រាជធានីភ្នំពេញ៖ ឯកអគ្គរដ្ឋទូតសហព័ន្ធរុស្ស៊ីប្រចាំកម្ពុជាបានឱ្យដឹងថា អ្នកវិនិយោគរុស្ស៊ីបានសម្លឹងឃើញ និងចាប់អារម្មណ៍យ៉ាងខ្លាំងចំពោះការវិនិយោគលើវិស័យទេសចរណ៍នៅក្នុងខេត្តព្រះសីហនុ ខណៈខេត្តនេះកំពុងពោរពេញទៅដោយសក្តានុពលលើវិស័យនេះ ។
ការថ្លែងបែបនេះ ត្រូវបានធ្វើឡើងក្នុងឱកាសដែលលោក DMITRY TSVETKOV ឯកអគ្គរដ្ឋទូតសហព័ន្ធរុស្ស៊ីប្រចាំកម្ពុជា ជួបពិភាក្សាការងារជាមួយលោកឧបនាយករដ្ឋមន្ត្រី សុខ អាន រដ្ឋមន្ត្រីទីស្តីការគណៈរដ្ឋមន្ត្រី កាលពីថ្ងៃទី១ តុលា ២០១៥ នៅទីស្តីការគណៈរដ្ឋមន្ត្រី ។
លោក DMITRY TSVETKOV បានបញ្ជាក់ថា អ្នកវិនិយោគិនរុស្ស៊ី បានចាប់អារម្មណ៍យ៉ាងខ្លាំងលើការវិនិយោគវិស័យទេសចរណ៍នៅខេត្តព្រះសីហនុ សំខាន់ផ្នែកឧស្សាហកម្មទេសចរណ៍ដូចជាសណ្ឋាគារ ភោជនីយដ្ឋានជាដើម ខណៈដែលលោកអះអាងថា ខេត្តព្រះសីហនុនឹងក្លាយជាតំបន់ទេសចរណ៍ដ៏សំខាន់មួយសម្រាប់ប្រទេសកម្ពុជា នាពេលខាងមុខនេះ ។
លោកឯកអគ្គរដ្ឋទូតសហពន្ធ័រុស្សី ក៏បានឱ្យដឹងថា រុស្សីមានបំណងចង់បង្កើតកម្មវិធីទូរទស្សន៍តាមរយៈធ្វើកិច្ចសហការជាមួយទូរទស្សន៍របស់កម្ពុជា គឺភាគីរុស្សីនឹងផ្តល់ជូននូវខ្សែភាពយន្តឯកសារ និងកម្មវិធីផ្សេងៗមិនគិតថ្លៃ ចំពោះស្ថានីយទូរទស្សន៍ណាដែល សហការជាមួយ ។ លោក Dmitry Tsvetkov ក៏បានបង្ហាញពីចំណាប់អារម្មណ៍ចង់ចូលជាសមាជិកនៃគណៈកម្មាធិការសម្របសម្រួលអន្តរជាតិ សម្រាប់ការងារអភិរក្សប្រាសាទព្រះវិហារផងដែរ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ