ខេត្តប៉ៃលិន ៖ ប្រជាពលរដ្ឋជាង២០គ្រួសាររស់នៅចំណុចអូរតាលី ស្ថិតក្នុងភូមិក្ងោក ឃុំស្ទឹងកាច់ ស្រុកសាលាក្រៅ ខេត្តប៉ៃលិន បាននាំគ្នារអ៊ូរទាំនឹងក្លិនទឹកស្អុយដំឡូងមី ដែលគេបង្ហូរចេញពីស្តង់មួយកន្លែង ចូលក្នុងប្រឡាយក្បែរមាត់ផ្លូវ…
ខេត្តប៉ៃលិន ៖ ប្រជាពលរដ្ឋជាង២០គ្រួសាររស់នៅចំណុចអូរតាលី ស្ថិតក្នុងភូមិក្ងោក ឃុំស្ទឹងកាច់ ស្រុកសាលាក្រៅ ខេត្តប៉ៃលិន បាននាំគ្នារអ៊ូរទាំនឹងក្លិនទឹកស្អុយដំឡូងមី ដែលគេបង្ហូរចេញពីស្តង់មួយកន្លែង ចូលក្នុងប្រឡាយក្បែរមាត់ផ្លូវ ធ្វើឱ្យក្លិនស្អុយជះចូលផ្ទះពួកគាត់ បណ្តាលធ្វើឱ្យទាំងមនុស្សចាស់ និងក្មេងទៅជាកើតជំងឺផ្តាសាយ រលាកបំពង់.ក ហើយអ្នកខ្លះទៀតឈឺក្បាលវិលមុខ និងមានកើតអាការៈក្អួតចង្អោរ ដោយសារតែពុលនឹងក្លិននេះអស់រយ:ពេលជាយូរមកហើយ អត់ឃើញខាងម្ចាស់ស្តង់រៀបចំឱ្យត្រឹមត្រូវតាមស្តង់ដានោះទេ ទើបទ្រាំមិនបានក៏ប្តឹងឱ្យខាងមន្ត្រីជំនាញបរិស្ថានចុះទៅពិនិត្យ និង ណែនាំឱ្យម្ចាស់ស្តង់ឱ្យរៀបចំកន្លែងស្តុកទឹកស្អុយដំឡូងមី និងបង្ហូរចូលស្រះខាងក្រោយស្តង់របស់ខ្លួន ឱ្យបានត្រឹមត្រូវតាមលក្ខណៈស្តង់ដា ដើម្បីមិនបង្កផលប៉ះពាល់ដល់បរិស្ថានថែមទៀត ។
បើតាមប្រភពព័ត៌មានពីប្រជាពលរដ្ឋឈ្មោះ តាត សារឿម ភេទស្រី អាយុ៥០ឆ្នាំ, ឈ្មោះ ថុន សឺម ភេទប្រុស អាយុ៦០ឆ្នាំ និងឈ្មោះ រ័ត្ន ភេទប្រុស អាយុ៣៩ឆ្នាំ ក្នុងចំណោមប្រជាពលរដ្ឋជាង២០គ្រួសារ រស់នៅក្នុងភូមិខាងលើ បានរៀបរាប់ឱ្យដឹងដូចៗគ្នាថា ៖ ពួកគាត់ពិតជាបានទទួលរងនូវផលប៉ះពាល់ ដោយសារស្តង់ដំឡូងមីមួយដែលមានម្ចាស់ឈ្មោះ ចែផា ភេទស្រី អស់រយៈពេលជិត១០ឆ្នាំមកហើយ គឺកំទេចធូលីដំឡូងមីហុយចូលផ្ទះលំបាកក្នុងការដកដង្ហើម ។ រីឯទឹកស្អុយដំឡូងមី ដែលហូរចូលក្នុងប្រឡាយជាប់នឹងផ្លូវថ្នល់ក្បែរផ្ទះរបស់ពួកគាត់ ធ្វើឱ្យប៉ះពាល់ដល់សុខភាពផ្លូវដង្ហើមយ៉ាងខ្លាំង ជាពិសេសដល់ពេលរដូវប្រមូលផលដំឡូងមីម្តងៗ ខណៈពេលដែលម្ចាស់កាប់ចិញ្ច្រាំមើមដំឡូងមី ដាក់ហាល លុះកើបប្រមូលម្តងៗស្របពេលខ្យល់បក់បោកមកទៀតនោះ បណ្តាលឱ្យហុយទ្រលោមចូលក្នុងផ្ទះពួកគាត់ ពិបាកក្នុងការរស់នៅ ក៏ដូចជាហូបអាហារជាដើម ។
ពួកគាត់បន្តទៀតថា លុះដល់ពេលរដូវភ្លៀងធ្លាក់មក ធ្វើឱ្យល្អងធូលីដំឡូងមីខាងលើ ក្លាយទៅជាស្អុយរលួយហូរចូលក្នុងប្រឡាយ អូរ លុះពេលសត្វមាន់ ទា ជ្រូក គោ ផឹកទឹកស្អុយទាំងនេះ បណ្តាលឱ្យងា.ប់អស់មួយចំនួន ។ ចំណែកឯ ត្រីតូចធំ ដែលរស់នៅក្នុងទឹកអូរ ស្ទឹង ក៏រងនូវការពុលងា.ប់នៅពេលដែលទឹកស្អុយដំឡូងមីនេះហូរចូលផងដែរ ។
ពួកគាត់បន្តទៀតថា កាលពីមុនធ្លាប់ឃើញខាងមន្ត្រីជំនាញបរិស្ថាន និងអាជ្ញាធរមូលដ្ឋានចុះទៅពិនិត្យជារឿយៗដែរ តែការហុយ និងទឹកស្អុយដំឡូងមី នៅតែប៉ះពាល់ដល់បរិស្ថានក្នុងភូមិរបស់ខ្លួនដដែល ហាក់ដូចជាគ្មានដំណោះស្រាយអ្វីទាំងអស់ ។
ពាក់ព័ន្ធនឹងបញ្ហាខាងលើនេះ លោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងថា ៖ ក្រោយពីទទួលបានដំណឹងនេះ ខាងលោកបានចាត់មន្ត្រីជំនាញឱ្យចុះទៅត្រួតពិនិត្យ ដើម្បីណែនាំ ម្ចាស់ស្តង់ដំឡូងមីខាងលើ ធ្វើយ៉ាងណាឈប់បង្ហូរទឹកស្អុយចូលទៅក្នុងប្រឡាយ ឬអូរបន្តទៀត គឺត្រូវឱ្យគាត់ជីកស្រះសម្រាប់ស្តុកទឹកស្អុយនៅខាងក្រោយស្តង់របស់ខ្លួន និងត្រូវរៀបចំដាក់ស្បៃមុង ឬធ្វើរបងបាំង ដើម្បីកុំឱ្យហុយចូលទៅផ្ទះប្រជាពលរដ្ឋខាងលើ ។
លោកបន្តទៀតថា ម្ចាស់ស្តង់ខាងលើប្រាប់ថា គាត់ហាលដំឡូងមីតែបន្តិចទៀត គឺដល់រដូវអស់ដំឡូងមីដែលកាប់ចិញ្ច្រាំហើយ ក៏នឹងឈប់បន្តធ្វើបែបនេះទៀត ។ តែបើណែនាំហើយ ម្ចាស់មិនព្រមស្តាប់តាម ខាងលោកនឹងហៅមកធ្វើកិច្ចសន្យាម្តងទៅ២ដង រួចនឹងធ្វើតាមផ្លូវច្បាប់តែម្តង ៕
ចែករំលែកព័តមាននេះ