ខេត្តព្រះសីហនុ ៖ មានករណីប្រជាពលរដ្ឋជាជនជាតិខ្មែរអ៊ិស្លាមមួយគ្រួសារចំនួន៤នាក់ បន្ទាប់ពីបរិភោគផ្សិតដែលដកមកពីភ្នំរួច បណ្តាលឱ្យពុល ហើយត្រូវបានគេបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍ខាងលើនេះ បានបង្កការភ្ញាក់ផ្អើលកើតឡើងកាលពីព្រឹកថ្ងៃទី ២០ មេសា ឆ្នាំ២០២១ នៅភូមិព្រែកទាល់ ឃុំទឹកថ្លា ស្រុកព្រៃនប់ ខេត្តព្រះសីហនុ ។
ជនរងគ្រោះទាំង៤នាក់ខាងលើរួមមាន ១-ឈ្មោះ កូន អៃសះ ភេទស្រី អាយុ៦២ឆ្នាំ មុខរបរមេផ្ទះ (ត្រូវជាម្តាយ ) ២-ឈ្មោះ តេះ ហ្សើបៀត ភេទ ប្រុស អាយុ ២៤ឆ្នាំ មុខរបរកសិករ (ជាកូនបង្កើត) ៣-ឈ្មោះ តេះ ហាហ្វីស ភេទ ប្រុស អាយុ៣២ឆ្នាំ មុខរបរកសិករ (ត្រូវកូនបង្កើត) និង៤-ឈ្មោះ សុះ កើរីយ៉ាស់ ភេទស្រី អាយុ១៨ឆ្នាំ មុខរបរមេផ្ទះ (ត្រូវជាកូនប្រសា) ។ ជនរងគ្រោះទាំង៤នាក់រស់នៅភូមិឃុំកើតហេតុខាងលើ ។
តាមប្រភពពីសមត្ថកិច្ចបានឱ្យដឹងថា មុនពេលកើតហេតុ គ្រួសាររងគ្រោះខាងលើនេះបានបរិភោគផ្សិតដែលកូនប្រុសដកមកពីភ្នំ ដោយគិតថាជាផ្សិតកាជោ ទើបយកមកចំអិនហូប ក្រោយពីបរិភោគរួចភ្លាមៗ ក៏ស្រាប់តែពួកគាត់មានអាការៈវិលមុខ ឈឺក្បាល និងក្អួតចង្អោរទាំងអស់គ្នាតែម្តង។
ក្រោយកើតហេតុ ជនរងគ្រោះទាំងអស់ខាងលើត្រូវបានគេបញ្ជូនទៅសង្គ្រោះនៅមន្ទីរពេទ្យឯខេត្តកំពតភ្លាមៗ ហើយបើតាមរបាយការណ៍ចុងក្រោយឲ្យដឹងថា ជនរងគ្រោះបានធូរស្បើយឡើងវិញអស់ហើយ មិនមានរងគ្រោះថ្នាក់ដល់អាយុជីវិតនោះទេ៕
ចែករំលែកព័តមាននេះ