ខេត្តមណ្ឌលគិរី ៖ នារីក្រមុំវ័យ១៨ឆ្នាំម្នាក់ បានស្លាប់នៅពាក់កណ្ដាលផ្លូវកំឡុងពេលបញ្ជូនទៅសង្គ្រោះនៅមណ្ឌលសុខភាពអូរអាម រួមទាំងលោកអធិការរងម្នាក់ទៀត បានរងរបួសក្នុងហេតុការណ៍រន្ទះបាញ់ដែលបានកើតឡើងនៅវេលាម៉ោង៩និង២០នាទី ថ្ងៃទី១៦ មេសា ២០២១ ។
សមត្ថកិច្ចមូលដ្ឋានបានរាយការណ៍ថា មានភ្លៀង១មេធំបានបង្អុរមកនៅព្រឹកនេះហើយក៏មានករណីរន្ទះបាញ់ដែលកើតឡើងនៅគីឡូ 37 ភូមិត្រពាំងផ្អេរ ឃុំស្រែខ្ទុម ស្រុកកែវសីមា ខេត្តមណ្ឌលគិរីបណ្តាលអោយជនរងគ្រោះ ឈ្មោះ គង់ ច្រិច ភេទស្រី អាយុ១៨ឆ្នាំ ជនជាតិខ្មែរ មុខរបរកសិករ រស់នៅភូមិឃុំខាងលើបានស្លាប់ (ស្លាប់) ។
សមត្ថកិច្ចបន្តថា ក្នុងហេតុការដដែលក៏បានបង្កអោយជនរងគ្រោះម្នាក់ទៀតឈ្មោះ កែវ សាវុធ ហៅមុត ភេទប្រុស អាយុ៥២ មុខរបរ អធិការរងស្រុកកែវសីមា( របួសស្រាល) ដែលកើតឡើងនៅ ចំណុចចរាចរណ៍បិតការឆ្លងខេត្តនាភូមិឆ្នែង ឃុំស្រែខ្ទុម ស្រុកកែវសីមា ខេត្តបណ្ឌលគីរី ។
បច្ចុប្បន្ន សពឈ្មោះ គង់ ច្រិច ត្រូវបានបងប្អូនយកទៅធ្វើបុណ្យតាមប្រពៃណី ។ ចំណែក ឈ្មោះ កែវ សាវុធ កំពុងព្យាបាលនៅមណ្ឌលសុខភាពអូរអាម ៕
ចែករំលែកព័តមាននេះ