រាជធានីភ្នំពេញ ៖ លោកកឹម សុខា ប្រធានស្តីទីគណបក្សសង្គ្រោះជាតិបានធ្វើការបកស្រាយទស្សនៈ «ដូរ ឬមិនដូរ?» ដោយបានពន្យល់ថា មិនមានការចាប់បង្ខំឲ្យប្រជាពលរដ្ឋបោះឆ្នោតគាំទ្រ គឺចង់មានការបោះឆ្នោតត្រឹមត្រូវ និងយុត្តិធម៌ ។
លោកកឹម សុខា បានសរសេរនៅលើហ្វេសប៊ុកផ្ទាល់ខ្លួន នាថ្ងៃទី១៤ តុលា បញ្ជាក់ថា «ខ្ញុំកឹម សុខា ជាអ្នកដាក់ចេញនូវសារនយោបាយ «ដូរ ឬមិនដូរ?» នេះ ជូនគណបក្សប្រើសម្រាប់ឃោសនាបោះឆ្នោត តាំងតែពីខ្ញុំនៅជាប្រធានគណបក្សសិទ្ធិមនុស្ស រហូតមកដល់ពេលដែលខ្ញុំជាអនុប្រធានគណបក្សសង្គ្រោះជាតិ ហើយដែលពេលនោះខ្ញុំជាប្រធានស្តីទីគណបក្សសង្គ្រោះជាតិផង។ ខ្ញុំពេញចិត្តនឹងសារនយោបាយនេះណាស់ ព្រោះខ្ញុំយល់ថា មានន័យ ខ្លី ខ្លឹម ខ្លាំង បើមិនខ្លៅ មិនគួរខ្លាច បើប្រជាពលរដ្ឋឃ្លានហើយនោះ។
លោកសរសេរទៀតថា សារនយោបាយនេះគ្រាន់ជាសារសម្រាប់ដាក់ជូនម្ចាស់ឆ្នោតពិចារណា ដោយមិនបង្ខិតបង្ខំ មិនគំរាមកំហែង ដូចសារដែលអ្នកនយោបាយខ្លះដាក់ចេញក្នុងរូបភាពគំរាមកំហែងនោះទេ។ កន្លងមក ខ្ញុំសង្កេតឃើញថា ប្រជាពលរដ្ឋខ្មែរជាច្រើន សូម្បីតែក្មេងៗមិនទាន់គ្រប់អាយុបោះឆ្នោតក៏ចងចាំ ចូលចិត្តសារនយោបាយនេះដែរ ។
ជាមួយគ្នានោះដែរ លោកបានលើកប្រៀបដូចជាចង់វាយប្រវាយលើបក្សកាន់អំណាចបច្ចុប្បន្ន ដោយគូរបញ្ជាក់ថា មានតែអ្នកដឹកនាំខ្លះតែប៉ុណ្ណោះ ដែលប្រឆាំងទាំងទទឹងទិសនូវសារនយោបាយនេះ ទោះបីខ្ញុំបានបញ្ជាក់ហើយ បញ្ជាក់ទៀតថា ខ្ញុំនិងគណបក្សសង្គ្រោះជាតិចង់ឱ្យមានការផ្លាស់ប្តូរតាមរយៈការបោះឆ្នោតដោយសេរី ត្រឹមត្រូវ និងយុត្តិធម៌ យើងមិនធ្វើតាមមធ្យោបាយហិង្សា មិនធ្វើបដិវត្តន៍ មិនធ្វើសង្គ្រាមបង្ហូរឈាមខ្មែរជាដាច់ខាតក៏ដោយ។ ដូច្នេះ ដើម្បីកុំឱ្យអ្នកខ្លះយកពាក្យ ដូរ ឬមិនដូរនេះ ទៅបកស្រាយបំភ្លៃ ដើម្បីបំភ័យប្រជាពលរដ្ឋខ្មែរ ឬយកទៅអនុវត្តផ្ទុយពីគោលដៅ និងគោលបំណងនៃសារនយោបាយនេះ ជាថ្មីម្តងទៀតខ្ញុំសូមបញ្ជាក់ជូនសាធារណជនមេត្តាជ្រាបនូវគោលដៅ និងគោលបំណងនៃសារនយោបាយ ដូរ ឬមិនដូរនេះ តាមទស្សនៈរបស់ខ្ញុំដូចខាងក្រោមនេះ៖
ទី១-ជាការសុំមតិប្រជាពលរដ្ឋថា តើប្រទេសកម្ពុជាយើងល្មមដល់ពេលផ្លាស់ប្តូរហើយឬនៅ? មិនមែនជាការបង្ខិតបង្ខំឡើយ។
ទី២-ការសម្រេចថា ដូរ ឬមិនដូរ គឺជាសិទ្ធិរបស់ប្រជាពលរដ្ឋខ្មែរដែលជាម្ចាស់អំណាច ម្ចាស់ប្រទេស ម្ចាស់វាសនាខ្លួនឯងតាមរយៈការបោះឆ្នោតដោយសេរី ត្រឹមត្រូវ និងយុត្តិធម៌។
ទី៣-យើងទាំងអស់គ្នាត្រូវតែគោរពតាមសម្លេងដែលជាឆន្ទៈរបស់ម្ចាស់ឆ្នោត បើការបញ្ចេញមតិតាមរយៈការបោះឆ្នោតនោះប្រកបដោយយុត្តិធម៌អាចទទួលយកបាន។
ទី៤-បើម្ចាស់ឆ្នោតកើតទុក្ខមិនសុខចិត្តចំពោះដំណើរការ ឬលទ្ធផលនៃការបោះឆ្នោតនោះ ប្រជាពលរដ្ឋមានសិទ្ធិបញ្ចេញតវ៉ារកយុត្តិធម៌។
ទី៥-សមត្ថកិច្ច អាជ្ញាធរ និងភាគីពាក់ព័ន្ធត្រូវតែដោះស្រាយឆ្លើយតបឱ្យបានត្រឹមត្រូវ ដោយតម្លាភាពមិនត្រូវបង្ក្រាបដោយប្រើនូវអំពើហិង្សាឡើយ។
ទី៦-ការផ្លាស់ប្តូរជាការធម្មតា ជាច្បាប់ធម្មជាតិ ជាច្បាប់ព្រះ ដែលគ្មានអ្នកណាអាចរារាំង ឃាត់ឃាំងបានឡើយ
ទី៧-សូមខ្មែរទាំងអស់គ្នា ងាកមកអង្គុយនិយាយគ្នា រៀបចំឱ្យមានការផ្លាស់ប្តូរ ការកែទម្រង់ដោយសន្តិវិធី ដើម្បីសេចក្តីសុខសេចក្តីចំរើនទាំងអស់គ្នា។
ចែករំលែកព័តមាននេះ