ADផ្ទាំងផ្សព្វផ្សាយពាណិជ្ជកម្ម

ឃាត់ខ្លួនអ្នកល្មើសបម្រាមជាង៣០នាក់ និងដកហូតម៉ូតូជាង៣០គ្រឿងក្នុងមូលដ្ឋានសង្កាត់ចោមចៅ១

3 ឆ្នាំ មុន

ភ្នំពេញ
២២ ខែ មេសា ឆ្នាំ ២០២១ ម៉ោង ១១:៤០

រាជធានីភ្នំពេញ ៖ កងកម្លាំងអន្តរាគមន៍ពិសេសនៃស្នងការដ្ឋាននគរបាលរាជធានីភ្នំពេញ សហការណ៍ជាមួយកម្លាំងនគរបាលនៃអធិការដ្ឋាននគរបាលខណ្ឌពោធិ៍សែនជ័យ និងកម្លាំងនគរបាលប៉ុស្តិ៍ចោមចៅទី១ បានធ្វើការឃាត់ខ្លួនមនុស្សប្រមាណជាង៣០នាក់ព្រមទាំងដកហូតម៉ូតូប្រមាណជាង៣០គ្រឿងនិងរថយន្តមួយចំនួនទៀតផងដែរ។ខណៈដែលអ្នកទាំងនោះបានធ្វើដំណើរតាមដងផ្លូវនានា ទាំងបំពានល្មើសទៅនិងបម្រាមរបស់រាជរដ្ឋាភិបាលដែលបានបិទខ្ទប់រាជធានីភ្នំពេញរយៈពេល១៤ថ្ងៃទប់ស្កាត់ការឆ្លងរីករាលដាលជម្ងឺCovid-19 ។ វិធានការក្ដៅខាងលើនេះបានធ្វើឡើងចាប់ពីវេលារសៀលរហូតដល់វេលាល្ងាចថ្ងៃទី២១ ខែមេសា…

វិធានការក្ដៅខាងលើនេះបានធ្វើឡើងចាប់ពីវេលារសៀលរហូតដល់វេលាល្ងាចថ្ងៃទី២១ ខែមេសា ឆ្នាំ២០២១ នៅតាមដងផ្លូវនានានៅក្នុងភូមិត្រពាំងថ្លឹង និងជិតវត្តអង្គតាមិញ ភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ដែលត្រូវបានចាត់ទុកថាជាចំណុចក្រហម ដែលមានការផ្ទុះឡើងនៃជម្ងឺCovid-19គួរឲ្យព្រួយបារម្ភនោះ។

សមត្ថកិច្ចបាននិយាយថា ជាច្រើនថ្ងៃមកហើយដែលកងកម្លាំងបានចុះធ្វើការណែនាំសុំឲ្យបងប្អូនប្រជាពលរដ្ឋមេត្តាចូលរួមអនុវត្តនូវវិធានការរបស់រាជរដ្ឋាភិបាលក្នុងការប្រយុទ្ធប្រឆាំងនិងជម្ងឺកូវីដ១៩ ដោយកុំចេញដើរឬជិះម៉ូតូចេញតាមផ្លូវនិងទីសាធារណៈឲ្យសោះនិងសូមស្ថិតនៅតែក្នុងផ្ទះរៀងៗខ្លួនបានហើយ ។ ប៉ុន្តែទោះជាបែបណា មានបងប្អូនប្រជាពលរដ្ឋមួយចំនួនអនុវត្តតាមយ៉ាងខ្ជាប់ខ្ជួនមិនហ៊ានល្មើសឡើយ ចំណែកមួយចំនួនទៀតនៅតែគគ្លើនល្មើសនិងបម្រាម ដោយត្រឹមតែ១៤ថ្ងៃសោះទ្រាំមិនបាន ហើយនៅតែចល័តចេញពីផ្ទះប្រសេចប្រសាចតាមផ្លូវមិនខ្លាចញញើតអ្វីសោះ។

តាមប្រភពដដែលបានបន្តទៀតថា ដោយសារតែនៅក្នុងភូមិសាស្ត្រសង្កាត់ចោមចៅទី១នេះគឺត្រូវបានកំណត់ចូលជាតំបន់ក្រហមដែលមានអ្នកឆ្លងវីរុសកូវីដ១៩ច្រើននោះទើបធ្វើឲ្យមានការព្រួយបារម្ភអំពីហានីភ័យខ្លាំងបំផុត ហើយកម្លាំងនគរបាលខាងលើលែងនិយាយច្រើនជាមួយអ្នកល្មើសបែបនេះតទៅទៀតហើយ។ដើម្បីទប់ទល់ជាមួយមនុស្សរឹងរូសបែបនេះកម្លាំងបានប្រើវិធានការក្ដៅ ដោយអ្នកដែលគ្មានលិខិតស្នាមត្រឹមត្រូវតាមច្បាប់ដែលបានចែងត្រូវហើយធ្វើដំណើរល្មើសបម្រាមនិងត្រូវឃាត់ខ្លួនហើយអ្នកដែលរារាំងដល់ការងារសមត្ថកិច្ចនិងត្រូវចាប់វាយខ្នោះដៃតែម្ដង។

តាមប្រភពខាងលើបានបន្តឲ្យដឹងទៀតថា ដោយឡែកមនុស្សជាប្រមាណជាង៣០នាក់រួមទាំងម៉ូតូប្រមាណជាង៣០គ្រឿងផងក្រោយពីការឃាត់ខ្លួនត្រូវបាននាំយកទៅកាន់អធិការដ្ឋាននគរបាលខណ្ឌពោធិ៍សែនជ័យ ដើម្បីអនុវត្តតាមបទបញ្ជាថ្នាក់ដឹកនាំដែលត្រូវសម្រេចផាកពិន័យតាមអន្តរការឬបែបណានោះពុំទាន់ដឹងនៅឡើយទេ ។ទន្ទឹមនិងនេះក៏សូមអំពាវនាវដល់បងប្អូនប្រជាពលរដ្ឋទាំងអស់បន្តចូលរួមគោរពច្បាប់និងវិធានការរបស់រាជរដ្ឋាភិបាលកម្ពុជាទាំងអស់គ្នាដើម្បីចៀសផុតពីទុក្ខភ័យព្រោះតែជម្ងឺCOVID-19៕