ខេត្តត្បូងឃ្មុំ ៖ បើតាមសេចក្តីរាយការណ៍បានឱ្យដឹងថា ស្នូរសម្លេងគ្រាប់បែកមួយគ្រាប់បានផ្ទុះឡើងយ៉ាងញ័ររញ្ជួយដី បណ្តាលឱ្យបាត់បង់ជីវិតម្នាក់ និង២នាក់ទៀតរងរបួស ហើយកំពុងតែសម្រាកព្យាបាលនៅមន្ទីរពេទ្យបង្អែកស្រុកតំបែរ ដែលហេតុការណ៍នោះបានកើតឡើងបង្កឱ្យមានការភ្ញាក់ផ្អើលកាលពីវេលាម៉ោង១២និង១០នាទីថ្ងៃត្រង់ នាថ្ងៃទី២១ ខែមេសា ឆ្នាំ២០២១ នៅចំណុចលើដីសហគមខាងកើត ស្ថិតក្នុងភូមិត្រពាំងព្រីង ឃុំត្រពាំងព្រីង ស្រុកតំបែរ ។
តាមប្រភពសមត្ថកិច្ចនៅមូលដ្ឋានឱ្យដឹងថា ទីតាំងដែលផ្ទុះគ្រាប់បែកខាងលើនោះ នៅចម្ងាយ២០០ម៉ែត្រពីចំណុចលើដីរបស់ឈ្មោះបេ គួយ បណ្ដាលឱ្យរងរបួសមនុស្សចំនួន៣នាក់ មានដូចជា ៖ ១. ឈ្មោះ បេ គួយ ភេទប្រុស អាយុ៧៨ឆ្នាំ (របួសស្រាល), ២.ឈ្មោះ ម៉ុត សំណាង ភេទប្រុស អាយុ២៩ឆ្នាំ (របួសធ្ងន់ដាច់ប្រអប់ដៃស្ដាំ) និង៣.ឈ្មោះ ពឿន ពៅ ភេទប្រុស អាយុ១២ឆ្នាំ (របួសធ្ងន់) ទាំង៣នាក់មានទីលំនៅភូមិ-ឃុំខាងលើ ហើយក៏បង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋនៅក្នុងភូមិផងដែរ។
បើតាមសមត្ថកិច្ចមូលដ្ឋានប្រាប់បន្តថា បន្ទាប់មកក៏មានការភ្ញាក់ផ្អើលឆោឡោដល់កម្លាំងប៉ុស្តិ៍រដ្ឋបាលមូលដ្ឋាន ក៏បានចុះមកធ្វើការត្រួតពិនិត្យនៅកន្លែងកើតហេតុ ឃើញថា មានស្នាមរណ្ដៅដី និងឈា.ម ដែលបន្សល់ទុកក្រោយពីសាច់ញាតិអ្នករងគ្រោះបានបញ្ជូនជនរងគ្រោះទាំង៣នាក់នោះទៅសង្គ្រោះនៅមន្ទីរពេទ្យបង្អែកស្រុក។
តាមការសាកសួរពីអ្នករងគ្រោះបានប្រាប់ឲ្យសមត្ថកិច្ចដឹងថា មូលហេតុដំបូង គឺមានក្មេងប្រុសម្នាក់បានរើសគ្រាប់បែកពីរនៅក្នុងដីភូមិ ដោយមិនស្គាល់របស់ច្បាស់ ក៏ស្រាប់តែមានបុរសម្នាក់អាយុ២៩ឆ្នាំ បានយកគ្រាប់បែកនោះមកដំលេង លុះបានបន្តិចក៏បណ្ដាលឲ្យផ្ទុះយ៉ាងកក្រើកតែម្ដង នឹងធ្វើរបួសទាំងអ្នកដំ ព្រមទាំងអ្នកនៅក្បែរនោះទៀតផង ហើយត្រូវបានគេដឹកមកសង្គ្រោះនៅមន្ទីរពេទ្យបង្អែកស្រុកផងដែរ ។
ក្រោយមក ដោយសារតែស្នាមរបួសធ្វើឱ្យក្មេងប្រុសអាយុ១២ឆ្នាំម្នាក់ស្ថិតក្នុងស្ថានភាពលក្ខណៈធ្ងន់ធ្ងរពេក ជាហេតុបណ្ដាលឲ្យក្មេងប្រុសរូបនោះស្លា.ប់បាត់បង់ជីវិតតែម្តងនារសៀលថ្ងៃដដែលនោះ ហើយក៏ត្រូវបានក្រុមគ្រួសារដឹកត្រឡប់ទៅផ្ទះ ដើម្បីរៀបចំធ្វើបុណ្យតាមប្រពៃណីផងដែរ។
បើតាមសមត្ថកិច្ច ក៏ដូចជាជំនាញអង្គការស៊ីម៉ាក់ ក៏ធ្លាប់បានក្រើនរំលឹក និងដាស់តឿនជាញឹកញាប់ ប្រសិនបើរើសបាន ឬប្រទះគ្រាប់យុទ្ធភ័ណ្ឌមិនទាន់ផ្ទុះកប់ក្នុងដី ឬលើដី គឺត្រូវរាយការណ៍ជាបន្ទាន់មកអាជ្ញាធរមូលដ្ឋាន ដែលនៅកៀកបំផុត មិនត្រូវយកគ្រាប់ទាំងនោះមកដំលេងនោះទេ ព្រោះវាអាចបង្កគ្រោះថ្នាក់បាត់បង់ដល់អាយុជីវិត ដូចជាករណីខាងលើនេះជាដើម៕
ចែករំលែកព័តមាននេះ