ខេត្តស្វាយរៀង៖ នៅព្រឹកថ្ងៃពុធ ទី២១ ខែមេសា ឆ្នាំ២០២១ ឯកឧត្ដមតូច ប៉ូលីវ៉ា អភិបាលរង ខេត្តស្វាយរៀង និងជាអនុប្រធានគណៈកម្មាធិការដោះស្រាយបាតុកម្ម កូដកម្ម គ្រប់មុខសញ្ញា ខេត្ត តំណាងឯកឧត្ដមអភិបាលខេត្ត បានអញ្ជើញដឹកនាំក្រុមការងារមន្ទីរការងារ និងបណ្ដុះបណ្ដាលវិជ្ជាជីវៈខេត្ត ចូលរួមសម្របសម្រួលបញ្ហាកូដកម្ម នៅរោងចក្រ ម៉ាស្ទ័រប្លេកស្មីត មេថល ប្រូដាក់ ឯ.ក ផលិតសម្ភារៈតុក្កតា នៅក្នុងតំបន់សាន់តុងសាន់សែល ស្ថិតនៅភូមិព្រៃធំ សង្កាត់ព្រៃអង្គុញ ក្រុងបាវិត រវាងតំណាងកម្មករនិយោជិត និងតំណាងក្រុមហ៊ុន ដើម្បីសម្រុះសម្រួលបញ្ហា ដែលក្រុមកម្មករនិយោជិតទាមទារ។
ឯកឧត្ដមតូចប៉ូលីវ៉ា បានណែនាំដល់ភាគីទាំងពីរ ឲ្យចូលរួមអនុវត្តតាមការណែនាំរបស់រាជរដ្ឋាភិបាល ក្រសួងសុខាភិបាល រដ្ឋបាលខេត្តស្វាយរៀង និងអនុវត្តតាមអនុសាសន៍របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការទប់ស្កាត់ ការឆ្លងរាលដាលជំងឺកូវីដ១៩។
ការប្រមូលផ្ដុំតវ៉ាទាមទារលក្ខខណ្ឌការងាររបស់កម្មករនិយោជិត នៅខាងមុខរោងចក្រ ដោយរូបភាពអហឹង្សា និងបានស្នើសុំចំនួន ២ចំណុច គណៈកម្មាធិការបានដោះស្រាយផ្សះផ្សារភាគីទាំង២ តាមការសំណូម ជាលទ្ធផល ដំណើរការផ្សះផ្សារដល់ម៉ោង ១២ និង០០នាទីថ្ងៃត្រង់ គ្រប់សំណូមពរភាគីទាំង២ បានព្រមព្រៀងគ្នា (សះជា) ហើយកម្មករនិយោជិត បានសន្យាចូលធ្វើការវិញ៕ ដោយ៖ វ៉ាន់ ប៊ុនធឿន
ចែករំលែកព័តមាននេះ