ប្រទេសវៀតណាម ៖ តាមការឲ្យដឹងពីគណៈកម្មាធិការប្រជាជនក្រុងហូជីមិញ ថវិកាវិនិយោគសម្រាប់គម្រោងផ្លូវថ្នល់ក្នុងរយៈពេល៥ឆ្នាំក្រោយ នឹងមានទំហំទឹកប្រាក់៥,៥ប៊ីលានដុល្លារដែលជាបរិមាណមួយគុណនឹងបីដងក្នុងអំឡុងឆ្នាំ២០១១-២០១៥ ។
ប្រភពដដែលបានឲ្យដឹងទៀតថា ក្រៅពីថវិកា២,៤ប៊ីលានដុល្លារពីកញ្ចប់ថវិការបស់ក្រុងហូជីមិញ ក៏នឹងមានការប្រមូលទុនពីវិស័យពាណិជ្ជកម្មឯកជននានាដើម្បីនឹងធ្វើឲ្យប្រសើរឡើងនូវប្រព័ន្ធហេដ្ឋារចនាសម្ព័ន្ធផងដែរ ។
អនុប្រធានគណៈកម្មាធិការប្រជាជននិងជាអតីតប្រធាននាយកដ្ឋានដឹកជញ្ជូននិងទូរគមនាគមន៍លោក Tat Thanh Cang បានថ្លែងថា ថវិការដ្ឋាភិបាលខ្លួនឯងផ្ទាល់អាចជួបនឹងការលំបាកនៅក្នុងទុនវិនិយោគខ្នាតធំដែលចាំបាច់សម្រាប់គម្រោងហេដ្ឋារចនាសម្ព័ន្ធនានា ។
យោងតាមស្ថិតិពីគណៈកម្មាធិការប្រជាជនបង្ហាញថា ក្រុងហូជីមិញបានវិនិយោគសរុបជិត១,៧ប៊ីលានដុល្លារគិតចាប់តាំងពីឆ្នាំ២០១១ដែលរាប់បញ្ចូលប្រាក់វិភាគទានជាច្រើនរយប៊ីលានដុងរបស់វិស័យពាណិជ្ជកម្មឯកជន ។
ហេដ្ឋារចនាសម្ព័ន្ធគន្លឹះរួមមានដូចជា ប្រព័ន្ធផ្លូវថ្នល់ថ្មីត្រូវបានគេដាក់ឲ្យស្ថិតក្នុងការប្រើប្រាស់និងគម្រោងមួយចំនួនទៀតត្រូវបានប្រតិបត្តិក្នុងឆ្នាំ២០១៥ ។
ទេសចរណ៍លើទូក Nhieu Loc – Thi Nghe នៅបរិវេណតំបន់ជុំវិញក្រុងបានចាប់ផ្តើមដំណើរការកាលពីដើមខែកញ្ញានេះ។ ម្យ៉ាងទៀតក្រុងហូជីមិញបានវិនិយោគក្នុងទំហំទឹកប្រាក់រាប់រយលានដុល្លារដើម្បីបោសសម្អាតប្រឡាយដែលកខ្វក់នេះដើម្បីធ្វើវាឲ្យក្លាយជាទិសដៅទេសចរណ៍មួយ ។
ប្រឡាយ Tan Hoa-Lo Gom មានប្រវែង១២គីឡូម៉ែត្រគឺជាតំបន់មួយដែលពោរពេញដោយមេរោគ ជាមួយនឹងផ្ទៃទឹកល្អក់ និងកខ្វក់ដែលមានសំរាមគេបោះចោលពាសវាលពាសកាលគ្មានរបៀបរៀបរយ ប៉ុន្តែបច្ចុប្បន្នវាបានក្លាយជាមានមុខមាត់ថ្មី ហើយថែមទាំងជួយជាគុណប្រយោជន៍ក្នុងការតភ្ជាប់សង្កាត់លេខ ៦និងសង្កាត់លេខ១១ ,សង្កាត់ Tan Binh និងសង្កាត់ Tan Phu ទៀតផង។ ក្រុងហូជីមិញបានវិនិយោគសរុបអស់ទឹកប្រាក់ចំនួន៨៨,៩លានដុល្លារសម្រាប់គម្រោងនេះ ។
បន្ថែមលើនេះនៅមានបណ្តាញផ្លូវ១៤គីឡូម៉ែត្រដែលចាប់ផ្តើមពីអាកាសយានដ្ឋាន Tan Son Nhat ឆ្ពោះទៅផ្លូវជាតិលេខ១ និងកាត់តាមសង្កាត់ Ta Binh ,Go Vap, Binh Thanh និងសង្កាត់ Thu Duc ដែលបានជួយតភ្ជាប់មជ្ឈមណ្ឌលទីក្រុងនេះជាមួយនឹងតំបន់នានានៃទីក្រុង និងបណ្តាខេត្តក្បែរខាង ។ គម្រោងដែលមានទំហំទឹកប្រាក់៣៤០លានដុល្លារនេះក៏ជួយកាត់បន្ថយការធ្វើចរាចរណ៍លើបណ្តាញផ្លូវដែលកកស្ទះធ្ងន់ធ្ងរដូចយ៉ាង ផ្លូវ Xo Viet Nghe Tinh , ផ្លូវ Dinh Bo Linh , ផ្លូវ Bach Dang ជាដើម។
គម្រោងផ្លូវអាកាសរាងអក្សរYនៅផ្លូវប្រសព្វ Go Vap ដែលត្រូវបានគេរំពឹងថានឹងបើកឲ្យដំណើរការ និងធ្វើចរាចរណ៍នៅចុងឆ្នាំ២០១៥នេះ នឹងជួយកាត់បន្ថយការកកស្ទះចរាចរណ៍៨០%នៅក្នុងតំបន់ ។
តាមស្ថិតិរបស់នាយកដ្ឋានដឹកជញ្ជូននិងទូរគមនាគមន៍ ទុនវិនិយោគសុរបទាំងអស់ត្រូវបានគេវាយតម្លៃថា មានចំនួន១៨លានដុល្លារក្នុងនោះ១១លានដុល្លារ នឹងបានមកពីថវិកាក្រុងសាមីផ្ទាល់តែម្តង ។
ក្រៅពីមូលនិធិដែលស្ថិតក្នុងទម្រង់ BOT និងBT ក្រុងហូជីមិញបានអនុញ្ញាតឲ្យបណ្តាវិនិយោគិននានាផ្តល់នូវទុនដែលបានដាក់វិនិយោគរួចដើម្បីចៀសវាងនូវឱនភាពថវិកាដែលជានិច្ចកាលបានបន្ថយល្បឿនដំណើរការនៃគម្រោង។
យោងតាមអ្នកជំនាញ ក្រុងហូជីមិញបានប្រមូលទុនដោយប្រសិទ្ធភាពពីវិស័យពាណិជ្ជកម្មឯកជននិងបណ្តាសហគ្រាសជាច្រើនដែលបានវិនិយោគក្នុងទម្រង់ PPP, BOT,BTO,BT ។
អ្នកជំនាញរៀបចំផែនការក្រុងលោក Ngo Viet Nam Son បានថ្លែងថា ក្រុងហូជីមិញបានផ្តោតលើការវិនិយោគក្នុងផ្លូវខ្នាតធំ ផ្លូវ Highways និងផ្លូវរង្វង់មូលរួមមាន រុក្ខវិថី Vo Van Kiet-Mai Chi Tho ,រុក្ខវិថី Nguyen Van Linh និង Pham Van Dong ដែលមិនត្រឹមតែជួយសម្រួលដល់ច្រកចូលជាយក្រុងប៉ុណ្ណោះទេថែមទាំងបានជួយជំរុញដល់ការអភិវឌ្ឍសេដ្ឋកិច្ចទៀតផង ។
លោកបានបន្ថែមថា ក្រុងហូជីមិញបាននិងកំពុងធ្វើបានល្អបំផុតនៅក្នុងការប្រើប្រាស់មូលនិធិរបស់វិស័យឯកជនដើម្បីធ្វើឲ្យប្រសើរឡើងនៅក្នុងប្រព័ន្ធហេដ្ឋារចនាសម្ព័ន្ធ ៕
ចែករំលែកព័តមាននេះ