ខេត្តកំពង់ឆ្នាំង ៖ រដ្ឋបាលសាលាខេត្តកំពង់ឆ្នាំង បានចេញសេចក្តីជូនដំណឹងស្ដីពីការរកឃើញអ្នកវិជ្ជមានកូវីដ១៩ ចំនួន២នាក់ កាលពីរសៀលថ្ងៃទី២៤ ខែមេសាម្សិលមិញនេះ និងបានអំពាវនាវឲ្យប្រជាពលរដ្ឋដែលបានពាក់ព័ន្ធនឹងគ្រួសារទាំង២នាក់ប្ដីប្រពន្ធ សូមប្រញាប់ទៅយកសំណាក ដើម្បីពិនិត្យរកមេរោគកូវីដ១៩…
ខេត្តកំពង់ឆ្នាំង ៖ រដ្ឋបាលសាលាខេត្តកំពង់ឆ្នាំង បានចេញសេចក្តីជូនដំណឹងស្ដីពីការរកឃើញអ្នកវិជ្ជមានកូវីដ១៩ ចំនួន២នាក់ កាលពីរសៀលថ្ងៃទី២៤ ខែមេសាម្សិលមិញនេះ និងបានអំពាវនាវឲ្យប្រជាពលរដ្ឋដែលបានពាក់ព័ន្ធនឹងគ្រួសារទាំង២នាក់ប្ដីប្រពន្ធ សូមប្រញាប់ទៅយកសំណាក ដើម្បីពិនិត្យរកមេរោគកូវីដ១៩ ។
នៅក្នុងសេចក្តីជូនដំណឹងបានបញ្ជាក់ថា គ្រួសារដែលមានវិជ្ជមានកូវីដ១៩ ទាំងពីរនាក់ខាងលើ គឺបុរសជាប្តីឈ្មោះ យ៉ែម រិទ្ធ អាយុ៤៦ឆ្នាំ និងប្រពន្ធឈ្មោះ កេត សុម៉ាលី អាយុ២៩ឆ្នាំ ទាំង២នាក់រស់នៅភូមិដើមពពេល ឃុំថ្មឥដ្ឋ ស្រុកកំពង់ត្រឡាច ។
ប្រភពដដែលបន្តថា ចំពោះប្រវត្តិនៃការឆ្លងវិញ គឺឆ្លងតាមរយៈព្រឹត្តិការណ៍សហគមន៍ 20 កុម្ភៈ ដោយប្ដីប្រពន្ធទាំងពីរនាក់នេះ មានមុខរបរជាអ្នកលក់ត្រីនៅផ្សារដើមគ រាជធានីភ្នំពេញ ហើយជារៀងរាល់ថ្ងៃ គឺចាប់ពីម៉ោង២រហូតម៉ោង៣ទៀបភ្លឺ ពួកគាត់ទាំង២នាក់បានជិះម៉ូតូទៅលក់ត្រីនៅផ្សារដើមគ រាជធានីភ្នំពេញ លុះល្ងាចបានត្រឡប់មកវិញ។
ប្រភពដដែលបន្តទៀតថា ប៉ុន្តែដល់ថ្ងៃទី១២ ខែមេសា ដោយសារតែផ្ទុះកូវីដខ្លាំងពេក ទើបពួកគាត់សម្រាកនៅផ្ទះ។ យ៉ាងនេះក្តី ក្រុមការងារនៃមន្ទីរសុខាភិបាលខេត្តកំពង់ឆ្នាំង ក៏បានយកសំណាកពួកគាត់នៅថ្ងៃទី២៣ ខែមេសា ហើយលទ្ធផលចេញនៅថ្ងៃទី២៤ ខែមេសា គឺពួកគាត់មានវិជ្ជមានកូវីដ១៩ ទាំងពីរនាក់ប្ដីប្រពន្ធតែម្តង។
ហេតុនេះហើយ រដ្ឋបាលសាលាខេត្ត ក៏បានអំពាវនាវឲ្យប្រជាពលរដ្ឋដែលពាក់ព័ន្ធជាមួយនឹងគ្រួសារទាំង២នាក់ខាងលើនេះ សូមប្រញាប់ទៅយកសំណាកពិនិត្យជាបន្ទាន់ ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩ ។
ដោយឡែក លោកវេជ្ជ ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានបញ្ជាក់នៅរសៀលថ្ងៃទី២៥ ខែមេសានេះថា ចំពោះស្ត្រីជាអាជីវករលក់មាសនៅផ្សារស្រុកកំពង់ត្រឡាច ចំនួន៤នាក់ដែលរកឃើញវិជ្ជមានកូវីដ១៩ យើងបានយកអ្នកពាក់ព័ន្ធជាមួយគាត់មានចំនួន១១៧នាក់ទៅធ្វើតេស្តលើកទី១ គឺអវិជ្ជមានទាំងអស់។ ហើយសម្រាប់ប្ដីប្រពន្ធ២នាក់នៅភូមិដើមពពេល ឃុំថ្មឥដ្ឋ ស្រុកកំពង់ត្រឡាច ដែលទើបរកឃើញវិជ្ជមាននេះ យើងក៏បានយកសំណាកអ្នកពាក់ព័ន្ធនឹងក្រុមគ្រួសារសរុបចំនួន១៦នាក់ទៅធ្វើតេស្តរហ័សក៏អវិជ្ជមានដែរ។
លោកប្រធានមន្ទីរសុខាភិបាលបានរំឭកថា ចាប់តាំងពីចម្លងសហគមន៍ 20 កុម្ភៈ ខេត្តកំពង់ឆ្នាំងមានអ្នកឆ្លងសរុបចំនួន១០នាក់ ក្នុងនោះស្លា.ប់១នាក់ និងជាសះស្បើយ២នាក់ និងកំពុងសម្រាកព្យាបាលនៅមន្ទីរពេទ្យខេត្តកំពង់ឆ្នាំង ចំនួន៧នាក់ ៕
ចែករំលែកព័តមាននេះ