ខេត្តបន្ទាយមានជ័យ ៖ បើតាមសេចក្តីរាយការាណ៍បានឱ្យដឹងថា រថយន្ត២គ្រឿង និងអ្នកបើកបរ២នាក់ ដែលដឹកពលករបម្រុងឆ្លងទៅថៃចំនួន១៦នាក់ ត្រូវបានឃាត់ជាប់នៅតាមបន្ទាត់ព្រំដែន កាលពីវេលាម៉ោង៣និង២៥នាទី ថ្ងៃទី០៦ ខែឧសភា…
ខេត្តបន្ទាយមានជ័យ ៖ បើតាមសេចក្តីរាយការាណ៍បានឱ្យដឹងថា រថយន្ត២គ្រឿង និងអ្នកបើកបរ២នាក់ ដែលដឹកពលករបម្រុងឆ្លងទៅថៃចំនួន១៦នាក់ ត្រូវបានឃាត់ជាប់នៅតាមបន្ទាត់ព្រំដែន កាលពីវេលាម៉ោង៣និង២៥នាទី ថ្ងៃទី០៦ ខែឧសភា ឆ្នាំ២០២១ នៅចំណុចចំការស្វាយចន្ទី ភូមិសាស្ត្រស្រុកស្វាយចេក។
លោកវរសេនីយ៍ឯក ជា ឈ្លូញ អធិការនគរបាលស្រុកស្វាយចេក បានប្រាប់ឱ្យដឹងថា ជាការណែនាំពីឯកឧត្តម អ៊ុ រាត្រី អភិបាលខេត្តបន្ទាយមានជ័យ និងវិធានការពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត ដើម្បីទប់ស្កាត់ពលករចំណាក់ស្រុកដោយខុសច្បាប់ ដែលលួចឆ្លងដែនទៅប្រទេសជិតខាងដោយខុសច្បាប់ និងពង្រឹងបង្ការទប់ស្កាត់កូវីដ១៩ នោះ កម្លាំងអធិការដ្ឋាននគរបាលស្រុកស្វាយចេក បានសហការជាមួយកម្លាំងឈរជើងតាមបន្ទាត់ព្រំដែន ហើយក៏បានឃាត់រថយន្ត២គ្រឿង និងអ្នកបើកបរ២នាក់ ព្រមទាំងពលករចំនួន១៦នាក់ ក្នុងនោះមានក្មេងប្រុស-ស្រី៣នាក់ផងដែរ។
លោកបានបញ្ជាក់ថា តាមការសាកសួរ ពលករចំនួន១៦នាក់ខាងលើនេះ គឺមកពីខេត្តកំពង់ចាមចំនួន៥នាក់ ខេត្តបាត់ដំបងចំនួន១០នាក់ និងខេត្តបន្ទាយមានជ័យម្នាក់ ដែលត្រូវបានរថយន្ត២គ្រឿងដឹកមកដាក់ព្រំដែន រួចមានមេខ្យលនឹងនាំឆ្លងដែនទៅរកការងារធ្វើ ដោយយកម្នាក់ៗតំលៃ៥.០០០បាត ដើម្បីជូនដល់កន្លែងធ្វើការងារនៅប្រទេសថៃ តែក៏ត្រូវសមត្ថកិច្ចចាប់បានតែម្តង។
លោកវរសេនីយ៍ឯក ជា ឈ្លូញ បានបញ្ជាក់ថា ក្រោយពេលឃាត់រថយន្ត២គ្រឿងដែលដឹកពលករខាងលើនេះ គឺ១គ្រឿងម៉ាកស្តារីច ពាក់ស្លាកលេខ 2B.5662 និង១គ្រឿងទៀតម៉ាកកាមរី ដែលពាក់ស្លាកលេខ 2B.1130 និងម្ចាស់ជាអ្នកបើកបរចំនួន២នាក់ ត្រូវបានកសាងសំណុំរឿង រួចបញ្ជូនបន្តទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការតាមច្បាប់ ចំណែកឯពលករចំនួន១៦នាក់វិញ ត្រូវបានឱ្យធ្វើកិច្ចសន្យាណែនាំ ហើយបញ្ជូនទៅធ្វើចត្តាឡីស័ករយៈពេល១៤ថ្ងៃ៕
ចែករំលែកព័តមាននេះ