ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់ត្រូវអតីតប្តីដែលបានលែងលះគ្នាជាង១ឆ្នាំហើយនោះនៅនឹកឃើញដល់អតីតប្រពន្ធក៏កើតជាភ្លើងប្រចណ្ឌ លុះពេលក្រឡេកឃើញអតីតប្រពន្ធនៅកន្លែងលក់ផ្លែឈើរបស់ប្អូនថ្លៃមុខផ្សារលើធំថ្មី ក៏ស្រាប់តែបើកម៉ូតូកង់បីឥណ្ឌាដេញបុក រួចចាក់សម្លា.ប់ប្រពន្ធពេញបរិវេណផ្សារលើធំថ្មីដូចក្នុងរឿងហុងកុង បណ្តាលឱ្យរងរបួសធ្ងន់ធ្ងរ បង្កឱ្យមានការភ្ញាក់ផ្អើលពេញក្រុងសៀមរាបទាំងយប់តែម្តង។
សេចក្តីរាយការណ៍បន្តថា ហេតុការណ៍អតីតប្តីដេញចាក់សម្លា.ប់ប្រពន្ធនោះ បានកើតឡើងកាលពីវេលាម៉ោង៩និង៣០នាទីយប់ ថ្ងៃទី៦ ខែមេសា ឆ្នាំ២០២១ នៅមុខកន្លែងលក់ផ្លែឈើ ចំណុចផ្សារលើធំថ្មី ស្ថិតក្នុងភូមិដកពោធិ សង្កាត់ស្លក្រាម ក្រុង/ខេត្តសៀមរាប។
បើតាមសាក្សីនៅកន្លែងកើតហេតុបានប្រាប់ភ្នាក់ងារកោះសន្តិភាពទាំងយប់នៅកន្លែងកើតហេតុឱ្យដឹងថា មុនកើតហេតុ ពួកគាត់ឃើញបុរសម្នាក់បានអង្គុយក្នុងម៉ូតូកង់បីឥណ្ឌា ដែលចតនៅមុខកន្លែងលក់ផ្លែឈើ ផ្សារលើធំថ្មី ខណៈពេលនោះឃើញមានស្ត្រីម្នាក់ (ជាអតីតប្រពន្ធរបស់ជនដៃដល់) និងក្មេងស្រីម្នាក់ទៀត ជិះម៉ូតូមកកន្លែងលក់ផ្លែឈើមួយសន្ទុះ ស្រាប់ឃើញបុរសអ្នកបើកម៉ូតូកង់បីឥណ្ឌាដែលចតនៅមុខកន្លែងលក់ផ្លែឈើនោះ បានបើកចេញមក រួចសំដៅស្ត្រីរងគ្រោះនោះតែម្តង។
ប្រភពពីសាក្សីបានបន្តថា ក្រោយពីបើកដេញបុកស្ត្រីរងគ្រោះពេញផ្សារលើធំថ្មី បណ្តាលឱ្យម៉ូតូរបស់ស្ត្រីរងគ្រោះ និងម៉ូតូកង់បីឥណ្ឌាដួលរួចមក ក៏ឃើញបុរសរូបនោះ (អតីតប្តី) ទាញកាំបិតចិតបន្លែចាក់មកលើស្ត្រីរងគ្រោះចំនួន២កាំបិត ដោយត្រូវចំត្រង់.កមួយកាំបិត និងចាក់ចំ.ពោះខាងក្រោមដោះផ្នែកខាងស្តាំ បណ្តាឱ្យរបួសធ្ងន់តែម្តង ។ ក្រោយពេលកើតហេតុ ស្ត្រីរងគ្រោះត្រូវបានប្អូនស្រីដឹកតាមម៉ូតូទាំងឈា.មហូរដូចទឹកយកទៅសង្គ្រោះនៅមន្ទីរពេទ្យឯកជននៅតាមបណ្តោយផ្លូវជាតិលេខ៦។
បើតាមប្រភពពីមន្ត្រីនគរបាលប៉ុស្តិ៍សង្កាត់ស្លក្រាម បានប្រាប់ថា ករណីហិង្សាដោយចេតនាខាងលើនេះ គឺបានកើតឡើងរវាងអតីតប្តីប្រពន្ធ កាលពីយប់នៅមុខផ្សារលើធំថ្មី បង្កឡើងដោយប្តីបានយកកូនកាំបិតមកចាក់ប្រពន្ធ បណ្តាលឱ្យរបួសធ្ងន់ ហើយទុកម៉ូតូកង់បីឥណ្ឌាដែលពាក់ស្លាកលេខសៀមរាប ១.AF.៨៨០៣ នៅនឹងកន្លែងកើតហេតុ រួចយកម៉ូតូរបស់ប្រជាការពារភូមិ ជិះចេញទៅបាត់។
ប្រភពដដែលបានបញ្ជាក់ថា បន្ទាប់ពីជិះម៉ូតូរបស់ប្រជាការពារភូមិរត់គេចខ្លួននោះ ជនដៃដល់រូបនេះក៏បានយកម៉ូតូទៅទុកនៅផ្ទះរបស់ខ្លួនក្នុងភូមិខា្នរ សង្កាត់ជ្រាវ ហើយក៏យករថយន្តឡិចស៊ីស RX300 ពណ៌ស ពាក់ស្លាកលេខសៀមរាប ២.C៧១៧៣ បើកចេញដោយសុវត្ថិភាព។
ប្រភពពីសមត្ថកិច្ចបានបញ្ជាក់ថា ជនបង្កខាងលើនេះឈ្មោះ តាំង លាប ភេទប្រុស អាយុ៣៧ឆ្នាំ មានស្រុកកំណើតនៅខេត្តកំពង់ចាម បច្ចុប្បន្នរស់នៅភូមិខ្នារ សង្កាត់ជ្រាវ ក្រុង/ខេត្តសៀមរាប។ ចំណែកស្ត្រីជនរងគ្រោះមានឈ្មោះ លាន ប៊ុន ណាត អាយុ៣៥ឆ្នាំ រស់នៅភូមិ-សង្កាត់ជាមួយគ្នា ហើយអ្នកទាំង២មានកូនចំនួន២នាក់ (ក្នុងនោះស្រីម្នាក់ និងប្រុសម្នាក់) ហើយកូនទាំង២នាក់គឺរស់នៅជាមួយស្ត្រីរងគ្រោះដែលបានលែងលះគ្នាជាមួយជនដៃដល់ជាង១ឆ្នាំមកហើយ។
បច្ចុប្បន្ន ជនបង្កត្រូវបានកម្លាំងជំនាញសហការគ្នា ដើម្បីស្វែងរកតាមចាប់ខ្លួនយកមកផ្តន្ទាទោសទៅតាមផ្លូវច្បាប់៕
ចែករំលែកព័តមាននេះ