រាជធានីភ្នំពេញ ៖ នៅទីបំផុត ឃាតករដែលវាយសម្លាប់ក្មេងប្រុសអាយុ១០ឆ្នាំម្នាក់ស្លា.ប់ក្នុងព្រៃត្រែង នាសង្កាត់ព្រែកឯង ខណ្ឌច្បារអំពៅនោះ ត្រូវបានកម្លាំងសមត្ថកិច្ចបានធ្វើការឃាត់ខ្លួនហើយដឹងថា គឺត្រូវជាបងថ្លៃជីដូនមួយថ្លៃរបស់កុមារារងគ្រោះតែម្តង ។ សូមបញ្ជាក់ថា ការចាប់ខ្លួនធ្វើឡើងដោយកម្លាំងនគរបាលនៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ សហការជាមួយនគរបាលព្រហ្មទណ្ឌកម្រិតធ្ងន់ក្រុងភ្នំពេញ និងនគរបាលខណ្ឌច្បារអំពៅ កាលពីល្ងាចថ្ងៃទី០៥ មេសា ឆ្នាំ២០២១ នៅចំណុចវត្តជ្រោយអំពិល ស្ថិតក្នុងសង្កាត់ក្បាលកោះ ខណ្ឌច្បារអំពៅ ។ ជនសង្ស័យមានឈ្មោះ អុន ភាមុន ភេទប្រុស អាយុ៣០ឆ្នាំ មានទីលំនៅ ក្នុងភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ ។
តាមចម្លើយសារភាពចំពោះមុខសមត្ថកិច្ច ជនសង្ស័យបានព្រមឆ្លើយសារភាពហើយថា ៖ កាលពីរសៀលថ្ងៃទី៣១ មីនា ឆ្នាំ២០២១ ខ្លួនពិតជាបានធ្វើសកម្មភាពវាយសម្លាប់ជនរងគ្រោះឈ្មោះ ជា ប៊ុនហេង ភេទប្រុស អាយុ១០ឆ្នាំ នៅចំណុចដីទ្បូត៍គ្មានលេខ ផ្លូវថៃហ្គឺ ភូមិរបោះអង្កាញ់១ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ប្រាកដមែន ។ មូលហេតុដែលខ្លួនវាយសម្លាប់ជនរងគ្រោះខាងលើ ដោយសារ ជនរងគ្រោះជាប្អូនបានវាយក្បាលខ្លួន២ដៃពីក្រោយ ខណៈពេលជិះម៉ូតូម៉ាក MSX ពណ៌ស ស្លាកលេខភ្នំពេញ 1FJ-8384 ធ្វើដំណើរជាមួយគ្នាក្នុងបំណងទិញប្រហិតនៅម្តុំរោងចក្រថៃហ្គឺ ។
ជនសង្ស័យថា នៅពេលជនរងគ្រោះវាយក្បាលហើយនោះ ខ្លួនក៏កើតចិត្តខឹងសម្បារ ហើយក៏ឌុបជនរងគ្រោះទៅដល់កន្លែងកើតហេតុខាងលើ ដោយយកលេសបបួលក្មេងរងគ្រោះចុះទៅបេះឈូក ។ លុះពេលចូលទៅដល់កន្លែងស្ងាត់ ជនសង្ស័យក៏ធ្វើសកម្មភាពវាយក្មេងរងគ្រោះចំនួន០២ដៃ បណ្តាលឲ្យដួលផ្កាប់មុខទៅក្នុងទឹក រួចខ្លួនឈរមើលរហូតដល់ក្មេងរងគ្រោះឈ្លក់ទឹកស្លា.ប់ទើបខ្លួនចាកចេញពីកន្លែងកើតហេតុ ។
ក្រោយពីធ្វើកម្មភាពរួចខ្លួនបានជិះម៉ូតូគេចចេញពីកន្លែងកើតហេតុ តាមក្រោមស្ពានព្រែកសំរោង រួចបត់ទៅស្ពានមុន្នីវង្ស ហើយបត់ឡើងទៅផ្លូវជាតិលេខ១ តម្រង់ទៅផ្ទះនៅក្រោយវត្តជ្រោយអំពិលវិញធម្មតា ធ្វើដូចពុំមានអ្វីកើតឡើយបន្តិចសោះ ។ ហើយអ្វីដែលហួសចិត្ត គឺជននេះ វាធ្វើជួយនាំឪពុកក្មេងរងគ្រោះ ដើររកក្មេងរងគ្រោះមួយយប់ ក្រោយសម្លាប់រួច ធ្វើសមដូចមិនដឹង
អីសោះ ។
តាមប្រភព័ត៌មានពីមន្ត្រីសមត្ថកិច្ចអោយដឹងថា ៖ ដោយផ្អែកទៅលើវីឌីអូរកាមេរ៉ាសុវត្ថិភាពបញ្ជាក់ថា នៅវេលារសៀលថ្ងៃកើតហេតុ គឺជនសង្ស័យជាបងថ្លៃជីដូនមួយ បានឌុបជនរងគ្រោះទៅហូបប្រហិត ហើយក៏បាត់ខ្លួនកុមារារងគ្រោះតាំងពីពេលនោះមកតែម្តង ។ ក្រោយការបាត់ខ្លួន រហូតមានការប្រទះឃើញសពកុមារារងគ្រោះហើយនោះ ក៏ជនសង្ស័យពុំមានប្រាប់ព័ត៌មាន ឬតម្រុយអ្វីខ្លះមកកាន់ក្រុមគ្រួសារសាច់ញាតិក្មេងប្រុសរងគ្រោះឡើយ ទើបតែសមត្ថកិច្ចបើកការស្រាវជ្រាវ ហើយឈានទៅឃាត់រូបគេយកទៅយកនាំ ទើបរូបគេព្រមឆ្លើយពីទង្វើដែលបានប្រព្រឹត្តិចំពោះមុខសមត្ថកិច្ចតែម្តង ។
សូមបញ្ជាក់ថា នៅវេលាម៉ោង១៣រសៀលថ្ងៃទី៦ ខែមេសា ឆ្នាំ២០២១ កម្លាំងសមត្ថកិច្ចចម្រុះ បាននាំខ្លួនឃាតករខាងលើ យកទៅធ្វើត្រាប់អំពីសកម្មភាពដែលបានវាយសម្លាប់ក្មេងប្រុសរងគ្រោះ នៅចំណុចកើតហេតុផងដែរ ។ ការយកជនសង្ស័យទៅត្រាប់នោះ គេសង្គេតឃើញ មានការចោមរោមមើលយ៉ាងអ៊ូរអរពីសំណាក់ បងប្អូនប្រជាពលរដ្ឋរស់នៅក្បែរតំបន់កើតហេតុ ក៏ដូចជាបងប្អូនប្រជាអ្នកដំណើរដែលធ្វើដំណើរឆ្លងកាត់ទីនោះជាដើម ។ ក្រោយការនាំទៅធ្វើត្រាប់រួច ជនសង្ស័យត្រូវបញ្ចូនខ្លួនទៅកាន់អធិការដ្ឋាននគរបាលខណ្ឌច្បារអំពៅ ដើម្បីឃុំខ្លួនបណ្តោះអាសន្ន រងចាំកសាងសំណុំរឿង បញ្ចូនទៅតុលាការ ចាត់ការទៅតាមនីតិវិធីច្បាប់នៅពេលក្រោយ ។
គួររំលឹកថា សពក្មេងប្រុសវ័យ១០ឆ្នាំខាងលើ មានឈ្មោះ ជា ប៊ុនហេង ជាសិស្ស មានទីលំនៅផ្ទះគ្មានលេខ ក្នុងភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ ។ សពត្រូវបានពលរដ្ឋអ្នកដើររកឃ្មុំ ប្រទះឃើញដេកស្លាប់ ក្នុងព្រៃត្រែងដ៏ជ្រៅមួយកន្លែង ស្ថិតក្នុងដីឡូតិ៍គ្មានលេខ តាមបណ្តោយផ្លូវថៃហ្គ័រ ក្នុងភូមិរបោះអង្គាញ់១ សង្កាត់ព្រែកឯង ខណ្ឌច្បារអំពៅ រាធានីភ្នំពេញ កាលវេលាម៉ោង១១ និង៣០នាទីថ្ងៃទី២ ខែមេសា ឆ្នាំ២០២១ ដោយសភាពហើមស្អុយរលួយ មើលសឹងតែលែងស្គាល់ទៅហើយដែរ ។
យោងតាមប្រភព័ត៌មាន អោយដឹងថា នៅវេលាម៉ោង១៥ និង៣០នាទីរសៀលថ្ងៃទី៣១ ខែមីនា ឆ្នាំ២០២១ កុមារ៉ារងគ្រោះ បានជិះកង់ទៅលេង ក្នុងបរិវេណវត្តជ្រោយអំពិល តែម្នាក់ឯង ។ ពេលនោះ ក្មេងប្រុសរងគ្រោះ ក៏បានទុកកង់នៅក្នុងវត្ត ហើយឡើងជិះម៉ូតូជាមួយជនសង្ស័យម្នាក់ ( មិនស្គាល់អត្តសញ្ញាណ ) ចេញពីពីវត្តទៅបាត់ស្រមោលឈឹង ។
នៅល្ងាចថ្ងៃខែដដែល ដោយពុំឃើញកូនប្រុសត្រឡប់ទៅផ្ទះ ឪពុកក្មេងប្រុសរងគ្រោះ និងសាច់ញាតិ បានចេញតាមរកកូន ក៏ឃើញតែកង់នៅក្នុងវត្តជ្រោយអំពិល ក៏រាយការណ៍ជូនសមត្ថកិច្ចអំពីការបាត់ខ្លួន និងបានដាក់ពាក្យបណ្តឹង ដើម្បីសុំការអន្តរាគមន៍ពីសមត្ថកិច្ចជួយស្រាវជ្រាវតាមរកបន្ថែម ។ ទន្ទឹមនឹងការបាត់ខ្លួននោះ បងប្អូនជាសាច់ញាតិរបស់ កុមារ៉ារងគ្រោះ ក៏បាននាំគ្នាបង្ហោះជាបន្តបន្ទាប់អំពីការបាត់ខ្លួន តាំងពីល្ងាចថ្ងៃកើតហេតុមកម្លេះ ដោយមានភ្ជាប់ជាមួយអត្ថន័យខ្លីសារខ្លះ បូករួមជាមួយរូបថតភិនភាគរបស់គេផងដែរ ដើម្បីអាចអោយបងប្អូនសាធារណះបានឃើញ នឹងជួយផ្តល់ព័ត៌មាន ។ ប៉ុន្តែតាំងពីពេលនោះមក គ្មានបាត់ដំណឹងសូន្យឈឹង ពុំមានតម្រុយអ្វីសោះឡើយពីក្មេងប្រុសរងគ្រោះ ។
លុះរហូតដល់វេលាម៉ោង១១ និង៣០នាទីព្រឹកថ្ងៃទី២ មេសា មានពលរដ្ឋអ្នករកឃ្មុំម្នាក់ បានចូលទៅរកឃ្មុំក្នុងព្រៃត្រែងជ្រៅមួយ ស្ថិតតាមបណ្តោយផ្លូវថៃហ្គ័រ ក៏ស្រាប់តែប្រទះឃើញសពក្មេងប្រុសម្នាក់ដេកផ្កាប់មុខ និងមានសភាពហើមរលួយ ធ្វើអោយរូបគេដើរចេញពីព្រៃត្រែងវិញ ហើយប្រាប់ពលរដ្ឋដែលរស់នៅក្បែរតំបន់នោះ នឹងបានរាយការណ៍បន្តទៅកាន់សមត្ថកិច្ច ដើម្បីចុះអន្តរាគមន៍ ។
ភ្លាមៗបន្ទាប់ពីទទួលបានព័ត៌មានហើយនោះ កម្លាំងនគរបាលមូលដ្ឋាន សហការជាមួយនគរបាលជំនាញកោសល្យវិច្ច័យ និងអង្គការ CPU បានចុះអន្តរាគមន៍ពិនិត្យ រកមូលហេតុ នៃការស្លាប់ ។ ក្រោយការពិនិត្យយ៉ាងល្អិតល្អន់ រួចមក សមត្ថកិច្ចបញ្ជាក់ថា សពគឺត្រូវស្លាប់ដោយសារត្រូវវត្ថុរឹងវាយចំមុខ បណ្តាលអោយបែកសន្ទះអញ្ចាញធ្មេញខាងមុខ និងបែកធ្មេញខាងក្រោមទាំងសងខាងផងដែរ ។ ដូច្នេះ ហើយ ករណីនេះសមត្ថកិច្ចកំណត់បានថា គឺជាអំពើ ឃាតកម្មវាយសម្លាប់ ៕ ដោយ៖ លីហេង
ចែករំលែកព័តមាននេះ