ខេត្តកំពង់ចាម ៖ នៅក្នុងបរិវេណមន្ទីរពេទ្យខេត្តកំពង់ចាមមានមនុស្សប្រុសស្រីជាច្រើននាក់បានអង្គុយនៅលើជាងម៉ាជ័រ ដែលរៀបចំដោយក្រុមគ្រូពេទ្យដោយមានគម្លាតតាមការណែនាំរបស់ក្រសួងសុខាភិបាល ។
ក្នុងនោះគេឃើញវត្តមានលោកវរសេនីយ៍ត្រីឈិន សារ៉ន អតីតនាយប៉ុស្តិ៍សង្កាត់សំបួរមាស ជាមន្ត្រីចូលនិវត្តន៍បានរង់ចាំការចាក់វ៉ាក់សាំង ដោយក្នុងចិត្តពួកគាត់សប្បាយរីករាយ ទាំងញញឹមក្នុងចិត្តស្ទើរបង្ហូរទឹកភ្នែក ដោយរំពឹងថា ជំងឺកូវីដនឹងមិនយាយីលើរាងកាយនោះទេ ។
គ្រាដែលមកទទួលយកសេវាចាក់វ៉ាក់សាំង នាព្រឹកថ្ងៃទី១០ មេសា ២០២១ ។ ក្នុងឱកាសយុទ្ធនាការចាក់វ៉ាក់សាំង sinovac ដល់សមាគមន៍អតីតយុទ្ធជន ដែលធ្វើឡើងព្រមៗគ្នា នៅតាមបណ្ដាស្រុក-ក្រុងចំនួន១០ក្នុងខេត្តកំពង់ចាម មានចំនួន១.២៨៨នាក់ ។ វត្តមានចូលរួមមាន ៖ ឯកឧត្តមឧត្តមសេនីយ៍ឯក ចាន់លំផាត់ សមាជិកអចិន្ត្រៃយ៍សមាគមអតីតយុទ្ធជនកម្ពុជា តំណាងឱ្យឯកឧត្តមគន់ គីម ឯកឧត្តមអ៊ុន ចាន់ដា អភិបាលខេត្តកំពង់ចាម។
លោកឧត្តមសេនីយ៍ទោឯម កុសល ស្នងការនគរបាលខេត្ត ប្រធានសមាគមអតីតយុទ្ធជនកម្ពុជាខេត្តកំពង់ចាមគូសបញ្ជាក់អោយដឹងថា បងប្អូនអតីតយុទ្ធជនដែលបានស្ម័គ្រចិត្តមកទទួលការចាក់វ៉ាក់សាំងការពារជំងឺ covid-19 ជំហានទី១ សរុបចំនួន១.២៨៨នាក់ ក្នុងនោះរួមមាន ក្រុងកំពង់ចាមចំនួន១៨៥នាក់ និងស្រុកកំពង់សៀមមានចំនួន១០៥នាក់ ដែលត្រូវបានកំណត់ឱ្យមកទទួលការចាក់វ៉ាក់សាំង នៅក្នុងមន្ទីរពេទ្យខេត្តកំពង់ចាម
ដោយឡែកស្រុកព្រៃឈរ ជើងព្រៃ បាធាយចំការលើ ស្រុកស្ទឹងត្រង់ ស្រុកកោះសុទិនស្រុកកងមាស និងស្រុកស្រីសន្ធរ ដោយកំណត់យកមន្ទីរពេទ្យបង្អែកនីមួយៗ ជាសាមីដែលត្រូវផ្ដល់ការចាក់វ៉ាក់សាំងការពារជូនបងប្អូនអតីតយុទ្ធជន ។ ឯកឧត្តមអ៊ុន ចាន់ដា អភិបាលខេត្ត មានប្រសាសន៍ឱ្យដឹងដែលថា ដោយមានការយកចិត្តទុកដាក់ខ្ពស់ពីសម្ដេចតេជោហ៊ុន សែន នាយករដ្ឋមន្ត្រី និងជាប្រធានសមាគមអតីតយុទ្ធជនកម្ពុជា គឺឱ្យបងប្អូនអតីតយុទ្ធជនប្រុសស្រីបានមកទទួលការចាក់វ៉ាក់សាំងនេះ ដោយឥតគិតថ្លៃ និងតាមគោលការណ៍ស្ម័គ្រចិត្ត ។
ក្នុងនោះអ្នកនៅក្រុងកំពង់ចាម និងស្រុកកំពង់សៀម គឺមកទទួលយកសេវាកម្មនេះនៅក្នុងមន្ទីរពេទ្យខេត្តកំពង់ចាមតែម្ដង ។ ឯកឧត្តមអ៊ុន ចាន់ដា អភិបាលខេត្ត មានប្រសាសន៍បន្តថា ជាមួយនោះប្រធានក្រុម និងស្រង់ឈ្មោះសមាជិករបស់ខ្លួនមកជាបន្តបន្ទាប់ដើម្បីទទួលបានការចាក់វ៉ាក់សាំងនេះ ។ ហើយអ្នកដែលមិនទាន់បានចាក់សូមកុំអស់សង្ឃឹមព្រោះក្រុមការងារនឹងរៀបចំជូនដោយធ្វើឡើងជាបន្តបន្ទាប់ ហើយក៏ត្រូវទំនាក់ទំនងជាមួយនឹងអាជ្ញាធរមូលដ្ឋានផងដែរ ។
នៅក្នុងខេត្តកំពង់ចាម បានរកឃើញស្ត្រីម្នាក់រស់នៅក្នុងស្រុកព្រៃឈរ បានទៅប្រកបរបរលក់ដូរចិញ្ចឹមជីវិតនៅរាជធានីភ្នំពេញ ដោយស្ត្រីរូបនោះមានអាការៈមិនស្រួលមិនបានឲ្យគ្រូពេទ្យនៅភ្នំពេញមើលនោះទេ គឺបានធ្វើដំណើរមកស្រុកកំណើតក្នុងស្រុកព្រៃឈរ ឲ្យគ្រូពេទ្យជួយព្យាបាលជម្ងឺ ដោយមានការសង្ស័យក្រុមគ្រូពេទ្យបានយកសំណាកទៅពិនិត្យក៏ឃើញមានផ្ទុកវិជ្ជមាន covid 19 និងបាននាំមកជាបាលនៅបន្ទប់ដាច់ដោយឡែកក្នុងមន្ទីរពេទ្យខេត្តកំពង់ចាម ។
ជាមួយនោះអ្នកដែលប៉ះពាល់ផ្ទាល់ និងប្រយោលមានចំនួន៩០នាក់ បាននាំមកយកសំណាក និងតម្រូវឲ្យធ្វើចត្តាឡីស័ក កត្តានេះបានធ្វើឱ្យប៉ះពាល់ដល់ជីវភាព រស់នៅប្រចាំថ្ងៃផងដែរ ។ ជំងឺកូវីដបំលែងថ្មី គឺមានការឆ្លងលឿន ហើយនៅថ្ងៃទី៩ មេសា កន្លងទៅ ត្រូវបានរកឃើញមានចំនួនជាង៥០០នាក់ ក្នុងប្រទេសកម្ពុជា ។ នេះគឺជាការឆ្លងពីសហគមន៍មួយទៅសហគមន៍មួយពីទ្រង់ទ្រាយតូចទៅទ្រង់ទ្រាយធំ ដោយមើលឃើញស្ថានភាពនៃការរីករាលដាលជំងឺកូវីតទៅប្រមុខរាជរដ្ឋាភិបាលកម្ពុជា បានសម្រេចបិទការចេញចូលរវាងខេត្ត និងខេត្ត ក្នុងគោលបំណងដើម្បីកាត់ខ្សែចម្លងទ្រង់ទ្រាយធំដីជំងឺដ៏កាចសាហាវមួយនេះ ។
ជាមួយនោះខេត្តកំពង់ចាម ត្រូវបានដាក់កម្លាំងអាវុធហត្ថ នគរបាល កងយុទ្ធពលខេមរៈភូមិន្ទ ព្រមទាំងអាជ្ញាធរដើម្បីរាំងទប់ស្កាត់នៅជំងឺកូវីដ ដើម្បីអោយទទួលបានជោគជ័យគឺត្រូវផ្ដើមឡើងចេញពីខ្លួនយើងម្នាក់ៗ ៕
ចែករំលែកព័តមាននេះ