រាជធានីភ្នំពេញ៖ គិតមកត្រឹមព្រឹកថ្ងៃទី២៥ ខែមេសា ឆ្នាំ២០២១ គឺជាថ្ងៃទី២ នៃការផ្អាកដំណើរការផ្សារនានានៅទូទាំងរាជធានីភ្នំពេញហើយ ដែលនេះគឺជាវិធានការសុខាភិបាល ដើម្បីទប់ស្កាត់ការឆ្លងរីករាលដាលជំងឺ COVID-19 ដែលកំពុងវាយលុកខ្លាំងនៅក្នុងរាជធានីភ្នំពេញ…
រាជធានីភ្នំពេញ៖ គិតមកត្រឹមព្រឹកថ្ងៃទី២៥ ខែមេសា ឆ្នាំ២០២១ គឺជាថ្ងៃទី២ នៃការផ្អាកដំណើរការផ្សារនានានៅទូទាំងរាជធានីភ្នំពេញហើយ ដែលនេះគឺជាវិធានការសុខាភិបាល ដើម្បីទប់ស្កាត់ការឆ្លងរីករាលដាលជំងឺ COVID-19 ដែលកំពុងវាយលុកខ្លាំងនៅក្នុងរាជធានីភ្នំពេញ និងក្រុងតាខ្មៅ ខេត្តកណ្ដាល។
នៅអំឡុងពេលនៃការបិទខ្ទប់នេះ ក៏មានអាជីវករមួយចំនួននៅតែមិនព្រមឈប់នូវសកម្មភាពលក់ដូររបស់ខ្លួននៅឡើយទេ ពួកគាត់នៅតែបន្តលក់ដូរទៀត។ ចំណែកអាជ្ញាធរវិញ ពិតជាជួបការលំបាកក្នុងពេលដែលប្រជាពលរដ្ឋរបស់ខ្លួនមិនគោរពច្បាប់បែបនេះ ប៉ុន្តែអាជ្ញាធរនៅតែប្រើចិត្តត្រជាក់ចុះទៅធ្វើការណែនាំឲ្យបញ្ឈប់ការលក់ដូរតទៅទៀត និងបានជំរុញឲ្យពួកគាត់ទៅយកសំណាកធ្វើតេស្តរកជំងឺ COVID-19 ជាបន្ទាន់ផងដែរ។
ជាក់ស្ដែង អាជីវករមួយចំនួននៅផ្សារត្រពាំងពោធិ៍ ក្បែររោងចក្រកាត់ដេឃ្យូ អឹម អាយ (QMI) និងផ្សារមួយទៀតនៅម្ដុំរោងចក្រសាន់ស្កាយ ស្ថិតនៅភូមិត្រពាំងពោធិ៍ និងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ បានបន្តសកម្មភាពលក់សាច់ជ្រូក ត្រី បន្លែ ផ្លែឈើ រួមនឹងរបស់របរផ្សេងជាច្រើនទៀត ដែលមានមនុស្សទៅទិញច្រើន ហើយពុំបានរក្សាគម្លាតសុវត្ថិភាពឡើយ ដែលជាហេតុធ្វើឲ្យមានការភ័យខ្លាចឆ្លងជំងឺដ៏សាហាវនោះ ។
បើតាមអាជ្ញាធរសង្កាត់ចោមចៅទី៣ បានឲ្យដឹងថា បន្ទាប់ពីទទួលបានដំណឹងនេះភ្លាម អាជ្ញាធរសង្កាត់ រួមជាមួយលោកមេភូមិ និងកម្លាំងប្រជាការពារ ដឹកនាំដោយលោកអ៊ឹម វណ្ណា ចៅសង្កាត់រងចោមចៅទី៣ បានចុះទៅកាន់ផ្សារទាំង២ខាងលើ ហើយប្រើវិធានការត្រជាក់ណែនាំសុំឲ្យពួកគាត់ចូលរួមអនុវត្តនូវការសម្រេចរបស់រាជរដ្ឋាភិបាល ក៏ដូចជាក្រសួងសុខាភិបាល និងសាលារាជធានីភ្នំពេញ។ ក្នុងការបិទខ្ទប់រាជធានីភ្នំពេញ និងការផ្អាកដំណើរការផ្សារទាំងអស់ ដើម្បីប្រយុទ្ធប្រឆាំងជំងឺ COVID-19 ក្នុងគោលបំណងផ្ដល់នូវភាពសុខសាន្តជូនប្រជាពលរដ្ឋ និងប្រទេសជាតិ ជាពិសេសសេដ្ឋកិច្ចជាតិមានការរីកចម្រើន។
ដោយឡែក ក្រុមអាជីវករទាំងនោះ មានមួយចំនួនបានឆ្លើយថា «ពួកគាត់ពុំបានដឹងថាផ្សារត្រូវបិទនោះទេ ទើបបានជាលក់ដូរជាធម្មតា» រីឯអ្នកខ្លះទៀតបាននិងយាយថា «ពួកគាត់ក៏បានដឹងថា ផ្សារត្រូវបិទដែរ ប៉ុន្តែដោយសារតែសាច់ជ្រូក ឬត្រី បន្លែ នៅសល់ពីថ្ងៃមុនលក់ពុំទាន់អស់ ទើបថ្ងៃនេះពួកគាត់បន្តលក់បង្ហើយឲ្យអស់សិន ហើយបន្ទាប់ពីលក់អស់ទៅពួកគាត់ឈប់លក់ហើយ»។
ទោះបីជាបែបណា អាជ្ញាធរ មានការព្រួយបារម្ភខ្លាចមានការឆ្លងរាលដាលនូវជំងឺកាចសាហាវខាងលើ និងបានជំរុញឲ្យពួកគាត់ឈប់លក់បន្តទៀត រួចប្រាប់ឲ្យពួកគាត់ទៅយកសំណាកនៅសាលាបឋមសិក្សាជម្ពូវ័ន ដើម្បីធ្វើតេស្តរកមេរោគ COVID-19 ទាំងអស់គ្នា កុំធ្វេសប្រហែសឲ្យសោះ៕
ចែករំលែកព័តមាននេះ