រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក៥នាក់ ជិះម៉ូតូ៣គ្រឿង ត្រូវបានប្រជាពលរដ្ឋនាំគ្នាឃាត់ខ្លួនបាន រួចវាយទ្រមខ្លួន និងក្បាល បន្ទាប់ពីធ្វើសកម្មភាពឆក់កាបូបស្ពាយពីនារីម្នាក់បានសម្រេច ហើយជិះគេចខ្លួន ក៏ជួបគ្រោះថ្នាក់ចរាចរណ៍តែម្តង ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោងប្រមាណ៣រសៀល ថ្ងៃទី០៦ ខែមេសា ឆ្នាំ២០២១ នៅតាមបណ្តោយផ្លូវជាតិ៥ មុខវិទ្យាល័យឬស្សីកែវ ស្ថិតក្នុងភូមិឃ្លាំងសាំង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ។
ជនសង្ស័យរូបនោះ ពុំត្រូវបានស្គាល់អត្តសញ្ញាណឡើយ ហើយត្រូវបាននគរបាលបញ្ជូនទៅកាន់អធិការដ្ឋាន ខណ្ឌឬស្សីកែវដើម្បីសាកសួរ។
តាមព័ត៌មានបានអោយដឹងថា នៅមុនពេលកើតហេតុ ជនសង្ស័យមានគ្នា៥នាក់ ជិះម៉ូតូចំនួន៣គ្រឿង ធ្វើដំណើរតាមផ្លូវជាតិលេខ៥ ពីជើងទៅត្បូង លុះនៅពេលធ្វើដំណើរមកដល់ចំណុចខាងលើ ជនសង្ស័យម្នាក់ក្នុងចំណោមបក្សដែលជិះម៉ូតូម៉ាកស្តុបពី១គ្រឿងពណ៌ស ពាក់ស្លាកលេខ ភ្នំពេញ1IM -4560 បានធ្វើសកម្មភាពឆក់កាបូបពីនារីម្នាក់ដែលជិះម៉ូតូម៉ាកធូដេ ពណ៌ប្រផេះ មួយគ្រឿងបានសម្រេច ។
ប្រភពដដែលបន្តថា ខណៈពេលនោះ នារីរងគ្រោះក៏បានស្រែកថា «ចោរ» ហើយក៏ជិះម៉ូតូដេញតាមពីក្រោយ ។ ភ្លាមៗបក្សពួកជនសង្ស័យដែលរង់ចាំជិះម៉ូតូបិទគូថចំនួន២គ្រឿងផ្សេងទៀតនោះ ក៏នាំគ្នាជិះគេចខ្លួនបាត់អស់ នៅសល់ជនសង្ស័យម្នាក់ដែលជិះម៉ូតូធ្វើសកម្មភាពជិះគេចខ្លួនម្នាក់ លុះមកដល់ភូមិសាមគ្គី ក៏បានជួបនឹងគ្រោះថ្នាក់ប៉ះជាមួយរថយន្តម៉ាកព្រូសមួយគ្រឿង បណ្តាលឱ្យដួល ហើយក៏ត្រូវបានប្រជាពលរដ្ឋជួយឃាត់ខ្លួនបាន និងនាំគ្នាវាយឡើងទ្រមខ្លួន រួចប្រគល់ឱ្យនគរបាលប៉ុស្តិ៍ ចាត់ការតាមច្បាប់។
បន្ទាប់ពីចាប់ខ្លួនរួច ក៏ដកហូតបានកាបូបរបស់ជនរងគ្រោះមកវិញ ព្រមទាំងម៉ូតូម៉ាកស្តុបពី ដែលធ្វើសកម្មភាពមួយគ្រឿងផងដែរ៕
ចែករំលែកព័តមាននេះ