រាជធានីភ្នំពេញ ៖ យោងតាមការបង្ហោះជាសាធារណៈអមដោយរូបភាពផងនៅទំព័រលើអាខោនហ្វេសប៊ុកចំនួន២ គឺទី១ ទំព័រផ្ទាល់របស់លោកឃឹម ស៊ុនសូដា អភិបាលខណ្ឌកំបូល និងទី២ អាខោនហ្វេសប៊ុកផ្ទាល់របស់លោកសេង គន្ធ ដែលជាអភិបាលរងខណ្ឌកំបូល បានឲ្យដឹងថា អាជ្ញាធរខណ្ឌកំបូលដឹកនាំដោយលោកឃឹម ស៊ុនសូដា បានរៀបចំទីតាំងសម្រាប់កម្មករកម្មការិនីចំនួន៤៥៧នាក់ ដែលបម្រើការងារនៅរោងចក្រអេ អ៊ឹម ធូ (AM2) ស្នាក់នៅធ្វើចត្តាឡីស័ករយៈពេល១៤ថ្ងៃ ដើម្បីតាមដានមេរោគ COVID-19 ។
អាខោនហ្វេសប៊ុកទាំង២ខាងលើនោះ បានបញ្ជាក់បន្ថែមទៀតថា ទីតាំងចត្តាឡីស័កខាងលើត្រូវបានរៀបចំធ្វើឡើង នៅល្ងាចថ្ងៃសៅរ៍ ទី១០ ខែមេសា ឆ្នាំ២០២១ នៅក្នុងបរិវេនសាលាបឋមសិក្សាទ្រនំជ្រឹង ស្ថិតនៅតាមបណ្តោយផ្លូវលេខ៤២ ក្នុងភូមិខ្ចៅ សង្កាត់បឹងធំ ខណ្ឌកំបូល រាជធានីភ្នំពេញ ។
នេះគឺជាការខិតខំប្រឹងប្រែងបំផុតនៅក្នុងប្រយុទ្ធប្រឆាំងជាមួយមេរោគចង្រៃ COVID-19 ដើម្បីភាពសុខសាន្តជូនប្រជាពលរដ្ឋ និងការភាពរីកចម្រើនរបស់ប្រទេសជាតិដែលរាជរដ្ឋាភិបាលកំពុងគិតគូយ៉ាងខ្ពស់លើបញ្ហានេះ ។
ដើម្បីឲ្យកាន់តែច្បាស់កោះសន្តិភាពក៏សូមផ្សាយជូននូវខ្លឹមសារទាំងស្រុងរបស់បណ្ដាញសង្គមហ្វេសប៊ុករបស់លោកអភិបាល និងលោកអភិបាលរងខណ្ឌកំបូលទាំង២ខាងលើនោះដូចតទៅ «អនុវត្តន៍តាមបទបញ្ជាយ៉ាងម៉ឺងម៉ាត់ និងប្រកបដោយការទទួលខុសត្រូវខ្ពស់របស់ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ ។
នៅល្ងាចថ្ងៃសៅរិ៍ ទី១០ ខែមេសា ឆ្នាំ២០២១នេះ លោកអភិបាលខណ្ឌកំបូលបានដឹកនាំកំលាំងសរុបរបស់រដ្ឋបាលខណ្ឌកំបូល រួមមានមន្ត្រីសាលាខណ្ឌ មន្ត្រីអធិការដ្ឋាននគរបាលខណ្ឌ សន្តិសុខសាលាខណ្ឌ និងមន្ត្រីសង្កាត់ ប្រជាការពារសង្កាត់បឹងធំ ចុះរៀបចំទីតាំងធ្វើចត្តាឡីស័ករបស់បងប្អូនកម្មករ កម្មការនី រោងចក្រ អេ អុឹម ធូ (AM2) ចំនួន៤៥៧ នាក់ ដែលនៅវេលាម៉ោង២១.០០ នាទីយប់នេះ នឹងត្រូវដឹកជញ្ជូនមកស្នាក់នៅ និងធ្វើចត្តាឡីស័ករយៈពេល១៤ ថ្ងៃ នៅក្នុងបរិវេនសាលាបឋមសិក្សាទ្រនំជ្រឹង ស្ថិតតាមបណ្តោយផ្លូវលេខ៤២ ភូមិខ្ចៅ សង្កាត់បឹងធំ ខណ្ឌកំបូល រាជធានីភ្នំពេញ»៕
ចែករំលែកព័តមាននេះ