ខេត្តកំពង់ឆ្នាំង ៖ យុវជនម្នាក់បានរងរបួសធ្ងន់ និងម្នាក់ទៀតរងរបួសស្រាល ក្នុងហេតុការណ៍រន្ទះបាញ់មួយបានកើតឡើងកាលពីវេលាម៉ោង3រសៀលថ្ងៃទី21 ខែមេសា ឆ្នាំ 2021 នៅចំណុចបឹងកំពីងពួយក្នុងភូមិសាស្ត្រ ព្រំប្រទល់ខេត្តកំពង់ឆ្នាំង និងខេត្តកំពង់ធំ ។
លោកវរសេនីយ៍ឯក ប៉ាល់ ជឿន អធិការនគរបាលស្រុកកំពង់លែង បានឲ្យដឹងថា ជនរងគ្រោះដែលរងរបួសធ្ងន់ស្រាលខាងលើ ក្នុងនោះម្នាក់ឈ្មោះ ណាល់ នីង ភេទប្រុស អាយុ15ឆ្នាំ របស់ធ្ងន់ ចំណែកយុវជនម្នាក់ទៀតដែលរងរបួសស្រាលឈ្មោះ ឆែ ឆើត អាយុ 26 ឆ្នាំ ។ ជនរងគ្រោះទាំងពីរនាក់មានទីលំនៅភូមិប្រាសាទ ឃុំដារ ស្រុកកំពង់លែង ខេត្តកំពង់ឆ្នាំង។
តាមប្រភពដដែលបានបន្តថា មុនពេលកើតហេតុ យុវជនរងគ្រោះទាំង2នាក់បាននាំគ្នាទៅដាក់ប៉ោង(ជាឧបករណ៍នេសាទម្យ៉ាង) ដើម្បីចាប់អន្ទង់នៅក្នុងភូមិសាស្ត្រខាងលើ លុះដល់វេលាកើតហេតុ ក៏មានភ្លៀងធ្លាក់ផង ព្រមទាំងមានខ្យល់ខ្លាំងផង ស្រាប់តែមានរន្ទះបាញ់ បណ្ដាលឲ្យយុវជន២នាក់រងរបួសធ្ងន់និងស្រាលតែម្តង ។
ក្រោយពេលកើតហេតុ ជនរងគ្រោះដែលរងរបួសស្រាលបានព្យាយាមទូរស័ព្ទទៅបងប្អូន និងក្រុមគ្រួសារឲ្យមកជួយ ហើយក៏បានដឹកយកជនរងគ្រោះ ទាំងពីរនាក់ទៅសង្គ្រោះនៅមណ្ឌលសុខភាព ឃុំដារ ដែលនៅជិតផ្ទះជនរងគ្រោះ ។
គួរបញ្ជាក់ដែរថា នេះជាករណីគ្រោះថ្នាក់ដោយសាររន្ទះបាញ់លើកទី2ហើយ ក្នុងខែពិសាខដើមឆ្នាំនេះ ដែលបណ្ដាលអោយមនុស្សម្នាក់បានស្លា.ប់ និង3នាក់បានរងរបួសធ្ងន់ស្រាល ៕
ចែករំលែកព័តមាននេះ