រូបិយប័ណ្ណអាស៊ីបាននាំមកនូវការខាតបង់ប្រចាំត្រីមាសច្រើនបំផុតគិតចាប់ពីវិបត្តិហិរញ្ញវត្ថុអាស៊ីដែលបានប៉ះទង្គិចផ្ទួនៗដោយការបញ្ចុះតម្លៃប្រាក់យន់់ចិនគួរឲ្យភ្ញាក់ផ្អើល ក៏ដូចជាលទ្ធភាពនៃការដំឡើងអត្រាការប្រាក់របស់សហរដ្ឋអាមេរិក ។
សន្ទស្សន៍ដុល្លារអាស៊ីរបស់The Bloom-berg-JPMorgan ដែលជាអ្នកឃ្លាំមើលរូបិយប័ណ្ណសកម្មបំផុត ក្រៅពីប្រាក់យេនជប៉ុននៅក្នុងតំបន់ បានធ្លាក់ចុះ៤,២%ក្នុងប្រតិបត្តិការដ៏អាក្រក់បំផុតរបស់ខ្លួនគិតចាបពីវិបត្តិឆ្នាំ១៩៩៧-៩៨ ។ ចំណែកលុយរីងហ្គិតរបស់ម៉ាឡេស៊ីបាននាំមកនូវភាពអវិជ្ជមានយ៉ាងខ្លាំងជាមួយនឹងការធ្លាក់ចុះ១៥% ស្របពេលដែលតម្លៃប្រេងបានដើរថយក្រោយ ហើយលោកនាយករដ្ឋមន្ត្រី Najib Razak ត្រូវបានចាប់ខ្លួនដើម្បីធ្វើការស៊ើបអង្កើតពីអំពើពុករលួយ។ ឯប្រាក់យន់់ចិនបានធ្លាក់ចុះច្រើនក្រៃលែងនៅក្នុងអំឡុងពេលមួយឆ្នាំកន្លះ ស្របពេលដែលសេដ្ឋកិច្ចមាននិន្នាការធ្លាក់ចុះដ៏អាក្រក់បំផុតនៅក្នុងប្រទេសចិន ។ ចំណែកប្រធានធនាគារកណ្តាលសហរដ្ឋអាមេរិកលោកស្រី Janet Yellen បានថ្លែងកាលពីពេលថ្មីៗនេះថា ធនាគារនៅតែជំរុញដំឡើងអត្រាការប្រាក់ដដែលនៅឆ្នាំ២០១៥នេះ ។
លោក Sean Callow មន្ត្រីយុទ្ធសាស្ត្ររូបិយប័ណ្ណជាន់ខ្ពស់របស់ធនាគារ Westpac Banking Corp ដែលមានមូលដ្ឋាននៅក្រុងស៊ីដនីបានថ្លែងថា «វាលំបាកនឹងសង្កេតឃើញថាតើរូបិយប័ណ្ណអាស៊ីនឹងបង្ហាញពីភាពជួយទ្រទ្រង់រួច ក៏ដូចជាកំណើនដែលសមល្មមនៅក្នុងត្រីមាសទី៤នេះ ជាមួយនឹងការខាតបង់ធៀបនឹងប្រាក់ដុល្លារដែលទំនងជាក្លាយជាបទដ្ឋានមួយ »។
ការបង្អន់ល្បឿនសេដ្ឋកិច្ចរបស់ចិនកំពុងបង្កផលលំបាកដល់ការនាំចេញពីតំបន់ផ្សេងៗ ដែលគាំទ្រនូវការពិនិត្យមើលគ្រប់ជ្រុងជ្រោយចំពោះកិច្ចការសម្រួលរូបិយវត្ថុនិងការលើកកម្ពស់ហានិភ័យនៃសង្គ្រាមរូបិយប័ណ្ណ ។ ដុល្លារតៃវ៉ាន់បានរំកិលចុះក្នុងកម្រិតទាបក្នុងរយៈពេល៦ឆ្នាំនេះបន្ទាប់ពីធនាគារកណ្តាលរបស់ខ្លួនបានកាត់បន្ថយអត្រាការប្រាក់កាលពីសប្តាហ៍មុនជាលើកដំបូងចាប់តាំងពីឆ្នាំ២០០៩ ។ ចំណែកធនាគារប្រជាជនចិនបានបន្ទាបថ្លៃដើមដែលឲ្យខ្ចីក្នុងខែសីហាជាលើកទី៥ក្នុងឆ្នាំនេះ ខណៈឥណ្ឌាឯណោះវិញបានប្រកាសពីការកាត់បន្ថយលើកទី៤របស់ខ្លួនក្នុងឆ្នាំ២០១៥នេះកាលពីថ្ងៃអង្គារ ។
យោងតាមទិន្នន័យដែលចងក្រងដោយសារព័ត៌មាន Bloomberg បង្ហាញថា ប្រាក់រូពៀររបស់ឥណ្ឌូណេស៊ីបានចុះខ្សោយ៩,១%ធៀបនឹងប្រាក់ដុល្លារក្នុងត្រីមាសនេះ ហើយប្រាក់បាតថៃក៏ធ្លាក់ចុះប្រមាណជា៧,១%ដែរដែលវាជាប្រតិបត្តិការដ៏អាក្រក់បំផុតរបស់ខ្លួនគិតចាប់តាំងពីឆ្នាំ១៩៩៩មក។ ចំណែកដុល្លារកោះតៃវ៉ាន់វិញបានធ្លាក់ចុះ៦%ដែលជាកម្រិតខាតបង់ច្រើនជាងគេបំផុតរបស់ខ្លួនតាំងពីឆ្នាំ១៩៩៧ ។ រីឯលុយវ៉ុនរបស់កូរ៉េខាងត្បូងក៏ដើរថយក្រោយ៦,៤%ដែរ ខណៈប្រាក់យន់ចិនធ្លាក់២,៤%ដែលជាកម្រិតច្រើនបំផុតគិតចាប់តាំងពីត្រីមាសដំបូងនៃឆ្នាំ២០១៤ ។
ដោយឡែកតាមការព្យាកររបស់ Bloom-berg ដែលប្រើប្រាស់តួលេខផ្លូវការឲ្យដឹងថា គេបានវាយតម្លៃនូវមូលធនដែលបានបន្សល់ទុកនៅក្នុងប្រទេសចិនចំនួន១៤១,៦៦ប៊ីលានដុល្លារក្នុងអំឡុងខែសីហា បន្ទាប់ពីការទម្លាក់ថ្លៃគួរឲ្យភ្ញាក់ផ្អើលនៃប្រាក់យន់ចិនកក្រើកទីផ្សារពិភពលោក ដែលមានចំនួនលើសរបាយការណ៍មុនក្នុងខែកក្កដាចំនួន១២៤,៦២ប៊ីលានដុល្លារ។ ចំណែកទិន្នន័យជួញដូរចុងក្រោយបង្ហាញថា មូលនិធិបរទេសអូសទាញបានទឹកប្រាក់សុទ្ធចំនួន១៧,៨ប៊ីលានដុល្លារនៅក្នុងត្រីមាសនេះពីផ្សារភាគហ៊ុននៅក្នុងប្រទេសឥណ្ឌា ឥណ្ឌូណេស៊ី ហ្វ៊ីលីពីន កូរ៉េខាងត្បូង កោះតៃវ៉ាន់ និងថៃ។
វិបត្តិនៅអាស៊ី
ការរំកិលចុះនៅក្នុងរូបិយប័ណ្ណនានាកំពុងតែកើតមានឡើងក្នុងពេលបន្ទុកបំណុលខាងក្រៅចុះខ្សោយជាងមុន អត្រាប្តូរប្រាក់កាន់តែអាចបត់បែនបាន ហើយអត្រារូបិយប័ណ្ណបរទេសបម្រុងទុកក៏ច្រើនជាងវិបត្តិក្នុងអំឡុងចុងទសវត្សរ៍ឆ្នាំ៩០ដែរ ។ បច្ចុប្បន្នបណ្តាប្រទេសសេដ្ឋកិច្ចរីកចម្រើននៅអាស៊ីភាគច្រើនបានប្រតិបត្តិនូវគណនីចរន្តលើសជំនួសដោយឱនភាព ។
លោក Mitul Kotecha ប្រធានយុទ្ធសាស្ត្ររូបិយប័ណ្ណអាស៊ីប៉ាស៊ីហ្វិករបស់ Barclays Plc ក្នុងប្រទេសសិង្ហបុរីបានថ្លែងថា «មូលដ្ឋានគ្រឹះនៅក្នុងតំបន់អាស៊ីគឺភាពប្រសើរជាងអ្វីដែលគេធ្វើបានកាលពីមុន ដោយអាចអាចលើកមកជជែកបាន »។
ដុល្លារសិង្ហបុរីបានដើរថយក្រោយ៥,៦%ក្នុងត្រីមាសនេះ ប្រាក់ពីហ្សូហ្វ៊ីលីពីនចុះខ្សោយ៣,៨% និងប្រាក់រូពីឥណ្ឌាធ្លាក់៣,៥%។ ខណៈប្រាក់ដុងវៀតណាមធ្លាក់២,៩%ដែលវាជាកម្រិតប្រតិបត្តិការដ៏អាក្រក់របស់ខ្លួនគិតចាប់តាំងពីឆ្នាំ២០១១ ស្របដែលអាជ្ញាធរពាក់ព័ន្ធបានបន្ថោកតម្លៃរូបិយប័ណ្ណនេះចំនួន៣លើកក្នុងឆ្នាំនេះដែលធ្វើឡើងបន្ទាប់ពីការចុះខ្សោយនៃប្រាក់យន់ចិន។
ធនាគារADB ក្នុងខែកញ្ញានេះ បានទម្លាក់ការព្យាករនៃកំណើនសម្រាប់ឆ្នាំ២០១៥របស់ខ្លួនចំពោះបណ្តាប្រទេសសេដ្ឋកិច្ចកំពុងអភិវឌ្ឍន៍ក្នុងតំបន់ពី៦,៣%មកត្រឹម៥,៨% ។ ការនាំចេញរបស់កោះតៃវ៉ាន់បានធ្លាក់ចុះក្នុងខែទី៧គិតត្រឹមខែសីហានេះ ខណៈការនាំចេញពីកូរ៉េខាងត្បូងនិងថៃបានធ្លាក់ចុះក្នុងអំឡុងពេល៨ខែមុននេះរៀងៗខ្លួន។ ចំណែកការនាំចេញរបស់ឥណ្ឌូណេស៊ីបានរួញខ្លី១១ខែជាប់ៗគ្នា ។ រីឯសេដ្ឋកិច្ចចិនដែលមានទំហំធំជាងគេបំផុតទី២លើពិភពលោកកំពុងពង្រីកខ្លួនក្នុងការបោះជំហានយឺតបំផុតគិតចាប់តាំងពីឆ្នាំ១៩៩០មក ហើយគ្រឿងវាស់ស្ទង់នៃផលិតកម្មឧស្សាហកម្មរបស់ខ្លួនក៏បានបោះពួយចុះក្នុងកម្រិតទាប៦ឆ្នាំដែរក្នុងខែកញ្ញានេះ ។
ដោយឡែកលោក Robert Minikin ប្រធានយុទ្ធសាស្ត្ររូបិយប័ណ្ណរបស់ Standard Chartered Plc ដែលមានមូលដ្ឋាននៅក្រុងឡុងបានថ្លែងថា «ចំពោះចំណាត់ថ្នាក់សេដ្ឋកិច្ចនេះ កំណើនគឺកំពុងតែដំណើរការក្រោមសក្តានុពល។ ម្យ៉ាងទៀត វាហាក់ដូចជាមិនទំនងឡើយដែលមានការលើកឡើងថា ការកើនឡើងនៃរូបិយប័ណ្ណបរទេសក្នុងស្រុក នឹងក្លាយជាអ្វីដែលគួរឲ្យទទួលយកបានពីទស្សនវិស័យនៃគោលនយោបាយមួយនៅក្នុងត្រីមាសខាងមុខ »៕
ចែករំលែកព័តមាននេះ