រាជធានីភ្នំពេញ ៖ បងប្អូនប្រជាពលរដ្ឋជាច្រើនបាននាំគ្នាសម្រុកទៅចាក់វ៉ាក់សាំង ដើម្បីការពារការឆ្លងជម្ងឺកូវីដ១៩ នៅសាលាបឋមសិក្សាភូមិឬស្សី ស្ថិតតាមបណ្តោយផ្លូវលេខ២១៧ ក្នុងសង្កាត់ស្ទឹងមានជ័យ២ ខណ្ឌមានជ័យ ដោយបានឈរប្រជ្រៀតគ្នា ពុំខ្វាយខ្វល់ពីការរក្សានូវគម្លាតសុវត្ថិភាពឡើយ…
រាជធានីភ្នំពេញ ៖ បងប្អូនប្រជាពលរដ្ឋជាច្រើនបាននាំគ្នាសម្រុកទៅចាក់វ៉ាក់សាំង ដើម្បីការពារការឆ្លងជម្ងឺកូវីដ១៩ នៅសាលាបឋមសិក្សាភូមិឬស្សី ស្ថិតតាមបណ្តោយផ្លូវលេខ២១៧ ក្នុងសង្កាត់ស្ទឹងមានជ័យ២ ខណ្ឌមានជ័យ ដោយបានឈរប្រជ្រៀតគ្នា ពុំខ្វាយខ្វល់ពីការរក្សានូវគម្លាតសុវត្ថិភាពឡើយ ។
ការសម្រុកនាំគ្នាទៅចាក់វាំងសាំងការពារជម្ងឺកូវីដ១៩នោះ គឺនៅរសៀល ថ្ងៃទី២២ ខែមេសា ឆ្នាំ២០២១នេះនៅនឹងខាងមុខបរិវេណសាលាបឋមសិក្សាផ្ទាល់តែម្តង ដោយបងប្អូនពលរដ្ឋសុខចិត្តឈរប្រជ្រៀតគ្នាទាំងហាលក្តៅចែសតែម្តង ។
តាមការអង្កេតឃើញជាក់ស្តែង ឃើញថា បងប្អូនពលរដ្ឋដែលបានឈរប្រជ្រៀតគ្នាទាំងនោះ គឺសុទ្ធតែមានពាក់ម៉ាស់ការពារគ្រប់ៗគ្នា ដោយឡែកចំពោះអាកុលសម្រាប់បាញ់សម្លាប់មេរោគវិញ គឺមិនមានគ្រប់ៗគ្នាឡើយ ដោយអ្នកខ្លះមាន អ្នកខ្លះអត់ ។ ហើយបើការរក្សាគម្លាតសុវត្ថិភាពវិញ គឺពុំមានតែម្តង សម្រាប់អ្នករងចាំនៅក្រៅរបងលើកលែងតែអ្នកដែលត្រូវបានហៅលេងរៀងអោយចូលក្នុងបរិវេណសាលាប៉ុណ្ណោះ ដែលបានរក្សាគម្លាតត្រឹមត្រូវព្រោះមានក្រុមអាជ្ញាធរនៅក្នុងបរិវេណជួយសម្រួល និងកំណត់ពីការឈររក្សាគម្លាតសុវត្ថិភាព ។
ដោយឡែកចំពោះបរិវេណនៅខាងក្រៅវិញ គឺពុំមានឃើញមានវត្តមានក្រុមអាជ្ញាធរមានសមត្ថកិច្ច ដាក់កម្លាំងឈរសម្រួលដល់ពលរដ្ឋដែលទៅទទួលវ៉ាក់សាំងអោយពួកគាត់រក្សានូវគម្លាតសុវត្ថិភាពឡើយ ។
កត្តាឈរប្រជ្រៀតគ្នានេះហើយដែលជាចំណុចចម្បងខ្ពស់បំផុតធ្វើអោយមានការឆ្លងរីករាលដាលនៃវីរុសកូវីដ១៩ ពីមនុស្សម្នាក់ទៅមនុស្សម្នាក់ និងបន្តចម្លងទៅជាច្រើននាក់ដោយមិនបានដឹងខ្លួន ជាក់ស្តែងដូចជា ការឆ្លងនៅផ្សារដើមគ កាលពីពេលកន្លងទៅផងដែរ កំឡុងពេលដែលបងប្អូនពលរដ្ឋប្រជ្រៀតគ្នាសម្រុកទៅទិញម្ហូបអាហារ នៅមុនមួយថ្ងៃ នៃសេចក្តីសម្រេចបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល ។
សូមបញ្ជាក់ថា ទីតាំងចាក់វ៉ាក់សាំងខាងលើ គឺស្ថិតក្នុងសង្កាត់ស្ទឹងមានជ័យ២ ដែលជាសង្កាត់១ ក្នុងចំណោមសង្កាត់៣ នៃខណ្ឌមានជ័យ ត្រូវបានចាត់បញ្ចូលជាតំបន់ក្រហម ដែលជាតំបន់រកឃើញថា មានការឆ្លងរាលដាលខ្លាំងនៃជម្ងឺកូវីដ១៩ ៕
ចែករំលែកព័តមាននេះ