រាជធានីភ្នំពេញ ៖ បុរសម្នាក់បានបើកបររថយន្តដឹកកុងតឺន័រ១គ្រឿងបុកទម្លាយបារ៉ាស់គោលដៅល្មើសបិទខ្ទប់រាជធានីភ្នំពេញដើម្បីប្រយុទ្ធ និងជម្ងឺឆ្លង COVID-19 រួចបានបើកចូលទៅក្នុងផែស្ងួតអ៊ុយញ៉ុង ។
ភ្លាមៗនោះត្រូវបានកម្លាំងនគរបាលដែលកំពុងឈរជើងនៅគោលដៅខាងលើដេញតាមឃាត់ ស្រាប់តែអ្នកបើកបររថយន្តរូបនេះប្រើកណ្ដាប់ដៃដាល់ទៅលើមន្ត្រីនគរបាលម្នាក់ បណ្ដាលឲ្យរងរបួសពកមុខ និងរបួសដៃ ។
ខណៈនោះ នគរបាលបានបញ្ជូនកម្លាំងទៅបន្ថែមទើបចាប់ខ្លួនតៃកុងរថយន្តកម្រោលរូបនេះបាន រួចនាំទៅសាកសួរ និងកសាងសំណុំរឿង ដើម្បីបញ្ជូនទៅកាន់សាលាដំបូងរាជធានីភ្នំពេញចាត់ការតាមផ្លូវច្បាប់ ដែលហេតុការណ៍នោះបានកើតឡើង កាលពីវេលាម៉ោងជាង៤ល្ងាច ថ្ងៃទី៣០ ខែមេសា ឆ្នាំ២០២១ នៅតាមមហាវិថីឈ្នះឈ្នះ ស្ថិតនៅក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ជនដៃដល់ឈ្មោះ ឈួន ពុទ្ធា អាយុប្រហែល៣០ឆ្នាំ មុខរបរបើកបររថយន្តកុងតឺន័រ ចំណែកជនរងគ្រោះឈ្មោះ សាន សុម៉ាណាត់ អាយុជាង២០ឆ្នាំ ជាមន្ត្រីនគរបាលប៉ុស្តិ៍សំរោងក្រោមនៃអធិការដ្ឋានខណ្ឌពោធិ៍សែនជ័យ ។
នគរបាលបានឲ្យដឹងថា ដោយអនុវត្តតាមវិធានការបិទខ្ទប់រាជធានីភ្នំពេញរបស់រាជរដ្ឋាភិបាល ដើម្បីប្រយុទ្ធប្រឆាំង និងទប់ស្កាត់ការឆ្លងរីករាលដាលជម្ងឺCOVID-19 កម្លាំងនគរបាលនៃអធិការដ្ឋានខណ្ឌពោធិ៍សែនជ័យ បានដាក់កម្លាំងឈរជើងនៅតាមមហាវិថីឈ្នះឈ្នះ ត្រង់ចំណុចភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ហាមឃាត់មិនឲ្យមានការធ្វើដំណើរឆ្លងកាត់គោលដៅនេះឡើយ ។
ដោយឡែកនៅថ្ងៃកើតហេតុ ស្រាប់តែជនដៃដល់ឈ្មោះឈួន ពុទ្ធា បានបើកបររថយន្តមួយគ្រឿងម៉ាក Nissan ពណ៌ខៀវ ពាក់ស្លាកលេខភ្នំពេញ 3A-8709 មានសណ្ដោងទូរកុងតឺន័រ បុកទម្លាយបារ៉ាស់បំពានវិធានការបិទខ្ទប់ល្មើសនឹងបម្រាមគោចរ ។
ប្រភពដដែលបានបន្តទៀតថា ភ្លាមៗនោះ ជនដៃដល់បានបើករថយន្តរត់ចូលទៅក្នុងផែស្ងួតអ៊ុយញ៉ុង ដែលស្ថិតនៅចម្ងាយប្រមាណ២០០ម៉ែត្រ ពីគោលដៅកើតហេតុ ហើយមន្ត្រីនគរបាលខាងលើបានដេញតាម ស្រាប់តែជននេះបានប្រើកណ្ដាប់ដៃដាល់ទៅលើមន្ត្រីនគរបាលបណ្ដាលឲ្យរងរបួស ។
ខណៈនោះនគរបាលបានបន្ថែមកម្លាំងទើបចាប់ខ្លួនជននេះបាននាំយកទៅសួរនាំ និងកសាងសំណុំរឿងហើយបានបញ្ជូនទៅកាន់សាលាដំបូងរាជធានីភ្នំពេញ កាលពីថ្ងៃទី១ ខែឧសភា ឆ្នាំ២០២១ ដើម្បីចាត់ការតាមច្បាប់៕
ចែករំលែកព័តមាននេះ