ខេត្តកំពង់ធំ ៖ ដើម្បីអនុវត្តតាមគោលនយោបាយភូមិ/ឃុំមានសុវត្ថិភាពទាំង៩ចំណុចរបស់ក្រសួងមហាផ្ទៃ កាលពីរសៀលថ្ងៃទី២៩ កញ្ញា ២០១៥ លោក អ៊ិត សុធា ព្រះរាជអាជ្ញាអមសាលាដំបូងខេត្ត បានបញ្ចាឲ្យលោក ដួង សារ៉ាន ព្រះរាជអាជ្ញារង ដឹកនាំកម្លាំងនគរបាលខេត្ត សហការជានគរបាលប៉ុស្ដិ៍ស្រុកបារាយណ៏ ចុះបង្ក្រាប ល្បែងស៊ីសងមួយកន្លែងនៅផ្ទះឈ្មោះ សេង ភារឿន ភេទប្រុស អាយុ៥៥ឆ្នាំ និងប្រពន្ធឈ្មោះ ហុក សុខនី ស្ថិតនៅភូមិដូង ឃុំបល្ល័ង្គ ស្រុកបារាយណ៍ ដោយឃាត់ខ្លួនមនុស្សប្រុសស្រីចំនួន៧នាក់ រួចបញ្ចូនមកស្នងការដ្ឋាននគរបាលខេត្ត ។
នៅព្រឹកថ្ងៃទី៣០ កញ្ញា ២០១៥ ទើបធ្វើការសាកសួរអ្នកទាំង៧នាក់ខាងលើនេះ ដែលមាន ១.ឈ្មោះ ហ៊ុន ភាព ២.ឈ្មោះ ម៉ែន ធូ ៣.ឈ្មោះ កេត ចាន់ថន ៤.ឈ្មោះ គន្ធា ៥.ឈ្មោះ ហោ វ៉ុន ៦.ឈ្មោះ ហុក មុន្នី និង៧.ឈ្មោះ ហៅថា សុខា និងបានរត់រួចម្នាក់ ឈ្មោះ សុខ ឡេង ដោយប្រមូលបានវត្ថុតាង រួមមាន កាបូបដៃ៤ បៀ៧ហ៊ូ ម៉ូតូ៤គ្រឿង និងប្រាក់មួយចំនួន ហើយបានកសាងសំណុំរឿងបញ្ចូលទៅសាលាដំបូងខេត្ត នៅរសៀលថ្ងៃដដែលដើម្បីចាត់ការទៅតាមនីតិវិធី ៕
ចែករំលែកព័តមាននេះ