ខេត្តសៀមរាប ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្តសហការជាមួយមន្ទីរសុខាភិបាលដឹកនាំដោយលោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ច
ខេត្តសៀមរាប ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្តសហការជាមួយមន្ទីរសុខាភិបាលដឹកនាំដោយលោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ច បានចុះទៅ ពិនិត្យទីតាំងលក់ឱសថបុរាណចិនមួយកន្លែងយីហោយ៉ុងហឹងដែលគ្មានច្បាប់ទម្លាប់ត្រឹមត្រូវ បន្ទាប់ពីមានពលរដ្ឋម្នាក់បានស្លាប់នៅស្រុកជីក្រែងដោយសារប្រើឱសថបុរាណយ៉ុងហឹងនេះ ប៉ុន្តែមិនត្រូវបានជនរងគ្រោះដាក់ពាក្យបណ្តឹងទេ។
ប្រតិបត្តិការនេះបានធ្វើឡើងកាលពីវេលាម៉ោង១០ និង៣០នាទីព្រឹក ថ្ងៃទី៣០ កញ្ញា ២០១៥ ស្ថិតក្នុងភូមិត្រពាំងសេះ សង្កាត់គោកចក ក្រុងសៀមរាប។
លោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្តបានមានប្រសាសន៍ប្រាប់កម្ពុជាថ្មីថា ប្រតិបត្តិការនេះគឺទទួលបានបទបញ្ជាពីតំណាងអយ្យការ និងមានការសហការរវាងប៉ូលិសសេដ្ឋកិច្ច និងមន្ទីរសុខាភិបាលខេត្ត ព្រមទាំងអាជ្ញាធរមូលដ្ឋាន ទើបបានចុះទៅត្រួតពិនិត្យជាក់ស្តែងនៅទីតាំងឱសថបុរាណចិនយីហោយ៉ុងហឹង និងឈានទៅដល់ការនាំខ្លួនបុគ្គលិកម្នាក់ឈ្មោះ វ៉ែន ចន្ត្រា ភេទស្រី អាយុ២៤ឆ្នាំ រស់នៅភូមិវត្តដំណាក់ សង្កាត់សាលាកំរើក ដើម្បីយកទៅសួរនាំនៅស្នងការខេត្ត បន្ទាប់ពីម្ចាស់ទីតាំងទៅនៅក្រៅប្រទេស។
លោកបន្តថា ជាលទ្ធផលយើងរកឃើញមានឱសថចំនួនមួយប្រភេទមានយីហោ យ៉ុងហឹង មានដបធំ និងតូច ដបតូចមានចំនួន១.៨២៤ដប និងដបធំចំនួន១៤៧ដប។ លោកបន្តថា ចំពោះថ្នាំដបធំឃើញមានច្បាប់ តែសម្រាប់ដបតូច គឺមិនមានច្បាប់អ្វីទាំងអស់ ដោយបុគ្គលិកនិយាយថា ក្រុមហ៊ុនធំនៅភ្នំពេញ។
លោកបន្ថែមថា ទីតាំងខាងលើនេះត្រូវបានបិទបណ្ដោះអាសន្នសិនដរាបណាម្ចាស់ទីតាំង មានច្បាប់ត្រឹមត្រូវលោកនឹងអនុញ្ញាតឲ្យបើកវិញ៕
ចែករំលែកព័តមាននេះ