រាជធានីភ្នំពេញ ៖ ថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិបានឯកភាពបញ្ចប់វិសោធនកម្មបទបញ្ជាផ្ទៃក្នុងរដ្ឋសភា និងច្បាប់បោះឆ្នោតជ្រើសរើសក្រុមប្រឹក្សាឃុំ-សង្កាត់ហើយ បន្ទាប់ពីកិច្ចពិភាក្សាគ្នាជាច្រើនមក
រាជធានីភ្នំពេញ ៖ ថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិបានឯកភាពបញ្ចប់វិសោធនកម្មបទបញ្ជាផ្ទៃក្នុងរដ្ឋសភា និងច្បាប់បោះឆ្នោតជ្រើសរើសក្រុមប្រឹក្សាឃុំ-សង្កាត់ហើយ បន្ទាប់ពីកិច្ចពិភាក្សាគ្នាជាច្រើនមក ។
ក្នុងជំនួបកាលពីល្ងាចថ្ងៃទី៩ តុលា នៅវិមានរដ្ឋសភា សម្តេចក្រឡាហោម ស ខេង ប្រធានខាងគណបក្សប្រជាជនកម្ពុជា និងជាឧបនាយករដ្ឋមន្ត្រីក្រសួងមហាផ្ទៃ បានមានប្រសាសន៍ថ្លែងអំណរគុណដល់គណៈកម្មការចំពោះកិច្ចដែលបានខិតខំអត់ធ្មត់ក្នុងការពិភាក្សាលើវិសោធនកម្មបទបញ្ជាផ្ទៃក្នុងរដ្ឋសភា និងច្បាប់បោះឆ្នោតជ្រើសរើសក្រុមប្រឹក្សា ឃុំសង្កាត់ រយៈពេលកន្លងមកស្ទើរតែទាំងស្រុង ទោះបីនៅសេសសល់ចំណុចមួយចំនួន ។
សម្តេចក្រឡាហោមបានថ្លែងថា ថ្ងៃនេះជាថ្ងៃបញ្ចប់នៃការពិភាក្សារបស់គណបក្សដែលមានសំឡេងភាគច្រើន និងភាគតិចក្នុងរដ្ឋសភា និងបន្តអនុវត្តតាមនីតិវិធីដើម្បីបានសេចក្តីព្រាងបទបញ្ជាផ្ទៃក្នុងរដ្ឋសភា និងច្បាប់ក្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់ ។
ចំណែកលោក សម រង្ស៊ី ប្រធានក្រុមតំណាងរាស្ត្រសំឡេងភាគតិចក្នុងសភា មានប្រសាសន៍ថ្លែងអំណរគុណដល់ក្រុមការងារគណៈកម្មការចំពោះកិច្ចខិតខំពិភាក្សារហូតឈានដល់ចំណុចឯកភាពគ្នាស្ទើរតែទាំងអស់ និងថាគណបក្សទាំងអស់ត្រូវរក្សាភាពអត់ធ្មត់ និងចេះស្រឡាញ់គ្នាទៅវិញទៅមក ។
យោងតាមសេចក្តីប្រកាសព័ត៌មានរួមរបស់គណគបក្សទាំងពីរ ស្តីពីលទ្ធផលនៃកិច្ចប្រជុំ ដែលចំណាយអស់រយៈពេល២ម៉ោងបានឲ្យដឹងថា ថ្នាក់ដឹកនាំនៃគណបក្សទាំងពីរបានពិភាក្សាដោះស្រាយចំណុច ដែលមិនទាន់ស្របគ្នាពាក់ព័ន្ធការធ្វើវិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងវិសោធនកម្មបទបញ្ជផ្ទៃក្នុងរដ្ឋសភា ។
កិច្ចប្រជុំសម្រេចជាលទ្ធផលដូចជាទី១-ថ្នាក់ដឹកនាំតំណាងរាស្ត្រនៃគណបក្សទាំងពីរ បានសម្តែងការកោតសរសើរ និងវាយតម្លៃចំពោះគណៈកម្មការលើកិច្ចដែលបានខិតខំបំពេញការងាររួមគ្នា ក្នុងការសិក្សាស្រាវជ្រាវស្នើធ្វើវិសោធនកម្មបទបញ្ជាផ្ទៃក្នុងរដ្ឋសភា។ ថ្នាក់ដឹកនាំបានព្រមព្រៀងគ្នាលើសំណើធ្វើវិសោធនកម្មបទបញ្ជាផ្ទៃក្នុងនៃរដ្ឋសភាចំនួន១៦ប្រការលើ៨៣ប្រការ ហើយតំណាងរាស្ត្រនៃគណបក្សទាំងពីរនឹងរួមគ្នាលើកសំណើធ្វើវិសោធនកម្មបទបញ្ជាផ្ទៃក្នុងនេះជូនទៅរដ្ឋសភាតាមនីតិវិធីជាធរមាន ។
២-ថ្នាក់ដឹកនាំតំណាងរាស្ត្រនៃគណបក្សទាំងពីរកោតសរសើរ និងវាយតម្លៃចំពោះក្រុមការងារបច្ចេកទេសនៃគណបក្សទាំងពីរ ដែលបានខិតខំប្រឹងប្រែងសហការគ្នាធ្វើការសិក្សាសម្របសម្រួលក្នុងការធ្វើវិសោធនកម្មច្បាប់បោះឆ្នោតជ្រើសរើសក្រុមប្រឹក្សាឃុំ-សង្កាត់់។ សេចក្តីព្រាងមាន១៦ជំពូក និង១៩៦មាត្រា ។ ជាមួយគ្នានោះដែរ ថ្នាក់ដឹកនាំតំណាងរាស្ត្រគណបក្សទាំងពីរបានព្រមព្រៀងគ្នាក្នុងការរៀបចំសំណើ វិសោធនកម្មនេះជាច្បាប់ថ្មីក្នុងទម្រង់ជាសេចក្តីស្នើច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ ហើយតំណាងរាស្ត្រគណបក្សទាំងពីរ នឹងរួមគ្នាស្នើសេចក្តីស្នើច្បាប់នេះជូនទៅរដ្ឋសភាតាមនីតិវិធីជាធរមាន ។
៣-ថ្នាក់ដឹកនាំតំណាងរាស្ត្រនៃគណបក្សទាំងពីរបានព្រមព្រៀងគ្នាបន្តអនុវត្តវប្បធម៌សន្ទនា សំដៅដោះស្រាយបញ្ហានានារបស់ជាតិ ដោយឈរលើគោលការណ៍នៃលទ្ធិប្រជាធិបតេយ្យ និងនីតិរដ្ឋ ។
ក្នុងសន្និសីទសារព័ត៌មាន លោក សម រង្ស៊ីប្រធានគណបក្សសង្គ្រោះជាតិបានស្នើសុំដោយផ្ទាល់មាត់តាមរយៈសម្តេច ស ខេង ដើម្បីស្នើសុំសម្តេច ហ៊ុន សែន ជួយអន្តរាគមន៍ ដោះលែងសកម្មជនគណបក្សសង្គ្រោះជាតិ ដែលកំពុងជាប់ឃុំឃាំងនៅពន្ធនាគារព្រៃស ដើម្បីឲ្យពួកគេបានមកជួបជុំប្រពន្ធកូន ក្នុងពេលបុណ្យភ្ជុំបិណ្ឌនេះ ក៏ប៉ុន្តែសម្តេច ស ខេង អនុប្រធានគណបក្សប្រជាជនកម្ពុជា បានបញ្ជាក់តបភ្លាមៗទៅកាន់លោក សម រង្ស៊ី ថា អ្វីៗត្រូវអនុវត្តតាមច្បាប់ ៕
ចែករំលែកព័តមាននេះ