ខេត្តរតនគិរី ៖ ផ្សិតឫស្សីឬផ្សិតពស់វែក និងអ្នកខ្លះទៀតហៅថាផ្សិតលីងជឺ កំពុងមានហាងឆេងសម្បើមណាស់ ដោយសារមានឈ្មួញកណ្តាលជាជនជាតិវៀតណាមដើរប្រមូលទិញនិងហ៊ានទិញថ្លៃក្នុង១គីទ្បូក្រាមចាប់ពី ៧០ ០០០រៀល ទៅ១០ម៉ឺនរៀល ។
យោងតាមបុរសជនជាតិដើមភាគតិចទំពួនមួយរូប រស់នៅភូមិទុសច្រិច បានឱ្យដឹងថា ផ្សិតឫស្សីឬផ្សិតពស់វែកនេះ ដុះនៅនឹងដើមឫស្សីដែលងាប់ពុកត្រូវទឹក និងច្រើនដុះនៅរដូវវស្សា។ ពេលផ្សិតនោះដុះហើយ ប្រជាពលរដ្ឋនៅក្នុងភូមិមួយចំនួន តែងនាំគ្នាចូលព្រៃដើម្បីទៅដកផ្សិតនេះយកមកហាលថ្ងៃឱ្យស្ងួតយកមកលក់ឱ្យឈ្មួញកណ្តាលនៅក្រុងបានលុង ដែលមានតម្លៃចាប់ពី ៧០ ០០០រៀល ទៅ១០ម៉ឺនរៀល ក្នុង១គីទ្បូក្រាម ។ ឈ្មួញកណ្តាលនោះភាគច្រើនជាជនជាតិវៀតណាម ដែលទិញយកទៅប្រទេសរបស់គេ ដើម្បីលក់បន្តទៅប្រទេសចិនទៀត ។
ប្រភពដដែលបន្តថា ចំណែកឯគុណភាពមានការនិយាយតៗគ្នាពីមាត់មួយទៅមាត់មួយថា ជាផ្សិតដែលព្យាបាលឬប៉ូវក្រលៀន ប៉ុន្តែមិនមានវេជ្ជបណ្ឌិតណាអះអាងពីការរកឃើញថា ជាឱសថសម្រាប់ព្យាបាលរោគខាងលើដូចការនិយាយតៗគ្នាពីមាត់មួយទៅមាត់មួយនោះទ។ បើផ្អែកទៅលើភាសាចិនដែលគេឱ្យឈ្មោះថា លីងជឺ ក៏មានការផ្សព្វផ្សាយពាណិជ្ជកម្មតាមវិទ្យុមួយចំនួន អួតពីប្រសិទ្ធភាពនៃផ្សិតលីងជឺនេះ ដែរ ដែលតាមពិតគឺផ្សិតឫស្សីនេះឯង ។ ស្ត្រីជនជាតិវៀតណាមជាឈ្មួញកណ្តាលម្នាក់ និយាយថា ចំពោះការប្រមូលទិញផ្សិតឫស្សីហៅផ្សិតពស់វែក ឬផ្សិតលីងជឺនេះ មានហាងឆេងមកពីប្រទេសចិន ដែលមានតម្លៃខ្ពស់ ។
គួរបញ្ជាក់ថា ផ្សិតឫស្សី ឬផ្សិតពស់វែក ឬផ្សិតលីងជឺខ្មែរនេះ ត្រូវបានប្រជាពលរដ្ឋរស់នៅតាមស្រុកមួយចំនួន នាំគ្នាសម្រុកចូលព្រៃដើម្បីដកផ្សិតក្នុង១ថ្ងៃៗបានពី៤ទៅ៥គីទ្បូក្រាមក្នុងម្នាក់ៗ យកមកហាលឱ្យស្ងួត រួចលក់ឱ្យទៅឈ្មួញកណ្តាលរកកម្រៃចិញ្ចឹមគ្រួសាររបស់ពួកគាត់ ។
នៅកម្ពុជាបច្ចុប្បន្ន ធនធានធម្មជាតិជាច្រើនកំពុងមានហាងឆេងខ្ពស់ ហើយទាំងឈើព្រៃ ត្រីសាច់ និងរ៉ែក្នុងដី លើគោក ក្នុងទឹក ក៏កំពុងត្រូវបានបំផ្លាញព្រោះតែប្រយោជន៍ផ្ទាល់ខ្លួន ។ បច្ចុប្បន្ននេះទៀត កំពុងត្រូវប៉ាន់ផ្សិតឫស្សី តែក៏មានប្រភពព័ត៌មានបង្ហើបទៀតថា នៅថ្ងៃខាងមុខឈ្មួញវៀតណាមត្រៀមប្រមូលទិញដើមផ្កាអ៊័រគីដេព្រៃបន្តទៀត ៕
ចែករំលែកព័តមាននេះ