រាជធានីភ្នំពេញ ៖ ថ្លែងទៅកាន់លោកសាស្ត្រាចារ្យ វេជ្ជបណ្ឌិត ទន្តបណ្ឌិត គ្រូពេទ្យ និងនិស្សិតពេទ្យស្ម័គ្រចិត្ត ព្រមទាំងភ្ញៀវជាតិ អន្តរជាតិជាច្រើននាក់ នៅក្នុងសន្និសីទវិទ្យាសាស្ត្រសុខាភិបាលលើកទី២ ដែលរៀបចំដោយសមាគមគ្រូពេទ្យស្ម័គ្រចិត្តកម្ពុជានៅថ្ងៃទី២ តុលា ២០១៥ នៅសណ្ឋាគារភ្នំពេញ ។
លោក ហ៊ុន ម៉ាណែត បានមានប្រសាសន៍ថា ការជួយគ្នា និងការគោរពស្រឡាញ់គ្នាតាមរយៈសកម្មភាពមនុស្សធម៌ គឺជាមូលដ្ឋានគ្រឹះនៃសុខសន្តិភាព ព្រោះយើងបានផ្តល់ស្នាមញញឹម និងក្តីសង្ឃឹមដល់ប្រជាពលរដ្ឋទោះតិចក្តី ច្រើនក្តី តាមរយៈការព្យាបាលជំងឺជូនប្រជាពលរដ្ឋ ដោយឥតគិតថ្លៃ និងប្រកបដោយសីលធម៌វិជ្ជាជីវៈ ។
លោកបានបញ្ជាក់ថា គ្រូពេទ្យដែលល្អ គឺមិនត្រឹមតែមានសមត្ថភាពប៉ុណ្ណោះទេ ប៉ុន្តែត្រូវមានលក្ខណសម្បត្តិជាច្រើនទៀត ក្នុងនោះ ឥរិយាបទ និងសីលធម៌វិជ្ជាជីវៈ គឺជាកត្តាដែលមិនអាចខ្វះបាន សម្រាប់ការព្យាបាលប្រកបដោយភាពយុត្តិធម៌ មិនប្រកាន់វណ្ណៈ ពណ៌សម្បុរអ្វីឡើយ ។
លោក ហ៊ុន ម៉ាណែត បានបន្ថែមថា ការចុះធ្វើសកម្មភាពចុះជួយប្រជាពលរដ្ឋ គឺជាការចូលរួមចំណែកកម្លាំងស្ម័គ្រចិត្ត និងការប្រមូលផ្តុំគ្រប់ផ្នែកដើម្បីធ្វើសកម្មភាពមនុស្សធម៌ជួយប្រជាពលរដ្ឋតាមជនបទ សំដៅកាត់បន្ថយភាពក្រីក្រ ដែលជាការងារអាទិភាពមួយរបស់រាជរដ្ឋាភិបាលកម្ពុជា ។
លោកសាស្ត្រាចារ្យវេជ្ជបណ្ឌិត ហង្ស ច័ន្ទវរៈ ប្រធានសមាគមគ្រូពេទ្យស្ម័គ្រចិត្តកម្ពុជា បានឱ្យដឹងថា ការប្រារព្វធ្វើសន្និសីទវិទ្យាសាស្ត្រសុខាភិបាលលើកទី២ ក្រោមប្រធានបទ ពង្រឹងសមត្ថភាព និងសីលធម៌គ្រូពេទ្យ ក្នុងគោលបំណងបំប៉នចំណេះដឹង និងសីលធម៌ដល់គ្រូពេទ្យ លើកកម្ពស់សេវាសុខាភិបាលឱ្យកាន់តែប្រសើរឡើងប្រកបដោយគុណភាពខ្ពស់ ។ រហូតមកដល់ពេលនេះ សមាគមបានពិនិត្យ និងព្យាបាលជំងឺជូនប្រជាពលរដ្ឋសរុបចំនួន១៥.៩៧៣នាក់ និងប្រារព្ធធ្វើសិក្ខាសាលាវិទ្យាសាស្ត្រសុខាភិបាលបានចំនួន២លើក ។
សូមបញ្ជាក់ថា ក្រោយពីពិធីបើកសន្និសីទវិទ្យាសាស្ត្រសុខាភិបាលលើកទី២ ក្រោមប្រធានបទ ពង្រឹងសមត្ថភាព និងសីលធម៌គ្រូពេទ្យ ក៍មានការធ្វើបទបង្ហាញរបស់សាស្ត្រាចារ្យ វេជ្ជបណ្ឌិតឯកទេសផ្សេងៗ និងការទស្សនាការតាំងពិព័រណ៍ផលិតផល សម្ភារសុខាភិបាលផងដែរ ៕
ចែករំលែកព័តមាននេះ