ខេត្តត្បូងឃ្មុំ ៖ មកទល់ពេលនេះ គ្រូពេទ្យបានយកសំណាករបស់លោកវរសេនីយ៍ឯកវ៉ា រ៉ា ប្រធានការិយាល័យភស្តុភានៃស្នងការដ្ឋាននគរបាលខេត្តត្បូងឃ្មុំ ទៅពិនិត្យជាបន្តបន្ទាប់សរុបចំនួន៣លើកហើយ ជាលទ្ធផលគឺអវិជ្ជមាន ។ លោកវរសេនីយ៍ឯកវ៉ា…
ខេត្តត្បូងឃ្មុំ ៖ មកទល់ពេលនេះ គ្រូពេទ្យបានយកសំណាករបស់លោកវរសេនីយ៍ឯកវ៉ា រ៉ា ប្រធានការិយាល័យភស្តុភានៃស្នងការដ្ឋាននគរបាលខេត្តត្បូងឃ្មុំ ទៅពិនិត្យជាបន្តបន្ទាប់សរុបចំនួន៣លើកហើយ ជាលទ្ធផលគឺអវិជ្ជមាន ។
លោកវរសេនីយ៍ឯកវ៉ា រ៉ា ប្រធានការិយាល័យភស្តុភារនៃស្នងការដ្ឋាននគរបាលខេត្តត្បូងឃ្មុំ បានប្រាប់ឲ្យដឹងថា ដំបូងឡើយ រូបលោកមានអាការៈក្តៅខ្លួន ទទួលទានអាហារបានតិចៗ ហើយក៏មានមិត្តភក្តិម្នាក់បានជូនលោកទៅពិនិត្យឈាមនៅក្រុងសួង ឃើញជាតិស្ករឡើងខ្ពស់ ហើយក៏បានមកសម្រាកនៅគ្លីនិកឯកជនក្រុងកំពង់ចាមបាន៤ថ្ងៃ ដោយគ្រាន់តែធូរស្រាលបានខ្លះ ប៉ុន្តែនៅថប់ៗដង្ហើមពិបាកដកដង្ហើម ក៏បានឱ្យកូននាំមកសម្រាកព្យាបាលនៅមន្ទីរពេទ្យខ្មែរ-សូវៀត ឯរាជធានីភ្នំពេញ។
ប្រធានការិយាល័យភស្តុភានៃស្នងការដ្ឋាននគរបាលខេត្តត្បូងឃ្មុំប្រាប់ឲ្យដឹងបន្តថា ដោយមានការសង្ស័យខ្លាចក្រែងមានជំងឺ កូវីដ១៩ គ្រូពេទ្យបានយកសំណាករបស់លោកទៅពិនិត្យជាបន្តបន្ទាប់សរុបចំនួន៣លើក លទ្ធផលអវិជ្ជមាន ។ ចំណែកប្រពន្ធរបស់លោកក៏បានយកសំណាកទៅពិនិត្យលើកទីមួយ ក៏ទទួលលទ្ធផលអវិជ្ជមានដែរ ហើយត្រូវបានក្រុមគ្រូពេទ្យបន្តតាមដានសុខភាពបន្ថែមទៀត។ ដោយឡែកម្ដាយក្មេករបស់លោក ដែលមានអាយុ៧៤ឆ្នាំ មានទីលំនៅភូមិអូរុន ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម ត្រូវបានរកឃើញវិជ្ជមានកូវីដ១៩ ដំបូងត្រូវបានបញ្ចូលខ្យល់អុកស៊ីសែនសម្រាកនៅបន្ទប់សង្គ្រោះបន្ទាន់ ក្នុងមន្ទីរពេទ្យខ្មែរ-សូវៀត ដោយសារការយកចិត្តទុកដាក់ពីសំណាក់ក្រុមគ្រូពេទ្យពេទ្យ បានធ្វើឲ្យម្ដាយក្មេករបស់លោករហូតមកដល់ពេលនេះ បានធូរស្រាលច្រើន ដោយអាចដើរបាននៅក្នុងបន្ទប់។
មកដល់ពេលនេះសុខភាពរបស់លោកវ៉ា រ៉ា បានធូរស្រាលច្រើន ព្រមទាំងទទួលទានអាហារបានច្រើននឹងត្រៀមចេញពីមន្ទីរពេទ្យ ត្រឡប់មកអង្គភាពវិញ ។ ជាមួយនោះក៏សូមថ្លែងអំណរគុណយ៉ាងជ្រាលជ្រៅចំពោះលោកឧត្តមសេនីយ៍ត្រីម៉ុន មាគ៌ា ស្នងការនគរបាលខេត្តត្បូងឃ្មុំរួមនឹងស្នងការរងព្រមទាំងមន្ត្រីនគរបាលទាំងអស់ លោកវរសេនីយ៍ឯកហុង គឹមហឿន អធិការនគរបាលស្រុកមេមត់ ដែលបានជួយជ្រោមជ្រែងផ្ដល់ថវិកាដល់រូបលោកឲ្យមកសម្រាកព្យាបាលជំងឺនៅមន្ទីរពេទ្យខ្មែរ-សូវៀត ឯរាជធានីភ្នំពេញ ។ ក្រៅពីរូបលោក នៅមានប្អូនថ្លៃនៅស្រុកកំពង់សៀម ខេត្តកំពង់ចាម ដែលរូបលោកបានចូលទៅលេងកាលពីពេលកន្លងទៅ ត្រូវបានក្រុមគ្រូពេទ្យយកសំណាកទៅពិនិត្យនៅវិទ្យាស្ថានប៉ាស្ទ័រ និងបានណែនាំឱ្យធ្វើចត្តាឡីស័កផងដែរ។
បើតាមគ្រូពេទ្យមួយរូបនៅមន្ទីរពេទ្យបង្អែកស្រុកមេមត់ ប្រាប់ឲ្យដឹងថា កាលពីថ្ងៃទី២៣ មីនា ២០២១ វិជ្ជមានកូវីដ១៩ ត្រូវបានរកឃើញលើកដំបូងលើលោកវរសេនីយ៍ត្រីឡេង ពៅ នាយរងការិយាល័យបទល្មើសសេដ្ឋកិច្ចនៃស្នងការដ្ឋាននគរបាលខេត្តត្បូងឃ្មុំ។ ក្រោយមកទៀតជំងឺនេះបានរកឃើញជាបន្តបន្ទាប់ គិតមកដល់ថ្ងៃទី១ មេសា ២០២១ បានកើនដល់ចំនួន៧នាក់ ក្នុងនោះមានកូនប្រុសលោកវរសេនីយ៍ឯកវ៉ា រ៉ា និងចៅប្រុសតូចម្នាក់ វិជ្ជមានកូវីដ១៩ កំពុងសម្រាកព្យាបាលនៅក្នុងមន្ទីរពេទ្យបង្អែកស្រុកមេមត់។ មកដល់ពេលនេះលោកឡេង ពៅ មិនទាន់បានចាកចេញពីមន្ទីរពេទ្យនៅឡើយ គឺក្រុមគ្រូពេទ្យកំពុងតាមដានសុខភាពជាបន្តទៀត ។
សូមបញ្ជាក់ថា គិតរហូតមកដល់រសៀលថ្ងៃទី១ មេសា ឆ្នាំ២០២១ នៅខេត្តត្បូងឃ្មុំ អ្នកវិជ្ជមានកូវីដ១៩ ត្រូវបានរកឃើញបន្តបន្ទាប់កើនដល់៧នាក់ហើយ។ កំពុងតែសម្រាកព្យាបាលនៅបន្ទប់ដាច់ដោយឡែក ក្នុងមន្ទីរពេទ្យបង្អែកស្រុកមេមត់ ជាមួយនោះអ្នកពាក់ព័ន្ធជិត២០នាក់ បាននាំមកធ្វើចត្តាឡីស័កនៅវិទ្យាល័យសម្ដេចតេជោហ៊ុន សែន មេមត់៕
ចែករំលែកព័តមាននេះ