ខេត្តកំពង់ឆ្នាំង ៖ ពីរនាក់ប្ដីប្រពន្ធដែលសមត្ថកិច្ចអះអាងថា បានល្មើសនឹងបទបញ្ជារាជរដ្ឋាភិបាលលួចចេញពីរាជធានីភ្នំពេញ មកកាន់លំនៅដ្ឋានស្ថិតក្នុងសង្កាត់កំពង់ឆ្នាំង ក្រុងកំពង់ឆ្នាំង ទើបសមត្ថកិច្ចក៏ដូចជាមន្ត្រីជំនាញនាំយកទៅឲ្យធ្វើចត្តាឡីស័ក ។ ប៉ុន្តែ នៅវេលាម៉ោង១០…
ខេត្តកំពង់ឆ្នាំង ៖ ពីរនាក់ប្ដីប្រពន្ធដែលសមត្ថកិច្ចអះអាងថា បានល្មើសនឹងបទបញ្ជារាជរដ្ឋាភិបាលលួចចេញពីរាជធានីភ្នំពេញ មកកាន់លំនៅដ្ឋានស្ថិតក្នុងសង្កាត់កំពង់ឆ្នាំង ក្រុងកំពង់ឆ្នាំង ទើបសមត្ថកិច្ចក៏ដូចជាមន្ត្រីជំនាញនាំយកទៅឲ្យធ្វើចត្តាឡីស័ក ។ ប៉ុន្តែ នៅវេលាម៉ោង១០ និង ១០នាទីព្រឹក ថ្ងៃទី២៤ មេសា ខណៈដែរមន្ត្រីជំនាញនិងសមត្ថកិច្ចចុះទៅយកគ្រួសារទាំងពីរនាក់ប្ដីប្រពន្ធមិនព្រមឡើងឡានមកជាមួយសមត្ថកិច្ចឡើយ និងបានធ្វើការតវ៉ាព្រមជាមួយជេរប្រមាថលើសមត្ថកិច្ច លោកមេភូមិ និងចៅសង្កាត់ផងដែរ ទើបសមត្ថកិច្ចនិងមន្ត្រីជំនាញ ចាប់បង្ខំអស់រយៈពេលជាង២ម៉ោងទើបយកមកបាន ។ យ៉ាងនេះក្តី ក្រោយពីទៅមណ្ឌលចត្តាឡីស័កមិនបានប៉ុន្មានផង ស្រាប់តែគេឃើញពីរនាក់ប្ដីប្រពន្ធនោះត្រឡប់មកផ្ទះវិញ ធ្វើឲ្យអាជ្ញាធរមូលដ្ឋានមានការកើតយើងឆ្ងល់ជាខ្លាំង ។
តាមការបញ្ជាក់របស់មន្ត្រីនគរបាលមូលដ្ឋានបានឲ្យដឹងថា គ្រួសារដែលល្មើសនឹងបទបញ្ជារបស់រាជរដ្ឋាភិបាលខាងលើប្ដីមានឈ្មោះ ហែម ពន្លឺ អាយុ៣៧ឆ្នាំ ចំណែកប្រពន្ធមានឈ្មោះ អឹម ស្រីល័ក្ខ អាយុ៣៨ឆ្នាំ ពួកគាត់ទាំងពីរនាក់ប្ដីប្រពន្ធរស់នៅភូមិទួលក្រឡាញ់សង្កាត់កំពង់ឆ្នាំង ក្រុងកំពង់ឆ្នាំង ។
ប្រភពដដែលបានបន្តថា ពួកគាត់ទាំងពីរនាក់ប្ដីប្រពន្ធបានជិះម៉ូតូមួយគ្រឿងចេញពីខណ្ឌសែនសុខ រាជធានីភ្នំពេញមកលំនៅឋានក្នុងភូមិទួលក្រឡាញ់ ហើយក៏បានដឹងដល់អាជ្ញាធរមូលដ្ឋាន និងសមត្ថកិច្ចក៏បានទៅនាំខ្លួនឱ្យទៅធ្វើចត្តាឡីស័ក ប៉ុន្តែដោយសារតែបុរសជាប្តីមានការតវ៉ាមិនព្រមទៅតាមសម្រួលឡើយ ហើយបានចាប់បង្ឃាំងនិងកំរាមកំហែង ប្រពន្ធមិនឲ្យចេញទៅតាមការហៅរបស់សមត្ថកិច្ចឡើយ។
ពេលនោះ សមត្ថកិច្ចមន្ត្រីជំនាញនិងអាជ្ញាធរមូលដ្ឋានបានបញ្ចុះបញ្ចូលរយៈពេលជាង២ម៉ោងនៅតែមិនព្រមចេញពីក្នុងផ្ទះ ទៅតាមការហៅរបស់មន្ត្រីជំនាញឡើយ ទើបសមត្ថកិច្ចបានប្រើកម្លាំងបាយចូលចាប់យកចេញពីក្នុងផ្ទះនិងបាញ់អាកុល ហើយដាក់ឡានយកទៅធ្វើ ចត្តាឡីស័ក នៅមណ្ឌល ចត្តាឡីស័កសាលាគំរូ ក្រុងកំពង់ឆ្នាំងតែម្ដង ។
យ៉ាងនេះក្តីស្រាប់តែប៉ុន្មានម៉ោងក្រោយមក គេឃើញពីរនាក់ប្ដីប្រពន្ធបានត្រឡប់មកផ្ទះវិញធ្វើឲ្យអាជ្ញាធរមូលដ្ឋាននិងសមត្ថកិច្ចមានការងឿងឆ្ងល់ជាខ្លាំង ។
ពាក់ព័ន្ធនឹងបញ្ហានេះដែរ លោកវិជ្ជ.ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានឲ្យដឹងថាប្ដីប្រពន្ធទាំងពីរនាក់ធ្លាប់មក ទំនាក់ទំនងថាបានធ្វើចត្តាឡីសក័ នឹងយកសំណាក រួចហើយ នៅរាជធានីភ្នំពេញ ដោយលទ្ធផលអវិជ្ជមាន ។ លោកវេជ្ជបណ្ឌិតបានបញ្ជាក់ទៀតថា បន្ទាប់ពីយកទៅដល់មណ្ឌល ចត្តាឡីស័កនាព្រឹកមិញក៏បានយកសំណាក ពួកគាត់ ទាំងពីរនាក់ប្ដីប្រពន្ធទៅពិនិត្យផងដែរ (ប្រើម៉ាស៊ីនធ្វើតេស្តលឿន) លទ្ធផលគឺអវិជ្ជមាន ។ហេតុនេះហើយទើបខាងមន្ទីរក៏បានអោយគាត់វិលត្រឡប់ទៅផ្ទះវិញ ៕ ដោយ៖ ពៅ សុខហ៊ាន
ចែករំលែកព័តមាននេះ