រាជធានីភ្នំពេញ៖កំណើននៅក្នុងវិស័យកាត់ដេរក្នុងឆ្នាំ២០២១នេះ ត្រូវបានក្រសួងសេដ្ឋកិច្ចនិងហិរញ្ញវត្ថុព្យាករណ៍ថា អាចសម្រេចបានជាង៤%ហើយចូលដល់ឆ្នាំ២០២២អាចនឹងកើនដល់៦%។តែសម្រាប់កំណើនខាងលើនេះ ត្រូវបានសហជីពក្នុងស្រុកមួយយល់ឃើញថាវាពិបាកក្នុងការទទួលបាន ព្រោះវានៅមានបញ្ហាធំមួយចំនួនដែលកើតសម្រាប់ពិភពលោកនិងកម្ពុជា។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានឱ្យដឹងនៅថ្ងៃទី៧មេសានេះថា ចំពោះកំណើននៃការនាំចេញឬកំណើននៅក្នុងGDP ក្នុងឆ្នាំ២០២១និង២០២២វាច្បាស់ជាកើនឡើង បើប្រៀបធៀននិងឆ្នាំ២០២០ តែបើយើងប្រៀបធៀបនិងឆ្នាំ២០១៩ វានៅទាបជាង។
លោកអាត់ធន់ មានប្រសាសន៍ថា«ការស្ទាបស្ទង់មតិរបស់ក្រសួងសេដ្ឋកិច្ចនិងហិរញ្ញវត្ថុ ខ្ញុំគិតថាវាអាចប្រហាក់ប្រហែលគ្នាដែរ តែយើងគិតថាវាអាចពិបាកក្នុងការទទួលបាននៅកំណើនជាង៤%ឬ៦%នៅឆ្នាំ២០២២ ដោយសារ បញ្ហាធំគឺជំងឺកូវីដ១៩,បញ្ហាEBA,បញ្ហាGSP ហើយចំពេលគ្នានេះដែរស្ថានភាពប្រែប្រួលជាទូទៅបណ្តាប្រទេសនៅអឺរ៉ុប និងអាមេរិកក៏ដូចជានៅប្រទេសកម្ពុជាយើងក៏មានការវិវត្តន៍ អីចឹងវិស័យកាត់ដេរនេះត្រូវតែប្រែប្រួល»។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជារូបនេះ លើកឡើងថា«វិស័យកាត់ដេរនៅក្នុងឆ្នាំ២០២១នេះ វាហាក់គ្រាន់បើជាងឆ្នាំ២០២០បន្តិច តែយើងមិនទាន់ហ៊ានធានាស្ថានភាពអ្នកឆ្លងជំងឺកូវីដ១៩ច្រើនចូលដល់កម្មកររោងចក្រហើយ អីចឹងបានជាបានខ្ញុំថាពិបាកក្នុងការទសទាយ។បើសិនបញ្ហាជំងឺកូវីដ១៩មានឆ្លងច្រើន កំណើនក្នុងវិស័យកាត់ដេរនឹងមានបញ្ហា បើទោះបីក្នុងរយៈពេល៣ខែដើមឆ្នាំ២០២១នេះមិនទាន់អី តែនៅរយៈពេល៧ខែទៀតវាពិបាកក្នុងការទស្សទាយ»។
តាមសេចក្តីព្រាងក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២របស់ក្រសួងសេដ្ឋកិច្ចនិងហិរញ្ញវត្ថុ បានបង្ហាញការព្យាករណ៍សម្រាប់វិស័យកាត់ដេរក្នុងឆ្នាំ២០២១នេះថា អនុវិស័យកាត់ដេរ ត្រូបានព្យាករណ៍ថានឹងកើនើងវិញក្នុងអត្រាកំណើនទាប ៤,៦%ក្នុងឆ្នាំ២០២១ និង៦% ក្នុងឆ្នាំ២០២២ ដោយសារការងើបឡើងវិញនូវតម្រូវករសកល បន្ទាប់ពីការយាយីដ៏ធ្ងន់ធ្ងរ ពីវិបត្តិជំងឺកូវីដ១៩ ជាពិសេសមកលើប្រទេសដៃគូនាំចេញសំខាន់ៗរបស់កម្ពុជា រួមមានសហភាពអឺរ៉ុប និងសហរដ្ឋអាមេរិក។
ទោះជាយ៉ាងនេះក្តី អនុវិស័យកាត់ដេរ ក៏អាចជួបប្រទះនឹងហានិភ័យនិងបញ្ហាប្រឈមមួយចំនួនមានភាពមិនច្បាស់លាស់នៃប្រព័ន្ធអនុគ្រោះពន្ធពីទីផ្សារខាងក្រៅ ពិសេសពាក់ព័ន្ធនឹងប្រព័ន្ធ EBA ក៏ដូចជាប្រព័ន្ធអនុគ្រោះទូទៅ(GSP)របស់សហរដ្ឋអាមេរិក លើផលិផលធ្វើដំណើរ ភាពមានកម្រិតនៃការប្រើប្រាស់បច្ចេកវិទ្យានៅក្នុងផលិតកម្ម និងការបន្តកើនឡើងការប្រកួតប្រជែងពីខាងក្រៅ។
ជាការឆ្លើយតប រាជរដ្ឋាភិបាលនឹងដាក់ឱ្យអនុវត្ត«យុទ្ធសាស្ត្រអភិវឌ្ឍន៍វិស័យកាត់ដេរ ផលិតផលស្បែកជើង និងកាបូបកម្ពុជា២០២១- ២០២៥»ដើម្បីទាក់ទាញការវិនិយោគមានតម្លៃបន្ថែមខ្ពស់ ដោយផ្តោតការយកចិត្តទុកដាក់លើ៖១)-ការបន្តពង្រឹងធនធានមនុស្សដើម្បីបង្កើនផលិតភាពនិងបង្កើតគន្លងអាជីពសម្រាប់កម្មករ និយោជិត,២)-ការបន្តធ្វើឱ្យប្រសើរឡើងនូវលក្ខខណ្ឌការងារណិងសុខុមាលភាពរបស់កម្មករ និយោជិត,៣)- ការលើកកម្ពស់ការវិនិយោគក្នុងស្រុក និងបរទេសដើម្បីបង្កើនតម្លៃបន្ថែមក្នុងអនុវិស័យនេះ, ៤)-ការទាក់ទាញការវិនិយោគនៅក្នុងឧស្សាហកម្មគាំទ្រសម្រាប់បម្រើឱ្យអនុវិស័យនេះ និង៥)- ការជំរុញការធ្វើពិពិធកម្ម ទីផ្សារសម្រាប់ការនាំចេញផលិតផលកាត់ដេរស្បែកជើងនិងកាបូប៕
ចែករំលែកព័តមាននេះ