ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា មានការភ្ញាក់ផ្អើលមួយនៅកណ្តាលទីប្រជុំជន ក្រុងព្រះវិហារ ដែលបង្កឲ្យមានអគ្គិភ័យកើតឡើង ដោយសារតែមានបុរសសតិមិនគ្រប់ម្នាក់បានទិញសាំងយកមកដុតបំផ្លាញផ្ទះខ្លួនឯង បណ្តាលឲ្យខូចខាតលំនៅឋានទាំងស្រុងតែម្តង បង្កឱ្យមានការភ្ញាក់ផ្អើលនៅចំណុចភូមិស្រះឈូក សង្កាត់កំពង់ប្រណាក…
ខេត្តព្រះវិហារ ៖ បើតាមសេចក្តីរាយការណ៍បានឱ្យដឹងថា មានការភ្ញាក់ផ្អើលមួយនៅកណ្តាលទីប្រជុំជន ក្រុងព្រះវិហារ ដែលបង្កឲ្យមានអគ្គិភ័យកើតឡើង ដោយសារតែមានបុរសសតិមិនគ្រប់ម្នាក់បានទិញសាំងយកមកដុតបំផ្លាញផ្ទះខ្លួនឯង បណ្តាលឲ្យខូចខាតលំនៅឋានទាំងស្រុងតែម្តង បង្កឱ្យមានការភ្ញាក់ផ្អើលនៅចំណុចភូមិស្រះឈូក សង្កាត់កំពង់ប្រណាក ក្រុងព្រះវិហារ ខេត្តព្រះវិហារ ។
បើតាមសាក្សីនៅនឹងកន្លែងកើតហេតុបានរៀបរាប់ថា មុនពេលកើតហេតុ នៅវេលាម៉ោង៦និង៣០នាទីព្រឹក ថ្ងៃទី២២ ខែមេសា ឆ្នាំ២០២១នេះ នៅចំណុចកើតហេតុខាងលើ គេបានឃើញបុរសម្នាក់ដែលមានសតិមិនគ្រប់ នឹងជាម្ចាស់ផ្ទះផងដែរ បានមកពីខាងក្រៅផ្ទះ ហើយក៏ឃើញមានដបសាំងមកជាមួយទៀតផង។
សាក្សីខាងលើបន្តថា ខណៈពេលនោះ មិនទាន់បានប៉ុន្មាននាទីផង ក៏ស្រាប់តែមានអណ្តាតភ្លើងឆាបឆេះឡើងសន្ធោសន្ធៅតែម្តង ភ្លាមៗនោះបងប្អូនសាច់ញាតិក៏បានយកបំពង់ពន្លត់អគ្គិភ័យមកជួយពន្លត់អស់៣បំពង់ ប៉ុន្តែភ្លើងមិនបានថមថយទៅវិញនោះទេ ។ ហើយគ្រាកំពុងតែឆោឡោភ្ញាក់ផ្អើលនោះ ជនសង្ស័យដែលមានសតិមិនប្រក្រតី ក៏បានព្យាយាមយកភួយ មុង ខោអាវ បោះចូលក្នុងភ្នក់ភ្លើងបន្ថែមទៀត បង្កឱ្យអណ្តាតភ្លើងឆាបឆេះកាន់តែខ្លាំងឡើងៗ រហូតគ្រប់គ្រងស្ថានភាពលែងបានតែម្តង។
ភ្លាមៗនោះផងដែរ លោក ប្រាក់ សុវណ្ណ អភិបាលខេត្តព្រះវិហារ ក៏បានចាត់ឱ្យកងកម្លាំងគ្រប់ប្រភេទចេញអន្តរាគមន៍បន្ទាន់ តែដោយសារស្ថានភាពភ្លើងមានសភាពឆេះខ្លាំងមិនអាចជួយពន្លត់ទាន់បានទេ ទើបធ្វើអោយលំនៅឋាននោះឆាបឆេះស្ទើរទាំងស្រុងទៅហើយ ។
លោកបន្ថែមថា ទោះជាបែបនេះក្តី កម្លាំងអន្តរាគមន៍បានជួយទប់ស្កាត់អគ្គិភ័យនេះមិនអោយរាលដាលឆេះដល់ផ្ទះអ្នកជិតខាងឡើយ ។
ក្រោយកើតហេតុ លោកអភិបាលខេត្តក៏បានចាត់អោយសមត្ថកិច្ចធ្វើការស្រាវជ្រាវរកជនសង្ស័យ ដើម្បីមានចំណាត់ការតាមច្បាប់ជាធរមានផងដែរ ។
សូមបញ្ជាក់ថា អគ្គិភ័យខាងលើនេះ ពុំមានអ្នកណាម្នាក់រងរបួស ឬក៏គ្រោះថ្នាក់ដល់អាយុជីវិតឡើយ ។ ចំណែកជនសង្ស័យខាងលើនេះ បានរត់គេចខ្លួនភ្លាមៗ បន្ទាប់ពីហេតុការណ៍នេះបានកើតឡើង ៕
ចែករំលែកព័តមាននេះ