វៀតណាម ៖ ស្របពេលដែលកំពុងប្រយុទ្ធប្រឆាំងនឹងការឆ្លងកូវីដ១៩ ក្នុងសហគមន៍ដែលត្រូវបានរកឃើញលើកដំបូងកាលពីសប្តាហ៍មុន។ ប្រទេសវៀតណាម កាលពីថ្ងៃទី៥ ខែឧសភា បានសម្រេចបន្ថែមរយៈពេលធ្វើចត្តាឡីស័កដល់ ២១ថ្ងៃជាផ្លូវការ។ នេះបើតាមការចេញផ្សាយពី…
វៀតណាម ៖ ស្របពេលដែលកំពុងប្រយុទ្ធប្រឆាំងនឹងការឆ្លងកូវីដ១៩ ក្នុងសហគមន៍ដែលត្រូវបានរកឃើញលើកដំបូងកាលពីសប្តាហ៍មុន។ ប្រទេសវៀតណាម កាលពីថ្ងៃទី៥ ខែឧសភា បានសម្រេចបន្ថែមរយៈពេលធ្វើចត្តាឡីស័កដល់ ២១ថ្ងៃជាផ្លូវការ។ នេះបើតាមការចេញផ្សាយពី Vietnam News។
រដ្ឋមន្ត្រីក្រសួងសុខាភិបាល លោក Nguyen Thanh Long បានចេញមកប្រកាសកាលពីថ្ងៃទី៥ ខែឧសភា ថា ការសម្រេចចិត្តនេះ ត្រូវបានធ្វើឡើង បន្ទាប់ពីបានពិគ្រោះយោបល់ជាមួយអ្នកជំនាញខាងរោគរាតត្បាត និងអ្នកជំនាញខាងរោគវិទូ។ ដើម្បីឱ្យអ្នកជំនាញសិក្សាកាន់តែច្បាស់ពីការវិវត្តន៍នៃវីរុសកូវីដបំប្លែងថ្មី ជាពិសេសអំពីពេលវេលានៃការបង្ករោគរបស់វា។
លោកបានបន្ថែមថា ពិធីសារថ្មីនេះ មានគោលបំណងដើម្បីការពារសហគមន៍ជៀសឆ្ងាយពីការឆ្លងរីករាលដាល។ ចំពេលដែលមានករណីថ្មីៗមួយចំនួន ត្រូវបានរកឃើញថា បានបញ្ចប់ការធ្វើចត្តាឡីស័ករយៈពេល ១៤ថ្ងៃរួចរាល់ ប៉ុន្តែបែរវិជ្ជមានវីរុសនេះ នៅពេលក្រោយទៅវិញ។
លោករដ្ឋមន្ត្រីក៏បានស្នើគ្រប់មូលដ្ឋានទាំងអស់ត្រូវពិនិត្យករណីជនបរទេស ដែលទើបនឹងចូលប្រទេសវៀតណាម និងត្រូវធ្វើតេស្តលើក្រុមមនុស្ស ដែលមានហានិភ័យខ្ពស់ដូចជា និយោជក, តំបន់ឌីស្កូបារ, ហាងខារ៉ាអូខេ និងកន្លែងម៉ាស្សាជាដើម។
យោងតាមទិន្នន័យពីក្រសួងសុខាភិបាលវៀតណាម គិតត្រឹមព្រឹកថ្ងៃទី៦ ខែឧសភា នេះ បានបង្ហាញតួលេខសរុបសម្រាប់អ្នកឆ្លងកូវីដ១៩ មានចំនួន ៣,០៣០នាក់។ ខណៈដែលអ្នកស្លា.ប់សរុបមានចំនួន ៣៥នាក់។ ដោយឡែកអ្នកដែលជាសះស្បើយមានចំនួន ២,៥៦០នាក់៕ (ដកស្រង់ចេញពី Tuoi Tre News)
ចែករំលែកព័តមាននេះ