ខេត្តកំពង់ឆ្នាំង ៖ មន្ត្រីនៃមណ្ឌលសុខភាពស្រុក សហការជាមួយអាជ្ញាធរស្រុក និងផ្នែករដ្ឋបាលព្រៃឈើ កំពង់ត្រឡាច នៅព្រឹកថ្ងៃទី២៩ ខែមេសា ឆ្នាំ២០២១ បានសហការគ្នា…
ខេត្តកំពង់ឆ្នាំង ៖ មន្ត្រីនៃមណ្ឌលសុខភាពស្រុក សហការជាមួយអាជ្ញាធរស្រុក និងផ្នែករដ្ឋបាលព្រៃឈើ កំពង់ត្រឡាច នៅព្រឹកថ្ងៃទី២៩ ខែមេសា ឆ្នាំ២០២១ បានសហការគ្នា ធ្វើការបាញ់ថ្នាំសម្លា.ប់មេរោគក្នុងបរិវេណផ្សារសាលាលេខប្រាំ ស្រុកកំពង់ត្រឡាច ដែលកំពុងបិទជាបណ្ដោះអាសន្ន បន្ទាប់ពីរកឃើញស្ត្រីជាអាជីវករលក់មាសចំនួន៤នាក់មានវិជ្ជមានកូវីដ១៩។
លោក ស៊ន សំអាត អភិបាលរងស្រុកកំពង់ត្រឡាច បានបញ្ជាក់តាមទូរស័ព្ទថា ដោយយោងតាមការ ណែនាំរបស់ឯកឧត្តមអភិបាលខេត្តកំពង់ឆ្នាំង ស្ដីពីការទប់ស្កាត់ការរីករាលដាលនៃជំងឺកូវីដ១៩ អាជ្ញាធរស្រុកកំពង់ត្រឡាច បានសហការជាមួយមន្ត្រីនៃមណ្ឌលសុខភាពស្រុក ដោយមានការចូលរួមពីមន្ត្រីរដ្ឋបាលព្រៃឈើកំពង់ត្រឡាចផង បានធ្វើការបាញ់ថ្នាំសម្លា.ប់មេរោគក្នុងបរិវេណនៅជុំវិញផ្សារសាលាលេខ5 ដែលកំពុងបិទជាបណ្ដោះអាសន្នរយៈពេល១៤ថ្ងៃ ។
លោកបានបញ្ជាក់ថា ខាងផ្នែករដ្ឋបាលព្រៃឈើ កំពង់ត្រឡាច ដែលមានលោកឯម វិចិត្រ បានយករថយន្តសម្រាប់ពន្លត់ភ្លើងព្រៃ ដែលមានចំណុះទឹក១០០០លីត្រ មកលាយថ្នាំសម្លា.ប់មេរោគ រួចបើកបាញ់ថ្នាំជុំវិញបរិវេណផ្សារ ចំណែកមន្ត្រីសុខាភិបាល បានចូលបាញ់ថ្នាំការពារពីខាងក្នុងផ្សារ ដើម្បីធានា សុវត្ថិភាពទាំងខាងក្នុង និងទាំងខាងក្រៅ ក្នុងពេលអាជីវករចូលលក់ដូរជាថ្មីឡើងវិញ។
លោកអភិបាលរងស្រុក បានរំលឹកថា កាលពីរសៀលថ្ងៃទី២៣ ខែមេសា យើងបានរកឃើញស្ត្រីជាអាជីវករលក់មាសចំនួន៤នាក់ មានកូវីដ១៩ ភ្លាមៗនោះអាជ្ញាធរស្រុក ដោយបានការណែនាំពីថ្នាក់លើក៏បានប្រកាសតាមឧគ្ឃោសនស័ព្ទ ក្នុងផ្សារទាំងយប់ ដើម្បីបិទការលក់ដូរក្នុងផ្សារសាលាលេខ៥ ចាប់ពីម៉ោង៦ព្រឹក ថ្ងៃទី២៤ ខែមេសា រហូតដល់ថ្ងៃនេះ នឹងបន្តបិទរហូតគម្រប់១៤ថ្ងៃ បើគ្មានការប្រែប្រួលទេ អាជីវករអាចចូលលក់ដូរវិញបាន ។
គួរបញ្ជាក់ដែរថា ក្រោយពីរកឃើញអាជីវករលក់មាសក្នុងផ្សារសាលាលេខប្រាំចំនួន៤នាក់ និង២នាក់ប្ដីប្រពន្ធ រស់នៅស្រុកកំពង់ត្រឡាច ដែលចេញ-ចូលលក់ត្រីនៅផ្សារដើមគរ រាជធានីភ្នំពេញ សរុបទាំងអស់មាន៦នាក់ មានវិជ្ជមានកូវីដ១៩ ហើយមន្ត្រីជំនាញបានយកសំណាកអ្នកប៉ះពាល់ដោយផ្ទាល់ និងប្រយោលទាំងអស់ ទៅពិនិត្យលើកទី១ លទ្ធផលគឺអវិជ្ជមាន និងកំពុងតែរង់ចាំលទ្ធផលនៃការពិនិត្យលើកទី២ បន្តទៀត៕
ចែករំលែកព័តមាននេះ