ខេត្តកំពង់ឆ្នាំង ៖ បុរសម្នាក់បានរួចផុតពីគ្រោះថ្នាក់ដល់ជីវិត បន្ទាប់ពីត្រូវក្របីរបស់គាត់វធ័ក្នុងទឹកទន្លេ ខណៈពេលគាត់កំពុងហែលចម្លងហ្វូងក្របីរបស់គាត់ពីត្រើយម្ខាងយកមកផ្ទះវិញ ។
ហេតុការណ៍ខាងលើនេះបានកើតឡើងកាលពីរសៀលថ្ងៃទី5 ខែ ឧសភា ឆ្នាំ2021 នៅតាមដងទន្លេធំ ចំណុចតាកឹង ស្ថិតនៅក្នុងភូមិថ្នល់ឈើទាល ឃុំផ្លូវទូក ស្រុកកំពង់លែង ខេត្តកំពង់ឆ្នាំង។
លោក ឈុំ សាំ ជំទប់ទី១ ឃុំខុនរង ស្រុកបរិបូណ៌ ក្នុងពេលនាំក្រុមការងារឃុំ ដែលបានអញ្ជើញចុះសាកសួរសុខទុក្ខជនរងគ្រោះនៅមណ្ឌលសុខភាពស្រុកបរិបូណ៌ កាលពីយប់ថ្ងៃទី5 ខែឧសភា បានប្រាប់កោះសន្តិភាពតាមទូរស័ព្ទឱ្យដឹងថា បុរសរងគ្រោះឈ្មោះ ប៉ុល សុខ អាយុ53ឆ្នាំ ជាអនុប្រធានប្រជាការពារ រស់នៅភូមិល្បើក ឃុំខុនរ៉ង ស្រុកបរិបូណ៌ ខេត្តកំពង់ឆ្នាំង។
លោកបានរៀបរាប់បន្តថា ជារៀងរាល់រដូវប្រាំង ប្រជាពលរដ្ឋក្នុងឃុំខុនរ៉ង តែងចម្លងក្របីទៅដាក់ទីទួល និងជួលឲ្យគេឃ្វាលមួយរដូវប្រាំង នៅលើកោះមួយកន្លែង ក្នុងភូមិសាស្ត្រស្រុកកំពង់លែង ហើយរហូតដល់រដូវវស្សាទើបទៅចម្លងយកមកវិញ ។ នៅថ្ងៃកើតហេតុជនរងគ្រោះ រួមជាមួយប្រជាពលរដ្ឋជាច្រើននាក់ទៀត បានទៅចម្លងយកក្របីត្រឡប់មកផ្ទះវិញដូចសព្វដង ។ ប៉ុន្តែចៃដន្យអាក្រក់ ខណៈជនរងគ្រោះកំពុងតែហែលចម្លងក្របីឆ្លងទន្លេមកវិញ ក៏ស្រាប់តែទាក់នឹងព័ន្ឋខ្សែក្របីជាប់ជើងហើយរមូរទៅជាប់នឹងក្របី គ្រាដែលទឹកទន្លេកំពុងតែហូរខ្លាំង ក៏ត្រូវក្របីវ័ធ ដើម្បីរំដោះខ្លួនវា បណ្ដាលឱ្យជនរងគ្រោះរបួសជាច្រើនកន្លែង នៅកណ្ដាលទន្លេដែលទឹកកំពុងហូរ ។
លោកបានរៀបរាប់បន្តទៀតថា ខណៈនោះកូនប្រុសរបស់ជនរងគ្រោះឈ្មោះ ប៉ុល គង់ អាយុ25ឆ្នាំ ដែលជិះកាណូតដឹកក្រុមមនុស្សដែលទៅចម្លងក្របីដែរនោះ បានឃើញទាន់ ក៏បើកកាណូតទៅជួយ និងបានកាត់ខ្សែដែលជាប់បុរសជាឪពុកចេញពីសត្វក្របី ទើបរួចខ្លួន ហើយបានស្រង់ជនរងគ្រោះដាក់លើកាណូត និងបញ្ជូនទៅសង្គ្រោះនៅមណ្ឌលសុខភាព ។
លោកជំទប់ទី១ឃុំ ខុនរ៉ង បានបញ្ជាក់ថា ជនរងគ្រោះបានរងរបួសធ្ងន់ ព្រោះមុតនឹងស្នែងក្របីជាច្រើនកន្លែង ហើយបើគ្មានការជួយសង្គ្រោះទាន់ពេលវេលាទេ ជនរងគ្រោះច្បាស់ជានឹងត្រូវស្លា.ប់ដោយឈ្លក់ទឹកជាមួយនឹងក្របីជាពុំខាន ៕
ចែករំលែកព័តមាននេះ