រាជធានីភ្នំពេញ ៖ ទីបំផុតភាគីចិនបានយល់ព្រមអនុញ្ញាតឱ្យចំការស្វាយ៣៧និងរោងចក្រវេចខ្ចប់ចំនួន៥ អាចនាំចេញស្វាយស្រស់ទៅកាន់ប្រទេសចិនបានជាផ្លូវការ ដោយអនុវត្តន៍តាមភូតគាមអនាម័យ ។ នេះ បើយោងទៅតាមកិច្ចប្រជុំមួយកាលពីថ្ងៃទី២៦ មេសា ២០២១កន្លងទៅរវាងក្រសួងកសិកម្មរុក្ខាប្រមាញ់និងនេសាទកម្ពុជា និងអគ្គរដ្ឋបាលគយនៃសាធារណរដ្ឋប្រជាមានិតចិន ។
យោងតាមសេចក្តីប្រកាសព័ត៌មានរបស់ក្រសួងកសិកម្មរុក្ខាប្រមាញ់នេសាទកម្ពុជាឱ្យដឹងថា ក្រសួងកសិកម្ម រុក្ខាប្រមាញ់ និងនេសាទនៃព្រះរាជាណាចក្រកម្ពុជា បានចាប់ផ្តើមទំនាក់ទំនងចរចាបើកទីផ្សារជាមួយអគ្គរដ្ឋបាលគយនៃសាធារណរដ្ឋប្រជាមានិតចិន (GACC) តាំងពីដើមឆ្នាំ២០១៨ នៅមុនពេលអគ្គរដ្ឋបាលត្រួតពិនិត្យគុណភាព អធិការកិច្ច និងចត្តាឡីស័ក (AQSIQ) ច្របាច់បញ្ជូលគ្នាជាមួយ GACC ហើយរហូតដល់ថ្ងៃទី២៨ ខែឧសភា ឆ្នាំ២០២០ ទើបទទួលបានការឯកភាព និងឈានដល់ការចុះហត្ថលេខានៅថ្ងៃទី០៩ ខែមិថុនា ឆ្នាំ២០២០ លើពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែស្វាយស្រស់ពីកម្ពុជាទៅកាន់ប្រទេសចិន។
ជាលទ្ធផល បន្ទាប់ពីការចរចាបើកទីផ្សារអស់រយៈពេលជាង៣ឆ្នាំ នៅថ្ងៃទី២៦ ខែមេសា ឆ្នាំ២០២១នេះ GACC បានអនុម័តទទួលស្គាល់ជាផ្លូវការនូវបញ្ជីឈ្មោះចម្ការស្វាយចំនួន៣៧ និងរោងចក្រវេចខ្ចប់ចំនួន០៥ ដែលបានចុះបញ្ជីសម្រាប់នាំចេញផ្លែស្វាយស្រស់កម្ពុជាទៅកាន់ប្រទេសចិន ។
រោងចក្រវេចខ្ចប់ទាំង០៥ នោះ រួមមាន ១-ក្រុមហ៊ុន HYUNDAI MAO LEGACY CO., LTD; ២-ក្រុមហ៊ុន SHANGDA JIAN HUI INTERNATIONAL AGRICULTURE PRODUCT AND LOGISTIC; ៣-ក្រុមហ៊ុន AL JAZEELAND FOOD PTE. LTD; ៤-ក្រុមហ៊ុន LONG WO AGRICULTURE (CAMBODIA) CO., LTD និង៥-ក្រុមហ៊ុន BOEUNG KET FRESH FRUITS CO., LTD ។
កន្លងទៅអគ្គនាយកដ្ឋានកសិកម្ម បានទទួលពាក្យស្នើសុំចុះបញ្ជីចម្ការស្វាយ និងទីតាំងវេចខ្ចប់សម្រាប់នាំចេញផ្លែស្វាយស្រស់កម្ពុជាទៅកាន់ប្រទេសចិនចំនួន៥៥ក្រុមហ៊ុន/ម្ចាស់ចម្ការ/សហគមន៍កសិកម្ម។ អគ្គនាយកដ្ឋានកសិកម្ម ក៏បាន និងកំពុងបន្តទទួលនូវពាក្យស្នើសុំចុះបញ្ជីចម្ការស្វាយជាបន្តបន្ទាប់ថែមទៀតផងដែរ ។
គួរបញ្ជាក់ថាកម្ពុជា បានចុះហត្ថលេខារួចរាល់ហើយការកិច្ចព្រមព្រៀងពាណិជ្ជកម្មសេរីទ្វេភាគីនិងរង់ចាំការចូលជាធរមាននូវកិច្ចព្រមព្រៀងនេះជាផ្លូវការ ហើយបើតាមការបញ្ជាក់ពីមន្ត្រីជាន់ខ្ពស់កម្ពុជាថាកិច្ចព្រមព្រៀងនេះ នឹងចូលជាធរមាននៅក្នុងឆ្នាំ២០២១នេះ ។ តាមរយៈកិច្ចព្រមព្រៀងពាណិជ្ជកម្មនេះ នឹងធ្វើឱ្យកម្ពុជាអាចនាំចេញទំនិញសក្ដានុពលជាច្រើនទៀតទៅកាន់ប្រទេសចិន ហើយក៏អាចទាក់ទាញការវិនិយោគផ្សេងពីប្រទេសចិនមកកម្ពុជាបន្ថែមទៀតផងដែរ៕
ចែករំលែកព័តមាននេះ