ខេត្តកំពង់ឆ្នាំង៖ អាជ្ញាធរស្រុកទឹកផុស នៅព្រឹកថ្ងៃទី២៨ ខែមេសា ឆ្នាំ២០២១ បានចុះពិនិត្យ និងណែនាំដល់ចុងភៅ ត្រូវមានអនាម័យ ចម្អិនម្ហូប ឲ្យបានឆ្អិនល្អ…
ខេត្តកំពង់ឆ្នាំង៖ អាជ្ញាធរស្រុកទឹកផុស នៅព្រឹកថ្ងៃទី២៨ ខែមេសា ឆ្នាំ២០២១ បានចុះពិនិត្យ និងណែនាំដល់ចុងភៅ ត្រូវមានអនាម័យ ចម្អិនម្ហូប ឲ្យបានឆ្អិនល្អ និងប្រុងប្រយ័ត្នអាហារជូរផ្អូម ធ្វើឲ្យប៉ះពាល់ដល់សុខភាពប្រជាពលរដ្ឋ ដែលកំពុងតែធ្វើចត្តាឡីស័ក នៅមណ្ឌលចត្តាឡីស័ក កម្រិត២ មានទីតាំងនៅភូមិស្រែតាជៃ ឃុំអភិវឌ្ឍន៍ ស្រុកទឹកផុស។
នៅក្នុងឱកាសនោះ លោក សុខ សុន្ធី អភិបាលរងស្រុកទឹកផុស បានមានប្រសាសន៍ថា ម្ហូបអាហារ ដែលចំអិន ត្រូវមានអនាម័យ ទាំងបន្លែ ត្រី សាច់ ត្រូវលាងទឹក ឲ្យបានល្អ ដើម្បីជៀសវាងប៉ះពាល់សុខភាពប្រជាពលរដ្ឋ ដែលកំពុងតែធ្វើចត្តាឡីស័ក ក្នុងការចូលរួមប្រយុទ្ធប្រឆាំងនឹងកូវីដ១៩ នៅទីនេះ។ ជាងនេះទៅទៀត អាហារទាំង ៣ពេល ដែលរៀបចំ ទទួលឲ្យពួកគាត់ពិសា ត្រូវធ្វើឲ្យបានទៀងទាត់ពេលវេលា ដោយអាហារពេលព្រឹកយ៉ាងយូរត្រឹមម៉ោង ៦ព្រឹក អាហារថ្ងៃត្រង់យ៉ាងយូរត្រឹមម៉ោង ១១ព្រឹក និងអាហារពេលល្ងាច យ៉ាងយូរត្រឹមម៉ោង ៥ និង ៣០ នាទីល្ងាច។ ការធ្វើម្ហូបអាហារ ឱ្យគាត់ពិសាទៀងពេលបែបនេះ ព្រោះថា ក្នុងគ្រាដែលគាត់កំពុងតែធ្វើចត្តាឡីស័ក មិនអាចចេញទៅណាបានទេ។
គួរបញ្ជាក់ថា មណ្ឌលចត្តាឡីស័ក កម្រិត២ នៅស្រុកទឹកផុស បានទទួលបងប្អូនប្រជាពលរដ្ឋ ដែលមកពីតំបន់នានា មុនទៅកាន់ស្រុកកំណើត ត្រូវមកធ្វើចត្តាឡីស័កនៅទីនេះ។ គិតត្រឹមថ្ងៃទី២៨ ខែមេសានេះ ប្រជាពលរដ្ឋ ដែលកំពុងតែធ្វើចត្តាឡីស័ក នៅខេត្តកំពង់ឆ្នាំង មានចំនួនសរុបចំនួន ៧៩នាក់ ( ស្រី ១២នាក់)៕ ដោយ៖ ពៅ សុខហ៊ាន
ចែករំលែកព័តមាននេះ