ខេត្តព្រះសីហនុ៖ អ្នកនាំពាក្យនៃអយ្យការអមសាលាដំបូងខេត្តព្រះសីហនុ នៅថ្ងៃទី១៤ ខែមេសា ឆ្នាំ២០២១ បានប្រកាសពីការចោទប្រកាន់បុរស ២នាក់បងប្អូននឹងគ្នា ពីបទ គេចវេះពីការធ្វើចត្តាឡីស័ក ឬគេចចេញពីកន្លែងធ្វើចត្តាឡីស័ក។ បទល្មើសនេះ មានបញ្ញត្តិឲ្យផ្តន្ទាទោសតាមមាត្រា ៧ នៃច្បាប់ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ១៩១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ តំណាងអយ្យការបានស្នើសុំឲ្យឃុំខ្លួនបណ្តោះអាសន្នបុរសទាំង២ បញ្ជូនសំណុំរឿងទៅចៅក្រមស៊ើបសួរ ដើម្បីចាត់ការតាមនីតិវិធី។
សេចក្តីប្រកាស លើកឡើងថា បុរស២នាក់បងប្អូននេះ កាលពីថ្ងៃទី១០ និងថ្ងៃទី១២ ខែមេសា ឆ្នាំ២០២១ នៅភូមិ៣ ទំនប់រលក សង្កាត់លេខ១ ក្រុងព្រះសីហនុ ខេត្តព្រះសីហនុ មានជនសង្ស័យ ២នាក់ មានឈ្មោះ គឹម សុខរ៉ា ភេទប្រុស អាយុ ៣០ឆ្នាំ និងឈ្មោះ គឹម ផារី ឬគឹម ថារី ភេទប្រុស អាយុ ៣១ឆ្នាំ បានធ្វើសកម្មភាពចេញពីផ្ទះក្នុងតំបន់ ដែលរដ្ឋបាលខេត្តព្រះសីហនុ ដាក់តំបន់នោះ ជាមណ្ឌលចត្តាឡីស័ក។
សេចក្តីប្រកាស លើកឡើងថា នៅថ្ងៃទី១០ ខែមេសា ឆ្នាំ២០២១ វេលាម៉ោង ២៣ និង ០០នាទី ឈ្មោះ គឹម សុខរ៉ា បានចេញពីផ្ទះ ក្នុងតំបន់ចត្តាឡីស័ក ចំណែកឈ្មោះ គឹម ផារី ឬ គឹម ថារី បានជិះម៉ូតូ ១គ្រឿង ម៉ាក Honda Dream C-125 ពណ៌ខ្មៅ សេរីឆ្នាំ២០២០ ពាក់ផ្លាកលេខ ព្រះសីហនុ ១I-3233 គេចចេញពីផ្ទះក្នុងតំបន់ ដែលមានមណ្ឌលចត្តាឡីស័ក នៅថ្ងៃទី១២ ខែមេសា ឆ្នាំ២០២១ រំលងអធ្រាត្រ។ បន្ទាប់ពីទទួលបានព័ត៌មានពីកម្លាំងប្រជាការពារយាមគោលដៅថា មានមនុស្សរត់គេចចេញពីកន្លែងចត្តាឡីស័ក ក្រោយមកកម្លាំងសមត្ថកិច្ច បានធ្វើការស្រាវជ្រាវ រហូតឃាត់ខ្លួនបានជនសង្ស័យទាំងពីរនាក់ខាងលើតែម្តង។
នេះជាករណីដំបូងហើយ ដែលមានការចោទប្រកាន់ និងឃុំខ្លួនអ្នកគេចចេញពីតំបន់ចត្តាឡីស័ក។ ការគេចវេះពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក ក្នុងអំឡុងពេលធ្វើចត្តាឡីស័ក ត្រូវពិន័យជាប្រាក់ពី ១លានរៀល ទៅ ៥លានរៀល។ តែបើការគេចវេះពីការធ្វើចត្តាឡីស័ក ឬកន្លែងធ្វើចត្តាឡីស័កនោះ ដែលបណ្តាលឲ្យឆ្លងជំងឺកូវីដ១៩ ដល់អ្នកដទៃ ត្រូវផ្តន្ទាទោសដាក់ពន្ធនាគារពី ៦ខែ ទៅ ៣ឆ្នាំ និងពិន័យជាប្រាក់ ២លានរៀល ទៅ ១០លានរៀល៕
ចែករំលែកព័តមាននេះ