ខេត្តសៀមរាប ៖ ភ្លៀងមួយមេធំលាយឡំខ្យល់ និងរន្ទះបាញ់ បានឆក់យកជីវិតមនុស្សក្មេងចាស់ចំនួន៣នាក់ នៅទីតាំងផ្សេងគ្នា ក្នុងភូមិសាស្ត្រសូទ្រនិគម ខេត្តសៀមរាប ខណៈហេតុការណ៍នេះបានកើតឡើងកាលពីយប់ថ្ងៃទី៦ ខែឧសភា ឆ្នាំ២០២១ ស្ថិតនៅក្នុងភូមិសាស្ត្រស្រុកសូទ្រនិគម ខេត្តសៀមរាប។
បើតាមប្រភពពីសមត្ថកិច្ចនគរបាលស្រុកសូទ្រនិគមបានប្រាប់នៅរសៀលថ្ងៃទី៧ ខែឧសភា ឆ្នាំ២០២១ នេះថា ករណីទី១-កាលពីយប់ថ្ងៃទី៦ ខែឧសភា ឆ្នាំ២០២១ ស្ថិតនៅចំណុចភូមិសំរោង ឃុំខ្នាពោធិ៍ ស្រុកសូទ្រនិគម ខេត្តសៀមរាប មានករណីរន្ទះបាញ់ បណ្ដាលឱ្យមនុស្សស្លា.ប់ចំនួន២នាក់ ក្នុងនោះម្នាក់ឈ្មោះពុធ ធ ភេទប្រុស អាយុ៣៧ឆ្នាំ នៅភូមិគោកចាន់ ឃុំដានរុន ស្រុកសូទ្រនិគម ខេត្តសៀមរាប និងម្នាក់ទៀត ឈ្មោះពុធ ថាន់ ភេទប្រុស អាយុ៣៣ឆ្នាំ នៅភូមិគោកចាន់ ឃុំដានរុន ស្រុកសូទ្រនិគម ខេត្តសៀមរាប (ជនរងគ្រោះទាំង២នាក់ត្រូវជាបងប្អូនបង្កើត)។
តាមប្រភពដដែលបានឱ្យដឹងបន្តថា ខណៈជនរងគ្រោះទាំង២នាក់ និងគ្រួសារ ទៅភ្ជួរដីដាំដំឡូង នៅចំការស្ថិតនៅភូមិឃុំកើតហេតុខាងលើ ក៏ស្រាប់តែមានភ្លៀង ខ្យល់ និងរន្ទះបាញ់ បណ្តាលឱ្យបាត់បង់ជីវិតទាំង២នាក់តែម្តង។
តាមប្រភពដដែលបានបន្តទៀតថា ករណីទី២-កាលពីវេលាម៉ោង៩យប់ថ្ងៃទី៦ ខែឧសភា ឆ្នាំ២០២១ នៅចំណុចវាលស្រែអូដាច់ពោះ ខាងជើង ឆៀងខាងកើត ស្ថិតក្នុងភូមិក្រៀលពង ឃុំពពេល ស្រុកសូទ្រនិគម ខេត្តសៀមរាប មានករណីខ្យល់កន្ត្រាក់ បណ្ដាលឱ្យរលំដើមស្នួល សង្កត់ខ្ទមស្រែ និងមនុស្ស បណ្តាលឱ្យបាត់បង់ជីវិតតែម្តង ។
ជនរងគ្រោះឈ្មោះដា វណ្ណា ភេទប្រុស អាយុ១៥ឆ្នាំ នៅ ភូមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប។
បច្ចុប្បន្នជនរងគ្រោះទាំង៣នាក់ ត្រូវបានកម្លាំងនគរបាលជំនាញប្រគល់ជូនក្រុមគ្រួសារយកទៅធ្វើបុណ្យតាមប្រពៃណីរួចរាល់ហើយ៕
ចែករំលែកព័តមាននេះ