិឱ្យទូលំទូលាយ ដើម្បីឱ្យគេស្គាល់ខ្មែរកាន់តែច្រើន» ។
គួរបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំប្រតិភូជាន់ខ្ពស់ចាកចេញពីកម្ពុជា កាលពីយប់ថ្ងៃទី២៤ តុលា ដើម្បីបំពេញទស្សនកិច្ចរយៈ៣ថ្ងៃ នៅប្រទេសបាំង ពីថ្ងៃទី២៥ដល់ថ្ងៃទី២៧ តុលា តាមការអញ្ជើញរបស់ប្រធានាធីបតីបារាំង លោក Francois Hollande ។ អំឡុងពេលទស្សនកិច្ចនេះ សម្តេចមានគម្រោងជួបសំណេះសំណាលជាមួយប្រជាពលរដ្ឋ និងនិស្សិតខ្មែរ ៧០០នាក់ នៅសាលប្រជុំ Maison de la Chimie នាទីក្រុងប៉ារីស ប្រទេសបារាំង ៕
ចែករំលែកព័តមាននេះ