ខេត្តពោធិ៍សាត់ ៖ រមណីយដ្ឋានធម្មជាតិទឹកធ្លាក់ច្រកល្អៀង គឺជារមណីយដ្ឋានមួយក្នុងចំណោមរមណីយដ្ឋានជាច្រើនទៀតក្នុងខេត្តពោធិ៍សាត់ ដែលមានចម្ងាយ៤១គីឡូម៉ែត្រពីផ្លូវជាតិលេខ៥ ស្ថិតក្នុងភូមិបំណក់ ឃុំឈើតុំ ស្រុកក្រគរ ។ ផ្លូវធ្វើដំណើរទៅកាន់ទីនោះពីមុនមានការលំបាកខ្លាំងណាស់ ប៉ុន្តែឥឡូវនេះស្ថាបនាជាផ្លូវក្រួសក្រហមហើយ ។
លោកធឹម ង៉ុក មេឃុំឈើតុំ ឲ្យដឹងកាលពីពេល ថ្មីៗកន្លងមកថា មានអ្នកទេសចរទៅលេងជាហូរហែរៀងរាល់ថ្ងៃសៅរ៍ និងថ្ងៃអាទិត្យ ហើយបើថ្ងៃចូលឆ្នាំខ្មែរ ចូលឆ្នាំចិន និងបុណ្យភ្ជុំបិណ្ឌវិញគឺមនុស្សច្រើនណាស់ពីគ្រប់ទីកន្លែង មានទាំងអ្នកទេសចរបរទេសទៀតផង ។ អ្នកទេសចរទៅទីនោះនឹងបានងូតទឹកជ្រោះដ៏ថ្លាយង់ ត្រជាក់ដូចទឹកអម្រិត មានផ្ទាំងថ្មតូចធំដូចក្បាច់ចម្លាក់, មានដើមឈើជាម្លប់ដ៏ត្រឈឹងត្រឈៃសម្រាប់ជ្រក និងទទួលទានអាហារយ៉ាងឆ្ងាញ់ពិសា ។
លោកសំ ឃីម ប្រធានមន្ទីរទេសចរណ៍ឲ្យដឹងថា នៅខេត្តពោធិ៍សាត់មានរមណីយដ្ឋានដ្ឋានចំនួន៩ ប៉ុន្តែរមណីយដ្ឋានដែលអ្នកទេសចរទៅលេងកម្សាន្តច្រើនជាងគេនោះ គឺរមណីយដ្ឋានធម្មជាតិទឹកធ្លាក់ច្រកល្អៀង, រមណីយដ្ឋានប្រវត្តិសាស្ត្រឧកញ៉ាឃ្លាំងមឿង ជំទាវខាន់ ខៀវ, រមណីយដ្ឋានកំពង់ហ្លួង និងកោះសំពៅមាស ។ ដើម្បីទទួលអ្នកទេសចរដើរលេងកម្សាន្តក្នុងឱកាសបុណ្យភ្ជុំបិណ្ឌពៃណីជាតិខ្មែរនេះ មន្ទីរទេសចរណ៍បានសម្រួលផ្លូវប្រវែង៣៨០០ម៉ែត្រទៀតពីស្ទឹងយោកទៅដល់កន្លែងកម្សាន្ត ដើម្បីឲ្យរថយន្តតូចធំធ្វើដំណើរទៅដល់ទីនោះបានដោយស្រួល ។ ក្រៅពីនោះបានដាក់ស្លាកសញ្ញាសម្គាល់ ផ្សេងៗ ពង្រីកចំណតរថយន្ត រៀបចំកន្លែងលក់ដូរ និងពង្រីកកន្លែងកម្សាន្តបន្តទៅក្រោមបានប្រវែង១០០ម៉ែត្រទៀតសរុបទាំងអស់១.០០០ម៉ែត្រ ។
រមណីយដ្ឋានទឹកធ្លាក់ច្រកល្អៀងមាន៨ដំណាក់ គឺដំណាក់យាយចំអន់តា ដំណាក់ទឹកឈូ ដំណាក់មនោរម្យ ដំណាក់ថ្មសណ្ដូន ដំណាក់ព្រះ ដំណាក់ជ្រៃក្រឹម ដំណាក់សុបិន និងដំណាក់ទឹកធ្លាក់ ។
លោកសំ ឃីម ឱ្យដឹងថា អ្នកទេសចរដែលទៅលេងកម្សាន្តសម្រាប់មនុស្សពេញវ័យម្នាក់១.០០០រៀល ថ្លៃផ្ញើម៉ូតូ២.០០០រៀល និងរថយន្តពី៣.០០០ទៅ១០.០០០រៀល ។ មិនអនុញ្ញាតឲ្យអ្នកទេសចរយកភេសជ្ជៈប្រភេទដបចូលទៅទេ និងបានណែនាំឲ្យទុកដាក់កាកសំណល់នៅក្នុងធុងសំរាមឲ្យបានត្រឹមត្រូវចៀសវាងបោះចូលក្នុងទឹកនាំឲ្យខូចអនាម័យ និងប៉ះពាល់បរិស្ថាន ។
កន្លងទៅនេះលោកថោង ខុនរដ្ឋមន្ត្រីក្រសួងទេសចរណ៍, លោកស៊ុយ សែមរដ្ឋមន្ត្រីក្រសួងរ៉ែ និងថាមពល, លោកកែវ រតនៈ ប្រតិភូរាជរដ្ឋាភិបាលទទួលបន្ទុកអគ្គនាយកអគ្គិសនីកម្ពុជា, លោកម៉ៅ ធនិន អភិបាលខេត្តពោធិ៍សាត់ និងថ្នាក់ដឹកនាំមួយចំនួនទៀតធ្លាប់ទៅដល់រមណីយដ្ឋានច្រកល្អៀង ហើយវាយតម្លៃថា វាមានលក្ខណៈ និងសក្ដានុពលល្អជាងរមណីយដ្ឋាននានាក្នុងប្រទេសកម្ពុជា។ ជារមណីយដ្ឋានធម្មជាតិមានទឹកធ្លាក់ខួបប្រាំងខួបវស្សាមិនដែលដាច់ បង្កលក្ខណៈឲ្យអ្នកទេសចរទៅលេងកម្សាន្តបានគ្រប់ពេល ។
លោករដ្ឋមន្ត្រីទេសចរណ៍បានឲ្យមន្ទីរទេសចរណ៍ និងអាជ្ញាធររៀបចំកែលំអតំបន់នោះឲ្យកាន់តែល្អឡើង ដូចជាផ្លូវធ្វើដំណើរ សុវត្ថិភាព កន្លែងចតរថយន្ត កន្លែងអង្គុយលេង ពិសេសតម្លៃម្ហូបអាហារឲ្យសមរម្យបំផុត និងមានអនាម័យ ដើម្បីទាក់ទាញអ្នកទេសចរក្នុងស្រុក និងក្រៅស្រុកចូលទៅលេងកម្សាន្តកាន់តែច្រើនឡើងពីមួយឆ្នាំទៅមួយឆ្នាំ ៕
ចែករំលែកព័តមាននេះ