ខេត្តកំពង់ឆ្នាំង ៖ កម្លាំងនគរបាលប្រឆាំងភេវរកម្ម និងឧក្រិដ្ឋកម្មឆ្លងដែន នៃស្នងការនគរបាលខេត្តកំពង់ឆ្នាំង នៅវេលាម៉ោង១០និង៣០នាទីព្រឹក ថ្ងៃទី២៦ ខែមេសា ឆ្នាំ២០២១ បានចាប់ឃាត់ខ្លួនបុរសម្នាក់…
ខេត្តកំពង់ឆ្នាំង ៖ កម្លាំងនគរបាលប្រឆាំងភេវរកម្ម និងឧក្រិដ្ឋកម្មឆ្លងដែន នៃស្នងការនគរបាលខេត្តកំពង់ឆ្នាំង នៅវេលាម៉ោង១០និង៣០នាទីព្រឹក ថ្ងៃទី២៦ ខែមេសា ឆ្នាំ២០២១ បានចាប់ឃាត់ខ្លួនបុរសម្នាក់ ដោយចោទប្រកាន់ពីបទញុះញង់បង្កឲ្យមានអស្ថេរភាព បន្ទាប់ពីបុរសរូបនោះកាត់តសំឡេងសម្ដេច ហ៊ុន សែន មកកាឡៃបង្ហោះតាម TikTok ខុសពីការពិត។
លោក អៀរ ប៊ុនធឿន អ្នកនាំពាក្យស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា បុរសដែលត្រូវចាប់ខ្លួននោះមានឈ្មោះ ភឹម ផាយផាត់ អាយុ៣៩ឆ្នាំ មានទីលំនៅភូមិស្វាយជ្រុំ ឃុំស្វាយជ្រុំ ស្រុករលាប្អៀរ ។
លោកបានបញ្ជាក់ថា កាលពីថ្ងៃទី២៣ ខែមេសា ឆ្នាំ២០២១ បុរសរូបនេះ បានកាត់តវីដេអូប្រសាសន៍របស់សម្តេចតេជោ ហ៊ុន សែន យកមកផ្សាយតាមប្រព័ន្ធសង្គម តិកតុក (TikTok) ក្នុងចេតនាញុះញង់បង្កអសន្តិសុខក្នុងសង្គម ។
លោក អៀរ ប៊ុនធឿន បានបន្តថា បុគ្គលឈ្មោះ ភឹម ផាយផាត់ បានបង្ហោះរូបភាព និងសារសំឡេងរបស់សម្តេចតេជោ ហ៊ុន សែន ដោយភ្ជាប់នូវការនិយាយខ្លួនឯងបន្ថែម ខុសពីការពិត ដែលពាក់ព័ន្ធនឹងចំណាត់ការរបស់រាជរដ្ឋាភិបាលលើបញ្ហាជំងឺកូវីដ១៩ ដែលកំពុងឆ្លងរាលដាលក្នុងសហគមន៍ ដោ យក្នុងខ្លឹមសារបង្ហោះនោះបាននិយាយថា (ចប់ហើយបងប្អូនអើយ ខ្ញុំអាណិតដល់កម្មករ កម្មការិនី ៣ខែទៀត) ។
អ្នកនាំពាក្យនៃស្នងការដ្ឋាននគរបាលខេត្ត បានបញ្ជាក់ថា បុគ្គលរូបនោះ ត្រូវបានការិយាល័យប្រឆាំងភេវរកម្ម និងឧក្រឹដ្ឋកម្មឆ្លងដែន ចោទពីបទ លក្ខខណ្ឌអត្ថិភាពនៃការញុះញង់ (មាត្រា៤៩៤)។
បន្ទាប់ពីសាកសួរចម្លើយរួច កម្លាំងនគរបាលនៃស្នងការដ្ឋាននគរបាលខេត្ត បានបញ្ជូនឈ្មោះ ភឹម ផាយផាត់ ទៅស្ថាប័នអយ្យការអមសាលាដំបូងខេត្ត ដើម្បីចាត់ការបន្តតាមនីតិវិធី៕
ចែករំលែកព័តមាននេះ