រាជធានីភ្នំពេញ ៖ ស្របពេលជំងឺកូវីត១៩ មានការផ្ទុះឡើងយ៉ាងខ្លាំងនៅក្នុងរាជធានីភ្នំពេញនោះ អាជ្ញាធរបានសម្រេចបិទផ្សាររដ្ឋ និងផ្សារមិនរៀបរយទាំងអស់នៅទូទាំងរាធានីភ្នំពេញ រយៈពេល១៤ថ្ងៃ ដើម្បីប្រយុទ្ធប្រឆាំងជាមួយជំងឺមួយប្រភេទនេះជាសកល មិនឱ្យឆ្លងរីករាលដាលកាន់តែខ្លាំងថែមទៀត។ ក្រោយពេលមានសេចក្ដីសម្រេចបែបនេះគេសង្កេតឃើញថា…
រាជធានីភ្នំពេញ ៖ ស្របពេលជំងឺកូវីត១៩ មានការផ្ទុះឡើងយ៉ាងខ្លាំងនៅក្នុងរាជធានីភ្នំពេញនោះ អាជ្ញាធរបានសម្រេចបិទផ្សាររដ្ឋ និងផ្សារមិនរៀបរយទាំងអស់នៅទូទាំងរាធានីភ្នំពេញ រយៈពេល១៤ថ្ងៃ ដើម្បីប្រយុទ្ធប្រឆាំងជាមួយជំងឺមួយប្រភេទនេះជាសកល មិនឱ្យឆ្លងរីករាលដាលកាន់តែខ្លាំងថែមទៀត។
ក្រោយពេលមានសេចក្ដីសម្រេចបែបនេះគេសង្កេតឃើញថា ផ្សារទាំងតូចទាំងធំរាប់រយកន្លែងនៅទូទាំងរាជធានីភ្នំពេញបានបិទព្រមៗគ្នានាថ្ងៃទី២៤ ខែមេសា ឆ្នាំ២០២១ ដើម្បីចូលរួមអនុវត្តវិធានការរាជរដ្ឋាភិបាល ក៏ដូចជាក្រសួងសុខាភិបាលនិងសាលារាជធានីភ្នំពេញ នេះបើនិយាយជារួម។
និយាយដោយឡែក បើក្រឡេកទៅមើលខណ្ឌពោធិ៍សែនជ័យឯណោះវិញមានផ្សាររដ្ឋ ផ្សារឯកជន ផ្សារវិនិយោគ ផ្សារសហគមន៍ ផ្សារចល័ត និងផ្សារទំនើបសរុបជិត៤០ទីតាំងត្រូវបានបិទផ្អាកដំណើរការរយៈពេល១៤ថ្ងៃនេះដែរ។
បើតាមអាជ្ញាធរខណ្ឌមួយនេះបានឲ្យដឹងថា នៅក្នុងអំពេលជម្ងឺCOVID-19 កំពុងឆ្លងរាលដាលយ៉ាងឆាប់រហ័សគួរឲ្យខ្លាចនេះ ផ្សារទាំងអស់នៅក្នុងខណ្ឌពោធិ៍សែនជ័យសរុបចំនួន៣៩ទីតាំងត្រូវបានផ្អាកដំណើរជាបណ្ដោះអាសន្នរយៈពេល១៤ថ្ងៃដែលក្នុងនោះមានផ្សាររដ្ឋចំនួន៣ទីតាំង ផ្សារវិនិយោគចំនួន២ទីតាំង ផ្សារឯកជនចំនួន១៧ទីតាំង ផ្សារទំនើបចំនួន៤ទីតាំង ផ្សារចល័តចំនួន១១ទីតាំង និងផ្សារសហគមន៍ចំនួន២ទីតាំង។
តាមប្រភដដែលបានបន្តថា នៅក្នុងចំណោមផ្សារទាំង៣៩ទីតាំងខាងលើគឺមានផ្សារចំនួន៥ត្រូវបានបិទមុនគេគឺចាប់តាំងពីថ្ងៃទី១៩ និងទី២០ ខែមសា មកម្ល៉េះ បន្ទាប់ពីបានរកឃើញមានអ្នកវិជ្ជមានCOVID-19 បានចេញចូលទៅកាន់ផ្សារទាំងនោះ ហើយក៏អាជីវករឆ្លងវីរុសនេះយ៉ាងឆាប់រហ័សគួរឲ្យព្រួយបារម្ភ។ ក្នុងនោះទី១-ផ្សារស៊ិនជូរីផ្លាហ្សា បណ្ដោះអាសន្នស្ថិតនៅលើទីតាំងសួនកុមារពោធិ៍ចិនតុង ភូមិប៉ប្រកខាងជើង សង្កាត់កាកាបទី១ ២-ផ្សារត្រពាំងថ្លឹង ៣-ផ្សារឯករាជ្យ១ ស្ថិតនៅក្នុងភូមិត្រពាំងថ្លឹង សង្កាត់ចោមចៅទី១ ៤-ផ្សារទួលពង្រ ស្ថិតនៅក្នុងភូមិទួលពង្រ សង្កាត់ចោមចៅទី១ និង៥-ផ្សារពោធិ៍ចិនតុង ស្ថិតនៅក្នុងភូមិប៉ប្រកខាងជើង សង្កាត់កាកាបទី១។
តាមប្រភពខាងលើបានបញ្ជាក់បន្ថែមទៀតថា ពេលនោះផ្សារជាច្រើនក្រៅពីផ្សារទាំង៥ខាងលើបាននៅដំណើរការជាធម្មតានៅឡើយ ប៉ុន្តែដោយសារតែការឆ្លងពុំមានការថមថយ ទើបនៅថ្ងៃទី២៤ ខែមសា សាលារាជធានីភ្នំពេញបានការសម្រេចបិទផ្សាររដ្ឋ និងផ្សារមិនរៀបរយទាំងអស់នៅទូទាំងរាធានីភ្នំពេញ រយៈពេល១៤ថ្ងៃ ដើម្បីប្រយុទ្ធប្រឆាំងជាមួយជម្ងឺសកលមួយនេះ ។ ដោយអនុវត្តនូវវិធានការសុខាភិបាលដែលចេញដោយសាលារាជធានីភ្នំពេញនេះទើបបានឈានដល់ការផ្អាកដំណើរការផ្សារទាំងអស់នៅក្នុងខណ្ឌតែម្ដង ទន្ទឹមនិងនេះក៏ទទូចសុំឲ្យបងប្អូនប្រជាពលរដ្ឋ អាជីវករ និងអ្នកពាក់ព័ន្ធទាំងអស់អនុវត្តនូវវិធានការ៣កុំនិង៣ការពា ព្រមទាំងប្រញាប់ទៅធ្វើតេស្តរកមេរោគកូវីដជាបន្ទាន់ផងដែរ៕
ចែករំលែកព័តមាននេះ