ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា មានករណីពេទ្យភូមិម្នាក់គ្មានសញ្ញាបត្រនោះទេ បានព្យួរសេរ៉ូមអ្នកជំងឺ ក៏ស្រាប់តែធ្វើឲ្យមនុស្សស្លា.ប់ ហើយក៏រត់គេចខ្លួនបាត់ស្រមោលតែម្តង បង្កឱ្យមានការភ្ញាក់ផ្អើលកាលពីវេលាម៉ោង១២និង១០នាទី ថ្ងៃទី២១ ខែមេសា…
ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា មានករណីពេទ្យភូមិម្នាក់គ្មានសញ្ញាបត្រនោះទេ បានព្យួរសេរ៉ូមអ្នកជំងឺ ក៏ស្រាប់តែធ្វើឲ្យមនុស្សស្លា.ប់ ហើយក៏រត់គេចខ្លួនបាត់ស្រមោលតែម្តង បង្កឱ្យមានការភ្ញាក់ផ្អើលកាលពីវេលាម៉ោង១២និង១០នាទី ថ្ងៃទី២១ ខែមេសា ឆ្នាំ២០២១ នៅចំណុចផ្ទះជនរងគ្រោះ ស្ថិតក្នុងភូមិស្លាករ ឃុំបន្ទាយស្ទោង ស្រុកស្ទោង ខេត្តកំពង់ធំ។
សេចក្តីរាយការណ៍បានឱ្យដឹងថា ជនរងគ្រោះខាងលើមានឈ្មោះ ឌាន ឌាង ភេទប្រុស អាយុ៤១ឆ្នាំ ជាជនជាតិខ្មែរ រស់នៅភូមិ-ឃុំកើតហេតុខាងលើ ចំណែកគ្រូពេទ្យភូមិវិញមានឈ្មោះ ហ៊ាញ ចំរើន ភេទប្រុស អាយុ២៣ឆ្នាំ ។
ពាក់ព័ន្ធនឹងករណីគ្រូពេទ្យភូមិព្យួរសេរ៉ូមអ្នកជំងឺ បណ្តាលឲ្យមនុស្សស្លា.ប់ខាងលើនេះ បើតាមលោកវរសេនីយ៍ទោ វ៉ន សុភ័ណ អធិការរងនគរបាលស្រុងស្ទោងទទួលផ្នែកព្រហ្មទណ្ឌ ប្រាប់ឲ្យដឹងតាមទូរស័ព្ទនៅព្រឹកថ្ងៃទី២២ ខែមេសា ឆ្នាំ២០២១នេះថា បើតាមការស្រាវជ្រាវ គឺពេទ្យភូមិឈ្មោះ ហ៊ាញ ចំរើន ភេទប្រុស អាយុ២៣ឆ្នាំនេះ ពុំមែនជាវេជ្ជបណ្ឌិត ឬក៏ជាគ្រូពេទ្យដែលមានការទទួលស្គាល់ពីមន្ទីរពេទ្យ និងក្រសួងសុខាភិបាលនោះឡើយ ។ ហើយពេទ្យឈ្មោះ ហ៊ាញ ចំរើន នេះ គ្រាន់តែមានឪពុកបង្កើតធ្លាប់ធ្វើពេទ្យ ហើយរូបគេគ្រាន់តែចេះដឹងបន្តិចបន្តួច ក៏ដើរចាក់ថ្នាំ និងព្យាបាលអ្នកភូមិតែម្តងទៅ ទើបធ្វើឲ្យមានកំហុសឆ្គងបែបនេះកើតឡើង។
តាមការបំភ្លឺរបស់ស្ត្រីឈ្មោះ ឆាយ ស អាយុ៤០ឆ្នាំ ត្រូវជាប្រពន្ធជនរងគ្រោះ បានឱ្យដឹងថា រយៈពេលមួយឆ្នាំមកហើយដែលប្តីនាងមានជំងឺរមាស់សើស្បែក ដោយលេបថ្នាំព្យាបាលរហូត ហើយនៅក្នុងខែកុម្ភៈ ឆ្នាំ២០២១កន្លងទៅ ប្តីរបស់នាងមានជំងឺឈឺក្រោមឆ្អឹងជំនីខាងឆ្វេងយ៉ាងខ្លាំង នាងក៏បាននាំប្តីទៅមន្ទីរពេទ្យបង្អែកស្រុកស្ទោង គ្រូពេទ្យក៏បានប្រាប់ថា ប្តីរបស់នាងមានជំងឺរបេង និងជំងឺសួត ហើយគ្រូពេទ្យក៏ឱ្យប្តីនាងសម្រាកព្យាបាលរយៈពេលមួយសប្តាហ៍ និងលេបថ្នាំរបេងរាល់ថ្ងៃ ដោយក្នុងមួយថ្ងៃលេប៣គ្រាប់ គឺក្រោយបាយលេបមួយគ្រាប់។
ស្ត្រីជាប្រពន្ធជនរងគ្រោះបានបន្តថា លុះដល់ថ្ងៃកំណត់គ្រូពេទ្យក៏បានឱ្យចេញមកផ្ទះវិញ នៅពេលមកដល់ផ្ទះបានតែ៣ថ្ងៃ ជំងឺប្តីរបស់នាងបានធ្វើទុក្ខរើឡើងវិញ នាងក៏បានយកប្តីទៅព្យាបាលជំងឺនៅមន្ទីរពេទ្យម្តងទៀតអស់រយៈពេល១២ថ្ងៃ ទើបចេញពីពេទ្យត្រលប់មកផ្ទះវិញដោយលេបថ្នាំរបេងជាប្រចាំ។
ស្ត្រីជាប្រពន្ធបានបន្តទៀតថា នៅថ្ងៃទី២០ ខែមេសា ឆ្នាំ២០២១នេះ នៅវេលាម៉ោងប្រហែលជា១០យប់ ប្តីរបស់នាងចាប់ផ្តើមរាកបួនទៅប្រាំដង លុះដល់ម៉ោង៤ទៀបភ្លឺ នាងក៏បានឱ្យប្តីលេបថ្នាំរបេង ក្រោយលេបថ្នាំ ប្តីនាងបានប្រាប់នាងថា «គាត់អស់កម្លាំងណាស់» ដោយឮប្តីនិយាយដូច្នេះ នាងក៏បានប្រើកូនស្រីឱ្យទៅហៅពេទ្យក្នុងភូមិម្នាក់ឈ្មោះ ហ៊ាញ ចំរើន ឱ្យមកដាក់សេរ៉ូមឲ្យប្តីនាង។ លុះមួយសន្ទុះក្រោយមក ពេទ្យភូមិឈ្មោះ ហ៊ាញ ចំរើន ក៏បានមកពិនិត្យ និងព្យួរសេរ៉ូមឱ្យប្តីនាងមែន ហើយនាងក៏បានប្រាប់ពេទ្យឱ្យជួយដាក់ថ្នាំរាក និងថ្នាំជំនួយកម្លាំងឲ្យប្តីនាងផង ក្រោយពីដាក់សេរ៉ូមរួច ពេទ្យក៏បានត្រលប់ទៅវិញបាត់ មួយសន្ទុះក្រោយមកប្តីនាងក៏បានស្លា.ប់តែម្តង។
ក្រោយពេលទទួលបានព័ត៌មានខាងលើភ្លាម កម្លាំងនគរបាលការិយាល័យបច្ចេកទេសខេត្ត សហការជាមួយជំនាញស្រុក និងអាជ្ញាធរមូលដ្ឋាន ភូមិ ឃុំ គ្រូពេទ្យ មណ្ឌលសុខភាពឃុំ ចូលរួមពិនិត្យកន្លែងកើតហេតុ និងសាកស.ពជនរងគ្រោះ ឃើញថា ស.ពមិនមានស្លាកស្នាម និងចេញរោគសញ្ញាអ្វីគួរឱ្យកត់សម្គាល់ឡើយ។ ចំណែកវត្ថុតាងវិញ សមត្ថកិច្ចក៏ប្រមូលចាប់យកពីកន្លែងកើតហេតុមានដូចជា សំបកថ្នាំរបេងប្រភេទ RHZE ចំនួន២បន្ទះ និងថ្នាំគ្រាប់១បន្ទះ ថ្នាំពណ៌សតូចៗមិនស្គាល់ម៉ាកចំនួន៨គ្រាប់ ជារបស់ជនរងគ្រោះ និងសេរ៉ូមប្រភេទប្រៃផ្អែមចំណុះ៥០០មីលីលីត្រ នៅសល់ទឹកសេរ៉ូមចំណុះ២៥០មីលីលីត្រ ជារបស់គ្រូពេទ្យបន្សល់ទុកនៅកន្លែងកើតហេតុ។
យោងតាមការស្រាវជ្រាវព័ត៌មានជុំវិញកន្លែងកើតហេតុខាងលើ និងសាកស.ពជនរងគ្រោះឃើញថា គ្រូពេទ្យឈ្មោះ ហ៊ាញ ចំរើន ភេទប្រុស អាយុ២៣ឆ្នាំ មិនមានច្បាប់អនុញ្ញាតិផ្នែកសុខាភិបាល និងមិនមានសញ្ញាបត្រផ្នែកគ្រូពេទ្យឡើយ។ ហើយក្រោយកើតហេតុ ជនសង្ស័យជាគ្រូពេទ្យរូបនេះ ក៏បានរត់គេចខ្លួនបាត់ស្រមោលតែម្តង ចំណែកសមត្ថកិច្ចកំពុងតែចងក្រងសំណុំរឿងតាមនីតិវិធីហើយ រីឯស.ពជនរងគ្រោះក៏បានប្រគល់ជូនសាច់ញាតិ ដើម្បីធ្វើបុណ្យតាមប្រពៃណី។
ចែករំលែកព័តមាននេះ