រាជធានីភ្នំពេញ ៖ ក្រោយពីបិទខ្ទប់ផ្សារជម្ពូវ័នទាំងស្រុង ទៅតាមគោលការណ៍របស់សាលារាជធានីភ្នំពេញរួចមក ក្រុមគ្រូពេទ្យជំនាញបានចុះយកសំណាកបងប្អូនអាជីវករផ្សារមួយនេះ ដើម្បីធ្វើតេស្តរកជំងឺ COVID-19 ព្រោះតែកន្លងមក ធ្លាប់មានអ្នកវិជ្ជមាន COVID-19…
រាជធានីភ្នំពេញ ៖ ក្រោយពីបិទខ្ទប់ផ្សារជម្ពូវ័នទាំងស្រុង ទៅតាមគោលការណ៍របស់សាលារាជធានីភ្នំពេញរួចមក ក្រុមគ្រូពេទ្យជំនាញបានចុះយកសំណាកបងប្អូនអាជីវករផ្សារមួយនេះ ដើម្បីធ្វើតេស្តរកជំងឺ COVID-19 ព្រោះតែកន្លងមក ធ្លាប់មានអ្នកវិជ្ជមាន COVID-19 ចេញ-ចូលទៅទិញអីវ៉ាន់នៅក្នុងផ្សារខាងលើ ដែលបានបង្កឲ្យមានការព្រួយបារម្ភអំពីហានិភ័យបំផុត ព្រោះផ្សារនេះគឺជាផ្សារធំមួយដែលក្នុង១ថ្ងៃៗមានមនុស្សចេញ-ចូលច្រើនមិនចាញ់ផ្សារធំៗផ្សេងទៀតឡើយ ។
ផ្សារជម្ពូវ័ននេះ មានទីតាំងស្ថិតនៅតាមបណ្ដោយផ្លូវជាតិលេខ៤ ស្ថិតក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ហើយត្រូវបានអាជ្ញាធរបិទផ្អាកដំណើរការជាបណ្ដោះអាសន្នរយៈពេល១៤ថ្ងៃ ចាប់ពីថ្ងៃទី២៤ ខែមេសា ឆ្នាំ២០២១តទៅ។
នៅថ្ងៃដដែលនោះ ក្រុមគ្រូពេទ្យជំនាញបានចាប់ផ្ដើមចុះយកសំណាកលើក្រុមអាជីវករផ្សារនេះ ជំហានដំបូងចំនួន៤១១នាក់ ហើយគិតត្រឹមវេលាល្ងាចថ្ងៃដដែលនោះក៏បានរកឃើញអ្នកមានវិជ្ជមាន COVID-19 ចំនួន១៣នាក់ ក្នុងនោះប្រុសចំនួន៤នាក់ និងស្រីចំនួន៩នាក់។
បើតាមអាជ្ញាធរសង្កាត់ចោមចៅទី៣ បានប្រាប់ឲ្យដឹងថា អាជីវករផ្សារជម្ពូវ័ន ដែលត្រូវយកសំណាកសរុបជាង១ពាន់នាក់ឯណោះ ហើយជំហានដំបូងទើបយកបានជាង៤០០នាក់ និងរកឃើញអ្នកវិជ្ជមាន១៣នាក់ទៅហើយ ចុះទំរាំតែធ្វើចប់គ្រប់គ្នាពុំដឹងថា រកឃើញអ្នកវិជ្ជមានប៉ុន្មាននាក់ទៀតនោះទេ។
ប្រការនេះ គឺជាការព្រួយបារម្ភបំផុត ហើយនៅព្រឹកថ្ងទី២៥ ខែមេសា ឆ្នាំ២០២១នេះ ក្រុមគ្រូពេទ្យបាននិងកំពុងបន្តការយកសំណាក និងធ្វើតេស្តជូនក្រុមអាជីវករផ្សារនេះជាជំហានទី២ទៀត ដើម្បីវិនិច្ឆ័យរកមេរោគនេះទៀត។
ប្រភពដដែលបន្តថា ទីតាំងដែលត្រូវយកសំណាកស្ថិតនៅក្នុងសាលាបឋមសិក្សាជម្ពូវ័ន ភូមិជម្ពូវ័ន សង្កាត់ចោមចៅទី៣ ទល់មុខនឹងផ្សារនោះតែម្ដង ហើយពុំមែនតែអាជីវករផ្សារជម្ពូវ័នេះមួយទេដែលតម្រូវឲ្យទៅយកសំណាកនៅទីនោះ គឺមានអាជីវករតាមផ្សារនានាមួយចំនួនទៀត នៅក្នុងសង្កាត់ចោមចៅទី៣នេះ ដូចជាផ្សារត្រពាំងពោធិ៍, ផ្សារឯករាជ្យ២, ផ្សារព្រៃទា និងផ្សារថ្នល់បំបែកជាដើម ក៏ត្រូវទៅយកសំណាកនៅទីនោះដែរ។
ហើយអ្វីដែលឈានដល់ការយកសំណាកធ្វើតេស្តនេះ គឺដោយសារតែកាលពីពេលកន្លងមក បានរកឃើញអ្នកមានវិជ្ជមាន COVID-19 បានចេញ-ចូលទៅកាន់ផ្សារនេះ ទើបក្រោយពេលផ្សារនេះក្រុមគ្រូពេទ្យចាប់ផ្ដើមធ្វើតេស្តលើអាជីវករ ហើយនៅថ្ងៃដំបូងស្រាប់តែរកឃើញអាជីវករមានវិជ្ជមានរហូតដល់១៣នាក់ទៅបែបនេះហើយ នេះជាការគួរឲ្យព្រួយបារម្ភមួយ ។
ប្រភពខាងលើបានបញ្ជាក់បន្ថែមទៀតថា ស្របពេលនេះដែរ អាជ្ញាធរក៏បានអំពាវនាវសុំឲ្យេបងប្អូនអាជីវករ និងប្រជាពលរដ្ឋទាំងអស់ដែលពាក់ព័ន្ធជាមួយផ្សារខាងលើ សូមទៅទទួលយកសំណាកជាបន្ទាន់ ដើម្បីទប់ស្កាត់ការឆ្លងរីករាលដាលជំងឺ COVID-19 ។ ហើយក្នុងកាលៈទេសៈដែលរកឃើញមានវិជ្ជមាន ងាយស្រួលគ្រូពេទ្យព្យាបាល និងឆាប់ជាសះស្បើយមិនគ្រោះថ្នាក់ដល់ជីវិត ហើយក៏មិនចម្លងដល់គ្រួសារសាច់ញាតិ និងអ្នកដទៃទៀតផងដែរ៕
ចែករំលែកព័តមាននេះ