ខេត្តមណ្ឌលគិរី ៖ «នៅពេលមានបុណ្យទានម្តងៗ សូមឲ្យម្ចាស់សណ្ឋាគារ និងរមណីយដ្ឋានរក្សាតម្លៃសេវាឱ្យនៅថេរ ជៀសវាងកុំឲ្យភ្ញៀវទេសចរមកទស្សនាក្នុងខេត្តមណ្ឌលគិរីមានការត្អូញត្អែរទៅលើសេវាផ្សេងៗដែលជាហេតុធ្វើឲ្យបាត់បង់ភ្ញៀវទេសចរជាតិ-អន្តរជាតិ»។
នេះជាការលើកឡើងរបស់លោក អេង ប៊ុនហ៊ាង អភិបាលខេត្តមណ្ឌលគិរីក្នុងពិធីទិវាទេសចរណ៍ពិភពលោកឆ្នាំ២០១៥ ថ្ងៃទី២៧ កញ្ញា ២០១៥ ក្រោមប្រធាន
បទ «មួយពាន់លានទេសចរ មួយពាន់លានកាលានុវត្តភាព» ដែលបានប្រារព្វធ្វើឡើងនៅរមណីយដ្ឋានទឹកជ្រោះប៊ូស្រា ស្ថិតនៅឃុំប៊ូស្រាស្រុកពេជ្រាដា កាលពីព្រឹកថ្ងៃទី២០ តុលា ដោយមានការចូលរួមពីក្រុមហ៊ុន
Mondul k.Resort Co,.Ltd ដែលជាម្ចាស់សណ្ឋាគារ និងរមណីយដ្ឋាន មយ៉ូរ៉ា និងរមណីយដ្ឋាន ឧទ្យានធម្មជាតិទឹកជ្រោះប៊ូស្រានេះផ្ទាល់តែម្តង។
តាមការបញ្ជាក់របស់លោក ងិន សុវិមាន ប្រធានមន្ទីរទេសចរណ៍ខេត្ត បានឲ្យដឹងថា ទិវាទេសចរណ៍ពិភពលោក គឺជាព្រឹត្តិការណ៍ដ៏សំខាន់ដែលនឹងជម្រុញឲ្យភាគីពាក់ព័ន្ធនានា កាន់តែយល់ច្បាស់អំពីតួនាទី និងអត្ថប្រយោជន៍នៃវិស័យទេសចរណ៍ក្នុងការអភិវឌ្ឍសេដ្ឋកិច្ច និងសង្គមកិច្ច ព្រមទាំងចូលរួមចំណែកយ៉ាងសំខាន់ក្នុងការអភិរក្សសម្បត្តិវប្បធម៌ ការការពារបរិស្ថាន និងធនធានធម្មជាតិ និងការកាត់បន្ថយភាពក្រីក្ររបស់ប្រជាពលរដ្ឋ ម្យ៉ាងវិញទៀត ដោយខេត្តមណ្ឌលគិរីមានអាកាសធាតុល្អ បរិសុទ្ធ និងទិដ្ឋភាពដ៏ស្រស់បំព្រងទៀតផង។
នាឱកាសនោះ លោក អេង ប៊ុនហ៊ាង អភិបាលខេត្ត បានមានប្រសាសន៍ថា តំបន់ទេសចរណ៍ទឹកជ្រោះប៊ូស្រា ជាកន្លែងទេសចរណ៍មួយដែលមានភាពល្បីល្បាញជាងគេក្នុងខេត្ត ហើយបានជាប់ចំណាត់ថ្នាក់ក្នុងការវាយតំលៃពីក្រសួងទេសចរណ៍ផងដែរ៕
ព័ត៌មានលម្អិតនឹងផ្សាយជូនលើទំព័រកាសែតកោះសន្តិភាព
ចែករំលែកព័តមាននេះ