ខេត្តស្វាយរៀង ៖ លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានឲ្យដឹងកាលពីរសៀលថ្ងៃទី២៩ មីនា នេះថា នៅថ្ងៃនេះខេត្តស្វាយរៀងកាន់តែធ្ងន់ធ្ងរហើយ ដោយបានបន្តរកឃើញអ្នកមានករណីវិជ្ជមានជំងឺកូវីដ១៩សរុបចំនួន១០បន្ថែមទៀត ក្នុងនោះមានជនជាតិចិនចំនួន៨នាក់និងជនជាតិខ្មែរចំនួន២នាក់។
លោកបានបន្តថា ការរកឃើញបន្ថែមចំនួន១០នាក់នេះបានធ្វើឲ្យចំនួនអ្នកឆ្លងក្នុងព្រឹត្តិការណ៍សហគមន៍២០កុម្ភៈកើនឡើងដល់ចំនួន១៧នាក់ ក្នុងនោះមានអ្នកជាសះស្បើយចំនួន២នាក់និងនៅសល់១៥នាក់ទៀតកំពុងសម្រាកព្យាបាលនៅមន្ទីរពេទ្យ។
លោកបានបន្តទៀតថា ក្រុមការងារបានស្រាវជ្រាវរកអ្នកពាក់ព័ន្ធនឹងអ្នកឆ្លងជំងឺកូវីដ១៩ទាំងនោះបានចំនួន២៣១នាក់ ក្នុងនោះនៅនៅភូមិឈើភ្លើង ឃុំកំពង់ត្រាច ស្រុករមាសហែក រកឃើញចំនួន៦១នាក់ (ស្រី៣០នាក់) ក្នុងនោះអ្នកប៉ះពាល់ផ្ទាល់ចំនួន២១នាក់ (ស្រី១២នាក់) អ្នកប៉ះពាល់ដោយប្រយោលចំនួន៤០នាក់ (ស្រី១៨នាក់) និងក្រុងបាវិតចំនួន១៧០នាក់ (ស្រី៦០នាក់) ។
លោកបានបញ្ជាក់ថា ក្រុមការងារកំពុងបន្តស្រាវជ្រាវអ្នកជាប់ពាក់ព័ន្ធផ្ទាល់និងប្រយោលជាបន្តបន្ទាប់ដើម្បីយកសំណាកទៅធ្វើតេស្តរកកូវីដ១៩ឲ្យបានទាន់ពេលវេលា ។ លោកវេជ្ជបណ្ឌិតបានឲ្យដឹងទៀតថា អាជ្ញាធរខេត្តស្វាយរៀងបានសម្រេចផ្អាកទីតាំងមួយចំនួនដូចជាវត្តអារ៉ាម ការដ្ឋានសំណង់ អាហារដ្ឋានចំនួន៧ទីតាំងនិងផ្ទះប្រជាពលរដ្ឋចំនួន១២ខ្នងដែលមានការជាប់ពាក់ព័ន្ធនឹងអ្នកឆ្លងជំងឺកូវីដ១៩ក្នុងព្រឹត្តិការណ៍សហគមន៍២០ កុម្ភៈផងដែរ ៕
ចែករំលែកព័តមាននេះ