រាជធានីភ្នំពេញ ៖ គណបក្សសង្គ្រោះជាតិ (CNRP) នឹងរៀបចំពិធីបង្សុកូលគោរពព្រះវិញ្ញាណក្ខន្ឋ សម្តេចឪនរោត្តមសីហនុ (ព្រះបរមរតនកោដ្ឋ) ។ នេះបើតាមលោក កឹម សុខា ប្រធានស្តីទីគណបក្សសង្រ្គោះជាតិ ដែលសរសេរនៅលើបណ្តាញទំនាក់ទំនងសង្គម ( Facebook) Page បង្ហោះនៅរសៀលថ្ងៃទី១៤ តុលា ២០១៥ ។ បើតាមលោកអនុប្រធានទី១រដ្ឋសភា ពិធីពិធីបង្សុកូលគោរពវិញ្ញាណក្ខន្ធព្រះបរមរតនកោដ្ឋនឹងប្រព្រឹត្តទៅនៅថ្ងៃទី១៥ តុលា វេលាម៉ោង ០៨ព្រឹក នៅទីស្នាក់ការកណ្តាលគណបក្សសង្រ្គោះជាតិ ផ្ទះលេខ ៥៧៦ សង្កាត់ចាក់អង្រែលើ ខណ្ឌមានជ័យ។
គួរបញ្ជាក់ថា អតីតព្រះមហាវីរក្សត្រ សម្តេចឪ នរោត្តមសីហនុ ព្រះអង្គបានយាងចូលព្រះទិវង្គតនៅម៉ោង១និង២០នាទីរំលងអធ្រាត្រឈានចូលថ្ងៃទី១៥ តុលា ២០១២ ដោយរោគាពាធក្នុងព្រះជន្ម៩០ព្រះវស្សា នៅក្នុងទីក្រុងប៉េកំាងប្រទេសចិន ។
ព្រះករុណា ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដីនិងឯកភាពជាតិខ្មែរ ព្រះអង្គប្រសូតនៅថ្ងៃ អង្គារទី ១១កើត ខែកត្តិក ឆ្នាំ ច ចត្វាស័ក ព.ស ២៤៥៦ ត្រូវនឹងថ្ងៃទី ៣១ តុលា ១៩២២ នៅរាជធានីភ្នំពេញ៕
ចែករំលែកព័តមាននេះ