ខេត្តកំពង់ឆ្នាំង ៖ គ្លីនិកព្យាបាលជំងឺឯកជនមួយកន្លែងនៅក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ត្រូវបានអាជ្ញាធរក្រុងសហការជាមួយមន្ទីរសុខាភិបាល ចុះបិទការធ្វើអាជីវកម្មទាំងស្រុងនៅព្រឹកថ្ងៃទី២០ ខែមេសា ឆ្នាំ២០២១ បន្ទាប់ពីរកឃើញថា…
ខេត្តកំពង់ឆ្នាំង ៖ គ្លីនិកព្យាបាលជំងឺឯកជនមួយកន្លែងនៅក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ត្រូវបានអាជ្ញាធរក្រុងសហការជាមួយមន្ទីរសុខាភិបាល ចុះបិទការធ្វើអាជីវកម្មទាំងស្រុងនៅព្រឹកថ្ងៃទី២០ ខែមេសា ឆ្នាំ២០២១ បន្ទាប់ពីរកឃើញថា គ្លីនិកមួយនេះធ្លាប់ទទួលព្យាបាលអ្នកមានវិជ្ជមានកូវីដ១៩ម្នាក់ និងក្រោយមកអ្នកជំងឺរូបនោះក៏ត្រូវបានស្លា.ប់នៅពេលដែលបន្តមកចូលសម្រាកព្យាបាលនៅមន្ទីរពេទ្យបង្អែកខេត្តកំពង់ឆ្នាំង ។
លោក យិន សាវ៉េន អភិបាលក្រុងកំពង់ឆ្នាំង បានអោយដឹងថា ព្រឹកនេះ (២០.៤.២១) ដោយមានកិច្ចសហការពីមន្ទីរសុខាភិបាលខេត្តកំពង់ឆ្នាំង យើងសម្រេចចុះមកបិទគ្លីនិកឯកជនមួយកន្លែងនៅភូមិផ្សារឆ្នាំង សង្កាត់កំពង់ឆ្នាំង ដែលមានយីហោថា «មន្ទីរព្យាបាលជំងឺក្រុងកំពង់ឆ្នាំង» បន្ទាប់ពីរកឃើញថា កាលពីពេលថ្មីៗនេះ ធ្លាប់ទទួលអ្នកជំងឺម្នាក់ឈ្មោះ នូ ចុល អាយុ៥៧ឆ្នាំ មានទីលំនៅភូមិព្រះរាមរង្សី ឃុំជ្រៃបាក់ ស្រុករលាប្អៀរ ឲ្យចូលព្យាបាលជំងឺ ។
ក្រោយមកអ្នកជំងឺរូបនោះក៏បានស្លា.ប់នៅវេលារំលងអធ្រាត្រឈានចូលថ្ងៃទី១៩ ខែមេសា ឆ្នាំ២០២១ បន្ទាប់ពីចេញពីកន្លែងគ្លីនិកព្យាបាលឯកជនខាងលើ រួចមកចូលសម្រាកព្យាបាលនៅមន្ទីរពេទ្យខេត្តកំពង់ឆ្នាំង ហើយក៏បានយកសំណាកទៅពិនិត្យរកឃើញថា គាត់មានវិជ្ជមានកូវីដ១៩។
តាមការបញ្ជាក់របស់លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានឲ្យដឹងថា អ្នកជំងឺកូវីដ១៩រូបនេះបានចូលសម្រាកព្យាបាលនៅមន្ទីរពេទ្យខេត្តនៅរសៀលថ្ងៃទី១៨ ខែមេសា ហើយក៏បានស្លា.ប់នៅរំលងអធ្រាតឈានចូលថ្ងៃទី១៩ ខែមេសា ។ ក្រោយការស្លា.ប់ ដោយមានការសង្ស័យយើងក៏បានយកសំណាកទៅពិនិត្យជាបន្ទាន់ ជាលទ្ធផលក៏រកឃើញថា មានវិជ្ជមានកូវីដ១៩ ។
លោកវេជ្ជបណ្ឌិតបានបន្តថា ក្រោយពីរកឃើញវិជ្ជមានកូវីដ១៩ មានលើអ្នកស្លា.ប់ យើងក៏បានសម្រេចបិទគ្លីនិកខាងលើជាបណ្ដោះអាសន្ន និងយកសំណាកអ្នកពាក់ព័ន្ធនៅក្នុងគ្លីនិកទាំងអស់ ដើម្បីរទៅពិនិត្យ។ ជាមួយគ្នានេះ ក្នុងនាមមន្ទីរជំនាញសូមអំពាវនាវដល់បងប្អូនដែលធ្លាប់ចូលមកសម្រាកព្យាបាលជំងឺក្នុងគ្លីនិកខាងលើ ក្នុងអំឡុងពេលប៉ុន្មានថ្ងៃមុននេះ សូមប្រញាប់ទៅយកសំណាកពិនិត្យ និងធ្វើចត្តាឡីស័កជាបន្ទាន់ផងដែរ ។
ដោយឡែក នៅព្រឹកថ្ងៃទី២០ ខែមេសា ឆ្នាំ២០២១នេះដែរ គេសង្កេតឃើញខាងមន្ទីរជំនាញ និងអាជ្ញាធរបានចុះទៅដឹកជញ្ជូនយកក្រុមគ្រួសារ និងអ្នកពាក់ព័ន្ធជាមួយអ្នកស្លា.ប់ដោយសារកូវីដ១៩ ចំនួន១៩នាក់មកដាក់ឲ្យធ្វើចត្តាឡីស័កនៅសាលាគំរូក្រុងកំពង់ឆ្នាំងរយៈពេល១៤ថ្ងៃ និងបានយកសំណាកពួកគាត់ទៅពិនិត្យផងដែរ។ ចំណែកអ្នកពាក់ព័ន្ធដោយប្រយោលមួយចំនួនទៀត ក៏បានដាក់ឲ្យធ្វើចត្តាឡីស័កនៅផ្ទះផងដែរ ៕
ចែករំលែកព័តមាននេះ