រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានឲ្យម្ចាស់សហគ្រាសកុំយកករណីបានចាក់វ៉ាកសាំងទើបឲ្យចូលបំរើការងារវិញនោះទេ ។
ការលើកឡើងរបស់សម្តេចតេជោ ហ៊ុនសែន បន្ទាប់ពីទទួលបានព័ត៌មានថា មានករណីថា មានកម្មករមួយចំនួនបានធ្វើលិខិតពីឃុំសង្កាត់បញ្ជាក់ពីការចាក់វ៉ាក់សាំងទើបម្ចាស់សហគ្រាសអនុញ្ញាតឲ្យចូលធ្វើការវិញ ។
យោងតាមសារសម្លេងរបស់សម្តេចតេជោ នៅថ្ងៃទី៨ ខែឧសភា ឆ្នាំ២០២១ សម្តេចបញ្ជាក់ថា ៖«ដោយសារតែមានរោងចក្រខ្លះនិយាយថា កម្មករមិនទាន់បានចាក់វ៉ាក់សាំង គឺមិនអនុញ្ញាតឲ្យចូលធ្វើការងារ ។ បើសិនករណីនេះជារឿងពិត គឺវាជាកំហុសមួយរបស់ថៅកែរោងចក្រដែលសុំឲ្យក្រសួងការងារធ្វើការត្រួតពិនិត្យឡើងវិញ ហើយអាជ្ញាធរមូលដ្ឋានក៏ត្រួតពិនិត្យរឿងនេះឡើងវិញ។
យើងមិនទាន់អនុវត្តបានចំណុចនេះនូវដោយយកចាក់វ៉ាក់សាំងនូវការធ្វើដំណើរ ការកាត់បន្ថយ ការធ្វើចត្តាឡីស័ក ដើម្បីការធ្វើការងារនោះទេ» ។ សម្តេចបន្តថា ការកំណត់បែបនេះ មិនត្រូវនោះទេ ពីព្រោះថា នៅកន្លែងមិនទាន់បានចាក់ផង នៅដូសទី១ ហើយដូសទី២ ក៏មិនទាន់បាន ដូច្នេះប្រសិទ្ធភាពមិនទាន់ទប់ទល់នឹងជំងឺបាននោះទេ ។
ដូច្នេះទោះបីទទួលបានវ៉ាក់សាំងក៏វិធានការការពារខ្លួនពីកូវីដ១៩ «៣កុំ ៣ការពារ» មិនត្រូវបានលើកលែងជាដាច់ខាត ទោះបីជាចាក់វ៉ាក់សាំងរួចហើយក៏ដោយ ។ សម្តេចបន្ថែមមកដល់ពេលនេះកម្ពុជាមិនទាន់ឈានដល់លើកលែងវិធានការ«៣កុំ ៣ការពារ»ទោះបីជាបានចាក់ប៉ាក់សាំងក៏ដោយ ។
តាមអ្វីដែលខ្ញុំទទួលបានព័ត៌មានវេជ្ជបណ្ឌិត ខ្លះមានការធ្វេសប្រហែសពីការចាក់វ៉ាក់សាំងបណ្តាលឲ្យស្លាប់ខ្លួនក៏មាន ។ សម្តេចក៏បានគូសបញ្ជាក់ថា«ការប្រើប្រាស់វ៉ាក់សាំង ដើម្បីទទួលបានការងារ គឺមានភាពអយុត្តិធម៌ចំពោះអ្នកដែលមិនទាន់ទទួលបានវ៉ាក់សាំង ។ នេះ គឺខ្ញុំសូមបញ្ជាក់ប្រទេសយើងទើបចាក់បាន១៦ភាគរយនៃចំនួនអ្នកត្រូវចាក់១០លាន ប៉ុន្តែបើចាក់១៣លាននោះទើបបាន តែ១០ភាគរយ ។ ដូច្នេះមិនទាន់អាចយកបញ្ហាចាក់វ៉ាក់សាំងធ្វើជាមូលដ្ឋានដើម្បីនឹងរក្សាបានការងារធ្វើ» ។ សម្តេចលើកឡើងថា កន្លងមកសម្តេចបានចេញអនុក្រឹត្យពីកាតព្វកិច្ចទទួលវ៉ាក់សាំង ប៉ុន្តែសម្រាប់ប្រជាពលរដ្ឋមិនទាន់ទេ តែថ្ងៃក្រោយអាចនឹងមាន ៕
ចែករំលែកព័តមាននេះ